تجربتي الليزر المنزلي فيليبس لوميا | SC1997 philips lumea

السلام عليكم ورحمة الله وبركاته ،،، 

 في هذا البوست حابه أتكلم عن تجربتي مع جهاز تقنية  الوميض الضوئي  من فيليبس. 

Philips Lumea (IPL)

محتويات التدوينه :

•  أول شي إيش هو تقنية جهاز فيليبس لوميا ؟
•  مميزات جهاز فيليبس لوميا .
• عيوب جهاز فيليبس لوميا 
• السبب في أختياري جهاز لوميا خليته ليه خياري الأول  وايش بالنسبة للعيادات  ؟  
•  طبيعة الشعر ولون الجلد:
• آلية عمل جهاز فيليبس والنتائج المتوقعه.
•  طيب كيف أستخدم الجهاز وإيش الممنوعات وايش المسموح ؟ 
•  هل فيه أعراض آو آثار جانبيه يسببها الليزر ؟ واذا ضربنا الشعر الموجود أو الغير محلوق هل يخرب الجهاز أو يتأثر؟
• طريقة استخدام الليزر المنزلي فيليبس بالفديو .
• تجاربي وجلساتي مع  جهاز فيليبس .
• طريقة العناية بالجهاز  ..
• أسعار جهاز فيليبس لوميا وأماكن الشراء.

*أول شي إيش هو تقنية جهاز فيليبس لوميا ؟
- جهاز يقوم بمنع نمو شعر الجسم والوجه وليس إزالته نهائي  عن طريق ارسال نبضات ضوئية خفيفة مكثفه  الى جذور الشعر فيخمل الشعر ويتوقف نموه ( الضوء النبضي مختلف عن الليزر )

- الجهاز هذا الاصدار له رأسين الاول كبير لجميع انحاء الجسم  والثاني صغير اكثر امان مخصص للوجه و للمناطق الحساسة .. بعض الاصدارات الجديدة لها ثلاثة رؤوس والبعض أربعه ..

- له خمسة درجات حرارة يعتمد تحديد درجة الحرارة المناسبة على لون البشرة ولون الشعر

- الجهاز من هذا الاصدار يشتغل بالتوصيل المباشر بالكهرباء يعني مايحتاج شحن وانتظار مدة يعني تكملين جلستك كامله .. الاصدارات المختلفه الجهاز ينشحن وكل الاصدارات نفس الفاعليه ..

الأختلاف في الرؤوس - توصيل الكهرباء أو الشحن - تقبل الجهاز لبعض ألوان البشرة خصوصا الاصدارات الجديدة ..

أغلب الاصدارات منه فيه تقنية أو مستشعر حساس للون البشرة 

مميزات جهاز فيليبس لوميا:

• يحتوي على عدد الومضات الضوئية 250 الف ومضة ، يكفي تقريبا  لـ 5-10 سنوات استخدام ..
• مو مؤلم نهائي مجرد لسعات محتمله حتى مع استخدام اعلى مستوى..
• أغلب الاصدارات تحتوي  على عدسة  كبيرة بحجم 4 سم تستخدم لمناطق الجسم ،وعدسة صغيرة للمناطق الحساسة والوجة ..
• ما يحتاج لقطع استبدال يعني ما تحتاجين لتكاليف إضافية ..
• فيه منه نسختين سلكية ولا سلكية للاختيار حسب إحتياجكم ونسختي اللي عندي سلكية .
• ما يطلق الومضات إلا إذا كان وضع الجهاز صحيح و عامودي  على الجسم..
• سهل جداً في الاستخدام وخفيف ..
• بكل جهاز مروحة تبريد فـ  ما له داعي أن الجهاز يكون حار أو يحتاج راحة ..
•  في حال  الجهاز شغال لمدة دقيقة بدون استخدام يطفي لحاله ..

