سلسلة لوك الصيف 2016 : تجربتي في صبغ الشعر مع صبغة لوريال باريس برودجي - ♡ Loreal paris Prodigy

مرحبا الســـــاع يا مرحبا..

كيفكم اخباركم وش مسوين ؟ الاجازه طويله والصيف شاد حيله فينا والرطوبه تذبح ومع ذلك مستمرين طلعات وسهر وتمشيات ربي يدوم النعمه علينا ويرزق كل شخص مايتمنى ..

المهم علشان الصيف والمناسبات جايه وزواجات وهيك نحب نغير اللوكات من شعر وبرونز وقصات وفاشن واللذي منو ..

الوكاد من الموضوع عرفتوا ايش بسوي :) بحورف بلون شعري كاعادتي القديمه .. كثير اصبغ بالبيت علشان في قرارة نفسي أن صبغ  البيت اهو وآخف ضرر من تبع الصالونات .. لاني مجربه صبغات وياويل حالي احترق شعري من السحب اللون والصبغات الفاتحه ..



وما ننكر ان حتى الصبغ اللي نشتريه مضر بس يبقى آخف ضرر << اعزي نفسي :) ههههههه

مع إني من فتره اخذت ع نفسي وعد وعهد اني خلاص ماعاد بصبغ شعري ابيه يرتاح ، لان الصبغات كانت ورا بعض وخفت شعري يندمر اكثر بس صراحه ماقاومت وخصوصا احب شكلي شوي ينور ويتجدد ومافي الا شعري حاطه حيلي فيه المسيكين هههه
لانه هو الواجهه للوجه يغير ويعطي انطباع اكثر اذا غيرنا فيه حتى النفسية تزين سبحان الله هههههه

تصيرين تحبين تتزينين وتتمكيجين وتلفحين بالشعر يمين ويسار ههههه معليش شطحت شويات برا الموضوع ..


طيب ندخل بصلب الموضوع :

عادة استخدم صبغات خاليه من الامونيا لانها تضر الشعر اكثر واستخدمت من غارنييه صبغات كثير ومره من كوليستون والحين من لوريال هذي ثاني مره بس هالمره اخذت من النوع الجديد ..
فا قلت اجربه ونشوف النتيجه ..
علما ان اطراف شعري فيها بقايا صبغ فا راح تختلف النتيجه عن اللي شعرها مو مصبوغ ..

الدرجة اللي أخذتها : ٧.١ فضي أشقر رمادي ..
 *عدد العبوات اللي استخدمتها : 1
 سعر الصبغة مو ذاكره بس عادة  بين 40 -60 ريال تقريبا أو أقل ..


من مميزات الصبغه اللي توعدنا فيها: أنها خالية من الأمونيا
يكشف اللون عن نفسه في عمق الآلياف ليعطي لون صافي
تعطي لون شعر غني ومذهل ولمعان وتغذيه مميزه
النتيجه راح تكون طبيعيه وملمس كالحرير ..
تغطي الشعر الابيض تغطية كامله ..
تكنيكها بجزيئات الزيوت تعمل على تعزيز عملية الصبغ ..

هذا والله أعلم عن مصداقيتهم :) بنشوف النتيجه في حقل التجارب اللي هو شعري


بس نصيحه من أخت : قبل الصبغة  وبعدها كمان ، اهتمي بشعرك و تغذيته بماسكات و حمامات زيت و غيره ..

عشان نقلل من حجم التلف الناتج عن الصبغ والجفاف اللي راح يصير له ..

  استخدمي أي زيوت منوعة ..و ماسكات سواء طبيعيه او جاهزه مثلا من مجموعة ماكاديميا من عند نزيه 

 اغسلي شعرك قبل وقت الصبغ بـ 24 ساعة على الأقل ولازم يكون جاف مافيه رطوبه او مويه  ..


أختاري لون يناسب لونك ولون بشرتك وطبيعة وملامح وجهك لا تشطحين بالوان ماتناسبك لانك راح تندمين:)

و جا وقت الجد   والصبغ ودهن الشعر بالبويه ههههههههههههههههه..

* قبل كل شي جهزي المكان المناسب أنا اخترت الحمام -الله يكرمكم - و لازم يكون ذو تهوية جيدة علشان ماتنحشرين لو فيه ريحه قويه ..  مع إن ريحة هالصبغه خفيفه ولطيفه وماتحشر زي باقي الصبغات ..
* سوي اختبار حساسيه قبل كل حاجه اذا كنتي أول مره بتصبغين في حياتك .. حطي نتفة صبغ ع الرقبه من ورا او خلف الاذن بس تحسين بحكه قويه او حراره توقعي انك راح تتحسسين ..
* كمان اختبار للون اللي حابه تصبغينه لازم تختبرينه اذا هو أول مره بتجربينه سويه في خصله خلفيه من شعر راسك علشان لو ماعجبك ماراح يبان واذا عجبك كملي شغلك ..

