فاونديشن آير مات من برجوا | Bourjois Air Mat Foundation

مســــــاء الخـــــــير حـــــبيبــــاتـــي 💕

كــيفــكــم ؟ انـــشــــــاء الـــله بــــخــــير ..

رجعت بتدوينة اليوم بتكون ريفيو أو مراجعة عن فاونديشن آير مات من بورجوا Bourjois Air Mat Foundation 💄

 

 

وهذي ثاني تجربة لي مع فاونديشن من بورجوا وسبق وجربت هيلثي ميكس وكان من أنجح التدوينات ولقت كثير رواج عليها وعلشان تشوفونها اضغطوا هنا .

ومن فترة شهور ما اذكر بالضبط جربت فاونديشن آير مات ونزلت وقتها بوست بالانستا عنه واختلفت الارآء عنه فيه منهم حبوه وفي ناس لا وقالوا يسبب لهم حبوب ..

وصار الحين الوقت الكافي إني أحكم عليه وأعطيك رأيي النهائي عنه ..

 وصف المنتج:

 

أول شيء نهاية الفاونديشن مطفي و التغطية عاليه يعني فل كفر وتقدرون تبنون عليه النهاية طبيعية والشركة توعد أن يضل ثابت لمدة تصل لـ 24 ساعة  ويتحكم في الدهون في البشرة . 

يعطي نعومة وبشرة مخملية وتركيبته مو جافة أبداً ومايترك طبقة ثقيلة ع الوجة بالعكس يترك البشرة تتنفس وخفيف ويعطي لوك متوحد وصافي وناعم ..

فيه نسبة حماية بسيطه جداً spf10

مناسبة للبشرات الدهنية ، اذا البشرة جـــافة و فيها قشور أو تشققات بتكون واضحة و شكلها بارز و الأفضل تكون البشرة مهيئة من الآول من  تقشير  و ترطيب  وترطيب وترطيب وترطيب قبل استخدام  أي فاونديشن مو بس هذا .

   تدرجات الألوان فيه ثمانية ألوان طبيعية هدفها يستهدف البشرات الفاتحه والحنطية  والسمراء  وكان تقسيم الالوان بهذا الشكل :

 لونين للبشرة الفاتحة "Light Skin Tones": هذي اللونين الاندر تون يجي ع  وردي على البشرة الفاتحة والاغمق بدرجة وحده فقط.

خمسة ألوان للبشرة الحنطيّة "Matte Skin Tones": تبدأ هذه المجموعة بلون البيج  وتنتهي باللون الذهبي تقريبا.

لون للبشرة السمراء "Mediterranean Tone": هذا اللون مع البشرة الداكنة بيكونون أصحاب ويعطي لوك حلو

 

 

تجربتي:

 

أول حاجة الدرجة اللي عندي أسمها  ورقمها :  Golden sun 06

وتندرج تحت المجوعة الثانيه اللي فيها خمس ألوان للبشرات الحنطية ولونها جاي ع برونز وأغمق مني تقريباً بدرجتين وجدا حابتها كـ لون ..

 

اللون غني  سلس وسهل بالدمج  .. فقط  كمية  صغيره و مناسبة راح تعطيك تغطية ممتازه ورقيقه ممكن ماحد يلاحظ انك حاطه فاونديشن بس راح يلاحظون ان بشرتك جميله وصحيه ...
 وما يسبب اي تهيج للي بشراتها حساسه لان خفيف وتتنفس البشره منه . 

التحكم في الدهون  والثبات : بالنسبة للدهون ما لاحظت إنه له فاعلية في هالناحية كانت بشرتي تدهن وخصوصا منطقة التي زون وماضايقني هالشئ لأن هذا طبيعة بشرتي ، بمعنى بعد مدة و تبدأ البشرة تدهن .

وفي حال حابين تتجنبون الدهون تستخدمون معه برايمر بتكون النتيجة أكيد أفضل ..

  وبالنسبة للثبات أطول مدة استخدمتها فيه ممكن حول 7 ساعات مو أكثر و كان ثباته جيد .. بدز يخف عندي في مناطق الوجة زي الخدين  وأطراف الوجة .. 