عيوب جهاز فيليبس لوميا:

• ما ينفع إستخدامه على البشرة البنية الغامقة والسوداء. 
• ما ينفع استخدامة على الوان الشعر الفاتحة كالاشقر الفاتح او الاحمر او الرمادي او الابيض والوبري .
• ممكن الاماكن البارزة زي عظمة اليد أو الثنيات والصفطات بالجسم صعب الضرب عليها لكن ممكن تحلينها اما استخدام العدسة الصغيرة أ شد الجلد مكان الصفطة علشان يضرب .. 
• الاماكن اللي فيها بقع غامقة زي بين الفخذين أو الابط اذا كان غامق ماراح يضربها وعلاج هذا الشي تهتمين بالمنطقه وتفتيحها لحد ما الجهاز يتقبلها ..
• أصحاب الاجهزه اللاسلكية لازم يشحنون الجهاز ع الاقل كل ثلاث شهور حتى مع عدم الاستخدام ولا البطارية راح تخرب ومالها اي قطع غيار مع الاسف ولازم تشترين جهاز جديد

*السبب في أختياري جهاز لوميا خليته ليه خياري الأول  وايش بالنسبة للعيادات  ؟

أخذت فيليبس لوميا بسبب شهرته الواسعه وبصراحة دخل مزاجي أكثر من أجهزة ثانيه مثل تريا وميليسا و بروان و بيبي ليس و كثير أجهزه ليزر صارت متوفره بالفترة الاخيرة .. يعني بإختصار آرتحت له نفسيا ..

أما عن العيادات :

لعـــدة  اسباب: الاول تكلفة العيادات  اكثر بكثير من تكلفة شراء الجهاز الجلسة الوحده تعادل قيمة جهاز ..
 ثانيا الاجهزة الموجودة في العيادات حرارتها عالية والكثير يقولون تأالم ويستخدمون تخدير موضعي وكمان  أذا ماكنتي تحت يد خبيرة وشاطرة  ممكن تصاب  بشرتك بالحروق .. اما بالنسبة لجهاز لوميا فهو مخصص للاستخدام المنزلي وآمن مايحرق الجلد الا اذا استخدمتيه بشكل خاطئ .. كل الي تحتاجينه انك تقرئين التعليمات المرفقة بعناية قبل الاستخدام ..

اخر سبب الي هو الخصوصية موضوع اني أكشف بعض المناطق صعبه شوي علي وحتى لو كان الاستخدام ذاتي ما احب غير بيتي :) 



*طبيعة الشعر ولون الجلد: 

أول شيء لازم تاخذون في الحسبان لون شعركم وكثافته وكمان لون الجلد لان الليزر العيادة أو الجهاز مهم يناسب معه ولا راح يسبب حروق للبششرة  أو ممكن ماراح يستجيب بتاتا زي الشعر الوبري ماينفع معه ابدا..
أنا طبيعة شعري أسود سميكة متوسط لا إني مشعره بشكل مبالغ  ولا خفيف يعتبر وسط كا كثافة لكن عندي شعر بكل مككان هههه حتى اصابع يدي فيها :(
المهم لون جلدي حنطي تقريبا فاتح او متوسط ..
ودرجة الضربه استخدم بين ٤ و٥
الجهاز الحمد لله ناسبني وهالشيء مذكور بجدول ع كرتونة الجهاز راح تشوفين يناسب أو لا ..

هذا صورة الجدول تقدرون تشوفون من قبل تشترونه ..

* آلية عمل الجهاز والنتائج المتوقعه :

الليزر عموماً التكنيك حقه هو يبطئ نمو الشعر مو يمحيها أو يشيلها لك للابد!

التكنيك هذا راح يخلصك  ويفكك من الشعر بنسبة كبيره ومريحة عن الم النزع بالحلاوه او بعض الاجهزه والواكس والفتله وغيرها من طرق ازالة الشعر التقليدية ..

 وهل راح تتوقعين انك دفعتي مبالغ سواء على جلسات أو جهاز اشتريته غالي خلاص يعني مفروض مافي ولا شعره !!
 اذا التفكير كذا فـــ هذا اكبر  غلط ترتكبينه في حقك .. لان الليزر مو سحر ابدا هو وسيلة مريحة في التخلص من الشعر مو ازالته نهائي !

 الليزر أو النبض الضوئي راح يحرق البويصلات اللي تعرضت للحرق وتبقى داخل المسام  وراح فعلاً يخمل نمو الشعر وماعاد تشوفينه ع سطح الجلد ..

 لكن ممكن راح يظهر لك شعر ثاني بنفس المكان أو بمكان جديد وما كأنك سويتي شي  لييييه ياترى؟!!

