سلسة باليتات ظلال العيون .. باليت مورفي ... Morphe N35

الســـلام عليــــكم ..


يا مرحبا باللي لهم القلب يهلي وادعي عنهم الشر يولي ..

كيفكم حبيباتي ..

هالفتره انا اكتب تدوينات كثييير وكلها مراكمتها بالمسوده المشكله اني كاتبتها ومخلصه بس ناقصها شي  واحد ..
اللي هو الصور ،، كسلانه اصور ،،
بس اليوم تنشطت وصورت كم بوست فا انشاء الله بتشوفن كل جديد ،،

ماعليكم من الهرجه اللي فوق راح اكتب لكم اليوم ريفيو عن باليت من باليتات الشدو من ماركة مورفي برشز ،،
سبق وتكلمت عنه بالانستا لكن حسيت ما اعطيته حقه كثير ..
قلت لازم اتكلم عنه بالتفصيل مع سواتش وغيره ،،
فا يلا نبدأ

أول حاجه راح اقولكم ان عندهم مجموعه باليتات بدرجات الوان كثييييييره وكلها مرقمه بارقام وكل باليت له طابع خاص له .. فيه باليتات تجي كلها مطفيه او لمعه او تجي مخلوطه لمعه ومات يعني ع حسب اختياراتكم بشكل عام البراند جمييل ..

اللي بتكلم عنه اليوم اسمه :N35 

فيه باليت الوانه عجبتني بس ما اخفيكم السر ان هذا اكثر واحد سحرني وحبيته من أول نظره وقلت لازم أخذه حسيته يغني عن اغلب الباليتات ..

درجاته جميله وتستغلينها لوجهك كله .. اييه والله لوجهك كله منها شدو وللحواجب وبلشر وكونتور وايلاينر  واضائه لتنوير مناطق اللي تحبينها

شفتوا قد ايش كامل مكمل هههههه لا الصدق يعني تقدرين تمشين فيه مكياج كامل بس جيبي كريم اساسك وبلشي شغل ..

الباليت فيه ٣٥ لون شدو الوانه كلها مات (مطفيه بدون لمعه)  يجي بباليت اسود بدون مرايا حجم الشدو الواحد اعتبره كبير وكويس .. مقارنه بسعره في الموقع ..

الباليت عموما ينفع لكل الاوقات للوكات صباحيه ولوكات سهره اذا كنتوا من النوع اللي تحبون المطفي
مــــــن مواصفات الباليت :

الباليت نفسه فيه الوان ترازشن (انتقاليه للدمج) للكريس  وصف كامل كله الوان بيج تنفع اضائه لتحت الحاجب ولمدمع العين

الالوان قوويه والبقمنت كووويس وواضحه جدا بدون برايمر والاحلى انها سهله في الدمج وماتتعب وثابته لمدة طوويله تخف شيء بسسسيط بعد فتررررررره ..

تدرجات الالوان في الباليت تخليك تبتكرين لوكات جديده وابدا ماتملين من هالالوان ..

فيها عيب صغير ان الايشادو بعض الالوان فيه يتناثر وانا شخصيا ما اشوفه عيب كبير وما اهتم له كثير لان اغلب الايشدوهات كيذا ..





الباكجنج مثل ما انتوا شايفين مراااااا عادي بلاستيك وهيك باين انه رخييص بس مو مهم كثير مع اني تجذبني الشركات اللي تهتم بالتعليب تخليك غصب تشترينه خخخخ وكمان كثير مايحبون حجمه علشان شويات كبير علشان مايقدرون ياخذونه معاهم بالشنطه او بالسفر بس بالنسبه لي عادي لاني نادر اشيل معاي باليت شدو ..

ما يحتوي ع اسماء او ارقام للشدوهات بس اتوقع موجوده بالموقع حقهم .

اذا ماعندك ولا اي باليت هذا الباليت بيغنيك عن اي شي ثاني..👌🏻

يغلب عليه الالوان الترابيه والبرتقاليه وتدرجاته والبني المحمر

راح اتكلم شوي عن الوان الباليت بشكل صفوف أفقيه  وهالشيء من وجهة نظري انا 

عندنا خمس صفوف افقيه :

الصف الأول : الالوان فيه  من درجات البيج من الفاتح للاغمق ذكرت انها تنفع تنورين فيها تحت الحاجب او مدمع العين او حتى كا لون اساسي ع الجفن المتحرك ..

الصف الثاني : فيه درجات البني والبرتقالي ولون بنك وفيه لون سوفت براون حبيته ينفع لاي لوك تحطينه ..

الصف الثالث : كمان فيه من درجات البني والعنابي وفيه لون قررري ( رصاصي )

الصف الرابع: نجي لدرجات البني الاغمق من اللي قبل تنفع لزوايا العين الخارجيه او تستخدمينها لون دمج

الصف الخامس والاخير : هذي اغمق الالوان بالباليت كله من درجات الاسود والبني الداكن ولون بني محمر جميييل يعطي نظره جميله للعين اذا استخدمتو هاللون يعطيها دفى و حلاوه .. 

كمان هالصف استخدمه لرسم الحواجب  الا في لون راح يناسب درجة حواجبكم وتقدرون تقتصدون من هالباليت ..

طيب هل يستحق انك تشترينه ؟ نعم بكل تأكيد لان الالوان اساسيه وبتحتاجينها طول ما انتي تحطين شدو لان يجمع الالوان الانتقاليه ولون للجفن الثابت وهذي الالوان ما تروح موضتها ابدا ابدا ابدا ..

..سبق وقلت ان الالوان المطفيه تنفع للي عندها تجاعيد او خطوط بعينها وما يصلح لها الشيمر واللمعه لان مثل ما انتوا عارفين ان اللمعه تسوي فوكس للتجاعيد بشكل اكبر و مو بس هيك الا تطلع الجفن مجعد اكثر من الحقيقه ..

طيب نجي بالنسبه لسعره بالموقع : حول ٧٥ الى ٨٠ ريال سعودي ..

الموقع حقهم يقبل فيزتنا لكن ما يوصل دايركت تحتاجون بريد امريكي علشان تشحنون منه وغير هييك الموقع نفسه يطوول كثير ع ما يطلع الطلب

سعره عند التاجرات بالانستا حول ١٥٠ ريال

أنا طلبته من حبيبة قلبي موني وهذا حسابها للي حاب يتفرج mony_store@

اتمنى عجبتكم التدوينه و تستفيدون منها وتنال رضاكم

دمتم بحب

مع السلامه ..