 

اللون مايتأكسد في حال بشرتك نظيفه وصافيه ومافيها عيوب أو تصبغات ولو كان فيك يفضل تصححينها بكونسيلو او مصحح برتقالي او اخضر .. وانا الحمد لله ما قلب لا رمادي ولا تأكسد معي  لان طبيعة بشرتي صافيه وفيها شوية هالات خفيفه .. مــع إن في بناات ذكروا لي تجربتهم وتأكسد معهم  وأتوقع هذا الشيء ع طبيعة البشرة ..

 

عندي مسامات عند الأنف غطاها لي وتعبت وماعاد تبين معه .. يعطيني لوك حلو ومخملي ومتوحد حبيته جداً ..

كثير يقولون أنه مناسب لمكياج يومي أو الصباحي  و أنا بصراحة شخصيا ماحسيته يناسب لانه التغطيه ومميزاته ماتساعدني استخدمه الصبح او بشكل يومي ..

كمان كثير بنات قالوا شبة فاونديشن قوتشي اند قابانا وبصراحة ماعندي علم بهالكلام واذا فعلا هو يشبهه ولا لا لأني ماجربته ولا أفكر أجربة بصراحة :) 

  طيب بالنسبة لإزالة الفاونديشن : وهنا نحط خطين ع هالكلام  لازم لازم تشيلون أي فاونديشن بشكل صحيح سواء خفيف أو ثقيل لان البشرة تتأثر اذا كانت المسامات مو نظيفة وكالعادة اشتكى بنات كثير من أنه يطلع لهم حبوب وأنا شخصيا ماشفت هالشيء لي فتره استخدمة وكنت اراقب بشرتي ومالاحظت أي تغيير وطبعا أي مزيل مكياج ينفع معه بشرط تنظفين كويس بشرتك بالغسول و الفرشة أو سكراب بعده حتى تتأكدي أن كل الرواسب بالمسام راحت و تمت إزالتها بشكل جيد .

 

 

الدمج : في التوزيع والدمج  أنا استخدم معه فرشاة سيقما F80  لانها تمزج الأساس بشكل ممتاز ولاتسوي خطوط ع الوجه أو استخدم فرشاه ريل تكنيك حقة الوجة رهيبه كمان .. او الاسفنجة زي ريل تكنيك وبيوتي بلندر بشرط تكون مبلله بشكل خفيف وشوفوا كيف يندمج  . او حتى اصابع اليد اذا كانت نظيفه ومعقمه ممتازه في الدمج وتعطي نتيجه حلوه ..

بشكل عام حبيت الفاونديشن و راح أكرر تجربة الشراء معه في حال مالقيت فاونديشن مناسبني..

 

 

  العيوب : مثل ماذكرت ممكن العيوب تختلف من وحده للثانيه من ناحية ان المنتج يقلب للرمادي

او تتحسس منه البشرة وتطلع حبوب

او الدهون الزياده او القشور الزياده بالنسبة للبشرة الجافة ..

 

التعبئة والتغليف: 

حجم المنتج : 30 مل صالح لـ 12 شهر من تاريخ الفتح .

مصنوع في فرنســــا

التعبئه والتغليف ممتاز نوعا ما خصوصا  لأنه على شكل عصار ، فــ مريحة في الإستعمال ولأن قوامه زي ماقلت موس او كريمي فـ حلو للمنتج انه يطلع سلسل وتحددين الكمية اللي تحتاجينها ووزنه خفيف  أعطي تقييم تغليف وتعبئه ٤\٥

 

أماكن توفر المنتج وسعره :

سعره بحدود ٩٠ ريال و متوفر في لايف ستايل و الصيدليات مثل النهدي و وايتس .

 

 

بكذا خلصت تدوينة اليوم  وأتمنى عجبتكم وأستفدتوا منها وياليت تشاركوني تجاربكم 

وجودكم بالآكيد يسعدني ويفرحني 💕

 

 

 

تنويه مهم : تم شراء جميع المنتجات المذكورة في هذه التدوينه من أموالي الخاصة. أنا ما عملت دعايه أو  برعاية / عوض / دفع لي لكتابة هذه التدوينه  وجميع الآرائي الخاصه بي على الا طلاق واتحمل رأيي ..