تجربتي لصبغ الشعر بالبيت مع صبغة indola مع بودرة تفتيح الشعر من ويلا

بسم الله الرحمن الرحيم ..

مرحبا بنات وعدتكم إني راح اكتب لكم تجربتي الثانيه في صبغ الشعر

هالمرة استخدمت صبغة مختلفة

بصراحة أول مرة أجرب هالصبغه وأساساً الصبغه هذي كلها مجازفة بالنسبة لي لاني بصبغها بنفسي .. صحيح مو أول صبغة أصبغ بنفسي .. لكن هذي المره اللعب بالعميق ههههه لانه فيها تفتيح وحركات ووقت اللعب كمان وقت غلط يعني لو خرب اللون بجيب العيد عيدين هههه عيد الفطر وعيد شعري ..

لكن خلاص براسي اصبغ بنفسي واذا طقت الفكرة
شعري علشان اشوف وش يطلع قبل اجازف بشعري كله ..

أول شيء جبت أوكسجين من اينيرجي وبصراحه اول مره استخدمه وهذا قوته ٦٪  هو سايل ولازم وضروري  علشان يثبت لون الصبغة  .. أخذته من نزية وكان عليه خصم اتوقع اخذته بـ ٦ ريال تقريباً ..

 ثاني شيء هو الصبغة أخذت من اندولا كمان هذي من نزية وسعرها رخيص وأول مره اجربها اخذت لونين واحد لون خلط لؤلؤي واللون الاساسي اشقر فاتح جداً لؤلؤي  ..
لون الخلط ينفع كثير للرينساج وتكلمت عنه في السناب يخفف اللون البرتقالي اللي يظهر بعد مدة من الصبغة او يخفف من لون صبغة راح تحطينها بشعرك يعني هو ماينحط لحاله لان لونه يجي ع ابيض او بيج  هيك شيء ..

وهنا صورت لكم ع جنب الكرتونه لو يهمكم معلومات عنها اذا حابين تشوفون مكوناتها والنسب اللي فيها ..
طبعا الصبغات كلها تحتوي ع امونيا وتعرفون مضارها مايحتاج اكتب عنها او اتكلم عنها و حتى الصبغات اللب يقولون ماتحتوي ع امونيا بصراحة اشك :) لان الامونيا هي اللي تثبت الصبغه او تساعد عليها .. يعني اللي مافيها مايكون ثباتها زي اللي فيها .. وعموما كل الاصباغ مضرة للشعر ههههه ..

طيب بدخل في التفاصيل وشنو سويت وطبيعة شعري .. أول شعري ناعم لكن مؤخرا تغير قوامة من كثر ما اصبغ فيه والعب فيه  و صار جاف من الصبغات أطرافة فيه بقايا صبغة والجذور مافيها صبغة والاطراف شوي جاي ع برتقالي فــ لازم تحاسبون ع لون شعركم قبل الصبغه علشان لا تتفاجأون من اللون اللي بيطلع لكم لو حاطين ببالكم لون معين وشفتوا طلع لون مختلف ..

طيب جيت خلطت الاوكسجين مع الصبغات بكميات متساوية ووزعتها ع شعري وانتظرت ٣٠ دقيقه وغسلته ووقت الغسل استخدمت بلسم علشان مايجفف شعري وينفش من الصبغ ..

وجففته واللون ابد ما مسك بشعري مجرد لون بسيط وبالاطراف فقط اما الجذور لسى مافيه لون مجرد لمعه بسيطه يعني كانه لون شعري لان لون شعري الاساسي بني داكن .. فـ تحطمت وقلت لازم اطلع لوون يعني لازم ..

فجلست ادور وابحث عن شيء وقررت اجيب اوكسجين بقوة اكثر لكن حسيت هذا الحل مو هو الصح ... لحد ما رحت بصيدلية بوتس وجلست احوس بالاوكسجين وشفت جنبة بودرة تفتيح الشعر من ويلا وانبسسسطت كثير واخذتها وسعرها مرااا رخيص بـ ٦ ريال بس !

لكن الكاشير قال لي تعرفين لها؟ هههه شكله خايف ع شوشتي بيوم العيد هههه قال يا تعرفين لها او عندك احد يعرف لها قلت له اوك عطني اياها اعرف ههههه وانا بكاشة من جنبها ابي اجرب ع نفسي ..


المهم أخذتها ورجعت البيت وانا كلي حماس وفعلا بدأت اجرب و ع نفس الخصلة الخلفيه ههه مخليتها حقل تجارب لحد ماصارت مسكينه وتقطعت والله من كثر ما اجرب عليها  ..
راح اكتب لكم الكميات اللي سويتها للتجربة علشان تعرفون تقيسون كيف للشعر كامل ،،

لكل ملعقة صغيرة مثلا من بودرة تحطون زيها من ماء الاوكسجين ومثلها صبغة وضيفوا عليها بلسم مهم علشان لا يتقطع الشعر  واخلطوهم زين  زين ووزعها ع طول لا تخلونها تطول .