لأن الجسم بطبيعة الحال يتغير وهالتغير ممكن انتي مالك دخل فيه او خارج عن ارادتك مثل تغيير

الهرمونات أو الحمل أو بعض العلاجات اللي تكثر او تزيد من نمو الشعر  أو بسبب انك  تركتي جلسات الليزر راح ترجع تتنشط الخلايا لان انتم عارفين ان جسمنا عبارة عن خلايا حيه.. 
وهو المفروض حتى لو اختفى تماماً ماطلع تبقين مستمره ع الجلسات كا نوع من التأكيد والرتوش زي مايقولونها عامة الناس علشان ماعاد يطلع ..

 طيب هل ينفع استخدم الجهاز من البداية ولا احتاج أزور عياده قبل؟  هذا أكثر سؤال انسئلت اياها وقت طرحت الموضوع في السناب شات مع البنات 
 
لا طبعاًا مو لازم ابد ابد تزورين عيادة ممكن تبدأين بالجهاز  لكن باختلاف سرعة النتيجة
يعني ممكن جلسة عيادة توازي جلستين أو ممكن ثلاث لو كنتي تختارين قوة ضرب خفيفه بالجهاز ..
فـــ اللي مستعجلة تبدأ كم جلسة عيادة وتكمل بالجهاز واللي تحس عادي ماهي مستعجلة تبدأ طوالي بالجهاز وراح يعطيكم نفس النتيجة مع الاختلاف الزمني زي ماقلت .. 

شخصياً : سويت جلسات في العيادات لكن ما استمريت وهالشيء يمكن حوالي قبل سنه فا كان قبل استخدامي للجهاز ما كأني مسويه شيء الشعر زي ماهو لاني ما انتظمت معهم ..


السؤال الثاني اللي تكرر كثير كثير هل ينفع اكثر من شخص يستخدم الجهاز ؟ وهل تكفي ضربات الجهاز للشخصين؟

ايوه نعم ينفع بشرط ان يكون لون الجلد ولون الشعر ضمن المسموح في الجدول وكمان ضربات الجهاز تكفي لان فيها ٢٥٠٠٠٠ ضربة فا يمديكم تستخدمونه ..


سؤال انطرح كمان كثير والآغلب يستفسر عن هذي النقطة : لو طلع الشعر بين الجلسات وكانت عندي مناسبه مهمه  كيف أزيل الشعر هل بالشفرة أو بطرق ثانيه مثل الشمع أو الحلاوه ؟

زي ماقلت سابقا بعد استخدامك لليزر سواء الجهاز هذا أو العيادة انسي تماماً اي طرق ثانيه لازالة الشعر فقط الشفرة او الحلاقه هي المسموحة لانك اذا استخدمتي نزع الشعره معناها يابوزيد ماغزيت يعني ماسويتي شيء واختربت نتيجة الجلسات اللي سويتيها ..
فـ لو كان عندك مناسبة أكيد احلقي بالشفرة عادي ..

* طيب كيف أستخدم الجهاز وإيش الممنوعات وايش المسموح ؟

طبعاً اول شي البشرة ماتكون ملتهبه آو فيها حروق أو أي نوع من الالتهابات واللي ممكن يصير لها مضاعفات ..
من الممنوعات قبل وأثناء عمل الجلسات : التقشير بنفس يوم الجلسه او عمل حمامات مغربيه او اي نوع سكراب وفيه تهيج للجلد ابتعدي عنه ع الاقل قبل بيومين ..
التسمير والتان تبتعدين عنه نهائي نهائي لانه ممكن يحرق البشرة وتقل معك فعالية الجهاز ..
كمان أماكن الوشم والشامه او حبات الخال ابتعدي عنها .. ولو كان فيها شعر لونيها بالكحل الابيض واضربي عليها ..

ممنوع تتعرضين للشمس مباشرة ولو استخدمتيه لوجهك استخدمي سن بلوك 

ممنوع ممنوع ممنوع استخدام وسائل نزع الشعر من الجذور كامل مثل الحلاوه والواكس و رأس الة نزع ولقط الشعر الا اذا كان الرأس تبع الحلاقه مو النتف .. لانك لو استخدمتي احد هالطرق اعرفي انك جالسه تسوين ع الفاضي وماراح تستفيدين ابدا ابدا ..