*دهني الجبهه و الأذن بفازلين أو زيت  , لأنه يسوي زي الطبقة العازلة و بالتالي ماتبقع هالمناطق  ..

*ألبسي بجامة قديمة عندك لأن بقع الصبغة صعب تروح من الملابس وهالشي صار معي وانعدمت ملابسي للاسف :(  ..

وفي أسوء الحالات خلي سفرة حول الرقبة ..

محتويات العلبه :
  (اللون, المظهر (الاوكسجين) , راس لعلبة المظهر, قفازات , عبوة كريم ملطف للشعر ، مقبض للخلط  ) ..

الطريقة :

أكيد مرفقة مع العبوة .. بس راح أكتبها باختصار ..
لازم يكون شعرك نظيف واهم شي جاف من المويه او الزيوت يعني مغسول بشامبو ونظيف ..

أضيفي عبوة  اللون + عبوة المظهر في القاروره  وتخلطينها بالمقبض  ,ثم  أغلقيها , و رجيها بشكل أفقي ثم اتركيها ترتاح مدة 30ثانية ..
أفتحي رأس  غطاء العلبة و استخدمي الرأس المرفق ..

بعد ما ركبتي الرأس ابدئي اضغطي منتصف العبوة و هي في وضع أفقي ..

يعني من المكان الشفاف مو تضغطي على الرأس زي اللوشنات و غيرها

بعد كذا استخدمي الصبغه  بتوزيعها ودهنها ع الشعر زي أي شامبو أو حمام زيت ..

أنا نصيحتي انكم تقسمو شعركم  ثلاث أقسام وتبدأين بالخصل بالترتيب علشان يتوزع المنتج كويس وكل خصله تاخذ حقها عدل و تبدأون من فوق لتحت وحاولوا تغطون الشعر كله بالمنتج وزعوه كويس وبالتساوي علشان مايبقع معاكم ويكون جهه غير عن الجهه الثانيه  ..


اذا كان شعرك مصبوغ ونازله الصبغة والجذور مافيها ابدأي بالاطراف ثم الجذور لان عادة الجذور تمسك اللون اسرع من الاطراف وتكون لونها افتح من باقي الشعر واحنا نبي نتجنب هذا الشيء ..


بعد كذا ماخلصتي وتاكدتي وزعتيه كويس  أتنتظري ٣٠ دقيقة و تغسلي شعرك بماء فاتر دون شامبو لحد ماتشوفين المويه اللي تنزل صارت صافيه  ..

أنا انتظرت أكثر من نص ساعه لظروف انشغلت شويات  و هذا غلط ..

و غير هيك نسيت و استخدمت الشامبو .. المفروض بس تغسلينه بموية وبعد كذا حطيت البلسم المرفق وتقريبا علبة البلسم تكفي استخدامين آذا شعرك مو طويل مراااا ..  وبعدها تشطفينها بالمويه لحد ما ينزل كل البلسم ..

و جري ع المراية أشوف النتيجة كنت متحمسة مراااااااا ع النتيجة و كانت كـ الآتي ..


أعطاني لون خفيف ولمعه  بني شوكلت بشعري محد راح يلاحظ فرق كبير باللون بس توقعت اللون راح يكون أقوى وأفتح من النتيجه اللي طلعت طبعا مافيه لمعه سلفر او فضي ابدا  وعندي شعر أبيض ما غطاه ابدا زي ماهو ...
النتيجه النهائيه مقبوله وراضيه عنها نوعا ما، بس تمنيت انها افتح واوضح من كذا حبتين ..

صوره تقريبيه للنتيجه  :






وبس والله هذي التدوينه لليوم اتمنى تعجبكم وتستفيدون منها لو بشيء يسير وراح آنزل بكرا التدوينه تابع لسلسلة لوك الصيف وراح يكون الموضوع يخص الجسم واي راح اسوي لوك فيه تابعو المدونه علشان يجيكم تنبيه للمواضيع الجديده  ولا تنسوني من الدعوات ..
وهذا فديو مبسط شرح عن الصبغه اتمنى ينال اعجابكم ولا تنسون تشركون بقناتي ع اليوتيوب والمدونه كمان  ..

آي لوووووف يووووووووو 

في أمان الله وحفظه