نراعي الخلط يكون بـ ملاعق وطاسة بلاستيك مو معدن علشان مايتفاعل ويتغير اللون او شيء ،،

وننطر كمان من ٢٠ دقيقه وكل شوي نشيك ع اللون نفس اللي عاوزينه ولا لا اذا لسى خليه شوي .. واذا جيتوا تغسلونه كمان لا تنسون البلسم مره ثانيه لان الشعر بيجف كثير من الصبغات والبودرة فـ نحتاج ترطيب له ..


طيب نكمل بعد ما مرت الـ ٢٠ دقيقه تفتح شعري وصار لونه ذهبي ع تون برتقالي ! ابد ماعجبني كذا وخصوصا عيد وماقدر افتحه ازيد من كذا لانها لازم ع جلسات التفتيح ماينفع اطير لـ ٦ او ٧ درجات كذا راح ينحرق ويذوب شعري  ويتقصف .. وهالشيء ما ابيه ..

ع فكرة انا سويت الاطراف فاتحه اكثر من الجذور علشان كان ببالي اسوي اومبري ...  وسويته بالمشط العريض علشان يتوزع متساوي وبشكل عشواذي بنفس الوقت مايكون خط فاصل ....


ظليت هيك محتارة وش اسوي ومرت الليله وانا بس افكر .. لحد ماجا صباح العيد وخلاص لازم اجهز وانا شعري كذا !

فـ قلت لازم اصحح لونه ..

أخذت صبغة لونها احمر براغندي من كوليستون رقمها ٤\٦  وصبغة اشقر فاتح  وملعقتين من بودرة التفتيح و اوكسجين بقوة ٦٪  وبلسم ضروري وخلطتهم كويس ووزعتهم ع شعري كله ..
تركته بشعري حول ٣٠ دقيقه ع ما اخلص كم شغله  وغسلتة بشامبو وخلطته ببلسم كمان لان الشعر يحتاج ترطيب بعد كل هالعمايل هذي ههههههه ..

النتيجة طلع اللون مقبول وحلو نوعا ما كثير شافوني بعدها عجبهم وسألوني عن الصبغه واسمها صار اشقر مموج بلون احمر ..

لكن مو معناها عاجبني ونال ع رضاي لا والله كان ببالي لون غير هذا لكن صارت الظروف كذا ..
ع فكرة ترا اللي صار لشعري مو معناها ان الصبغة سيئه ! لا أنا قرأت عنها ريفيو قبل هي ممتازه لكن ممكن تجربتي وطريقتي فيها غلط اني ماخليت شعري يرتاح ابد ..


من الاخطاء اللي طحت فيها:  ان انعدم شعري بسبب تكرار الصبغ عليه وانا اجرب ..
البودرة تزيد الجفاف ..
شعري تأثر بقوه وصار يطيح ويتساقط للاسف ..
الاطراف عندي ابداً مو صحيه .. احسها تتقطع وتتقصف وتنقص بالنص .. وهالشيء حزنني .. لكن هي تجربة اهم شي سويت اللي براسي :)
خلاصة كلامي يعني من بعد هالتجربة مو هي النتيجة المرضيه لكنها مو هذاك السوء و راح استمتع فيها شوي وبعدها راح اقص شعري علشان اتلخص شوي من التقصف واللون اللي بالاطراف ..

وبس هذي كانت تجربتي وكانت مجازفة جدا قوية بصراحة خصوصا اني سويتها بيوم العيد لان فعلا خفت اجيب العيد في شعري واللون الاحمر كان مجازفة والبرتقالي مجازفة اكثر واكثر ..

فـ الحمد لله ع كل حال هي تجربة علشان المره الجايه اعرف وين الاخطاء ووين النقاط الصح و حلو يكوني عندي تجارب بالشعر وخصوصا الصبغ .. لاني احب تلوين شعري بين فتره والثانيه ،، ومسكين هو اللي ماكلها ههه

واتمنى تاخذون ولو فايدة وحده من تجربتي وكتبتها بس علشان اعرض تجربتي ممكن البعض يقول مالها داعي او مو مفيدة لانها تجربة غير موفقه او ناجحة لكن اعتبرها بحد ذاتها اني جربت او نفذت فكرة شيء جيد بحد ذاته ..

القاكم في تدوينه جديدة انشاء الله 

وانشاء الله اكتب لكم تجربة جديدة ناجحه وموفقه وافضل من هذي التجربة بمراحل ..