ممنوع ممنوع ممنوع استخدام الجهاز للحوامل والمرضعات 

قبل الجلسة  مهم تكون بشرتك خالية من اي كريمات او عطور او مرطبات او زبدات الجسم تفاديا للحروق وكمان علشان الضوء يوصل للبويصله كويس ومايأخر من النتيجة .. ممكن استخدام كريمات مخدرة للالم مع اني شخصيا مااحس له اي داعي او ضروره ..

كمان من الافضل عدم استخدامه في ايام الدورة الشهريه او قبلها كم بيوم لان طبيعة البشرة تتحسس وتغير بهالايام ..

 المسموح أثناء عمل الجلسات : ممكن استخدام كريم مرطب طبي او بخاخات مرطبه ومهدئة للبشره  او مراهم مثل فيوسيدين او ميبو في حال لاسمح الله تعرضتي لحرق او تهيج .. الترطيب مهم ممكن تحسين بجفاف استخدموا كيو في او سيتافيل او بيبناثين ..

ممكن عمل اي حمام مغربي او تقشير عميق او اي نوع تنظيف بشرة بعد الجلسه بـ ٤٨ ساعه ع الاقل

* هل فيه أعراض آو آثار جانبيه يسببها الليزر ؟ واذا ضربنا الشعر الموجود أو الغير محلوق هل يخرب الجهاز أو يتأثر؟

ااامممم تقريبا لا مافيه أعراض  مجرد تهيج أو احمرار لحظي أو حكة بسيطه .. يعني بس وقت اللي ضربتي بعدها بدقايق يختفي وتقدرين تبردينها بماء بارد أو قطع ثلج
ولا يسبب أي بقع أو هالات ولا حبوب بالعكس من كلام الشركة أنه يحسن البشرة ويسكر المسامات بس لسى أنا ماشفت هالشيء ..

بالنسبة للشعر الغير محلوق ابدا ماراح يخرب الجهاز واساسا الشعره ماراح تتأثر بالضربة مجرد راح تشوفينها زي اللي احترقت وتغير شكلها اما بويصلتها ماراح تتاثر لازم تحلقينها علشان يوصل الضوء لها


طيب نجي للاستخدام وتجربتي مع الجهاز وراح يكون القسم يتحدث كل جلسة راح أسويها :

أول حاجه قبل ما استخدم الجهاز أقشر جسمي قبل بيوم بمقشر واليوم اللي بعده أشيل الشعر كويس بالشفرة وتأكدوا أن الشفرة نوعها زين وكويس و ماتقص الشعره بالنص وتخليها ع سطح البشرة  أو بجهاز براون برأس الشفرة مو النتف انتبهوا !!
ولازم أتأكد أن كل الشعر راح وماباقي منه وبس اخلص أجفف جسمي وأبدأ بالجلسة 
أول شيء أستخدم قلم كحل أبيض أو بيج وأخطط جسمي تقريبا ع حجم عدسة الجسم علشان أعرف الاماكن والمناطق اللي ضربتها وأحاول المكان اللي ضربته مره ما أعيد عليه ثاني 

الجهاز يستخدم للجسم كامل اليد والرجل والبطن والظهر والوجة كمان الا منطقة ماحول العين والحواجب ..

 
طريقة الاستخدام بالتفصيل وشرح للجهاز ومحتويات البوكس وعلشان تتعرفين ع الجهاز بشكل أوضح  بيكون بالفديو باليوتيوب 
ولا تنسون تضغطون اشتراك علشان تشوفون ل شيء جديد ..

 هذي صورة صورتها لكم  من كتيب التعليمات للوقت المستغرق لكل منطقة كم تحتاج علشان تخلصين كل منطقة من الجسم

الجلسة الأولى:
أول ما استخدمت الجهاز بصراحة خفت ما اكذب عليكم بس قلت خليني اجربه لاني ما بقى شي ما جربته وفعلا استخدمته لكامل جسمي ماعدا البطن والظهر .. استخدمت العدسة الكبيرة للجسم والصغيره للمناطق الحساسة لانها فيها عدسة تمنع اي اشعه فوق البنفسجيه
كــ أول مره ماشفت أي تغيير أبدا طلع الشعر زي ماهو ..

الجلسة الثانية:
سويتها بعد الجسلة الاولى بأسبوعين وكمان النتيجة لا تذكر مجرد تأخر بسيط في نمو الشعر لكنه طلع بس حسيت الشعره أضعف سمك من قبل .. ومنها جربت العدسة الكبيرة للمناطق الحساسة قلت أسرع واختصار للوقت لكن ماقدرت أكمل فيها حسيت لسعتها بهالمناطق أكثر فا كملت بالعدسة الخاصه  فيها ..

الجلسة الثالثة:
 كمان سويتها بعد الجلسة الثانيه بأسبوعين وبدأت أشوف النتيجة أوضح أكثر تأخر النمو في بعض المناطق وصار عندي بقع فيها شعر وبقع لا مافيها وبعضه يطلع ويطيح هنا بدأ الحماس أكثر إني أستمر  خصوصا اليد والاصابع تخلصت من الشعر تقريبا ماعاد يطلع عليها والذراع  النتيجة مرضيه ..


الجلسة الرابعة:
أما هذي الجلسة ماطولت عن اللي قبلها سويتها بعد أسبوع و ع فكرة اذا جلدك يتحمل عادي تسوين الجلسات أسبوعيا واذا تحسين ماتقدرين عادي كل اسبوعين أو عشر أيام 
بعد هذي الجلسة منطقة الاندر آرمز خف بشكل ملحووووظ وبقى شعيرات بسيطه واليد ورجولي كمان صار متناثر  يعني صارت الجلسة ممتعه أكثر ومنطقة البكيني صار أقل الربع تقريباً ..  ولاني جهاز يتوصل بالكهرباء ع طول مو شحن أخلص جسمي كله بنفس الوقت ما أنتظر يشحن ..


الجلسة الخامسة : 
حاليا الجلسة لسى اليوم سويتها فا باشوف بعد اسبوع او اسبوعين كيف النتيجة راح تكون 



الجلسة السادسة: 




الجلسة السابعه:

طيب هل أنصح فيه :

امممم حاليا ما اقدر اعطي انطباع أخيرا لكني أنا حبيته وماحسيت ندمت أني اشتريته فـ اذا خلصت كل الجلسات وشفت النتيجة النهائيه راح اقول لكم اذا انصح فيه او لا ..
لكن لازم تحطون هالشيء في بالكم انه يحتاج صبر وانتظام وتتحملين بطء النتيجة لان زي ماقلت ابطأ من العيادات ..

* طريقة العناية بالجهاز :

العناية بالجهاز جداً سهله وماتحتاج أي شي فقط تجي با البوكس قطعة قماش لتنظيف العدسات بعد كل استخدام لازم تنظفينها  فقط وحافظي ع الجهاز من الماء وتعريضة لحرارة عاليه ..
أصحاب فيليبس اللاسلكي اشحنوا اجهزتكم بين فتره وثانيه علشان تحافظون ع حياة البطارية

• أسعار جهاز فيليبس لوميا وأماكن الشراء: 
• أماكن الشراء صار متوفر بكل مكان من صيدليات ومواقع ومتاجر آلكترونية وصار يصير علية عروض قوية وكل اصدار يختلف سعره حسب عدد الملحقات وعدد الومضات واذا كان سلكي او لا .. أنا أخذته من متجر بالانستا اسمه درة الجوف متجر متخصص فقط لبيع اجهزة فيليبس واخذته وقت عروض نهاية السنه الماضيه ب  ١٧٥٠ هذا حسابهم بتويتر
•  https://twitter.com/durrat_aljouf?lang=ar 

وهذا حسابهم بالانستا

https://www.instagram.com/durat.aljouf/


وبس هذا التدوينة أتمنى وفقت في كتابتها وكانت شاملة لكل شيئ حاولت أجمع اغلب المعلومات وجاوبت اغلب الاسئلة اللي وصلتني من البنات ولو في سؤال اكتبوة وراح أضيف إجابته في التدوينة وتابعوها بين فترة والثانية علشان تشوفون تحديثاتي للجلسات ..
اشوفكم في بوست جديد إنشاء الله
في أمان الله  وحفظة ..
معسلامة :)