فاونديشن من بورجوا هيلثي ميكس | Bourjois Healthy Mix Foundation

السلام عليكم و رحمة الله و بركاته 

شحالكم و كيفكم اليوم ؟. إن شاء الله كلكم بخير ومستمتعين بالاجازه ❤

تدوينتي اليوم بتكون عن تجربتي لكريم أساس (فاونديشن) انشهر كثييير بالفتره الأخيره بين البنات و اغلب الارتست صاروا ينصحون فيه ويستخدمونه ع إن المنتج مو جديد ,,,نازل له فتره و هو فاونديشن هيلثي مكس من برجوا .

في البداية بكتب لكم ايش يوعد  المنتج  والنتايج المتوقعة منه.

١- يعطي لمعة صحية و بشرة صافية ولوك ديوي .

٢- يعطي البشرة إشراقة و مظهر صافي وثبات  حتى 16 ساعة .

٣- الكريم معزز بفيتامينات معالجة من الفواكة الطبيعيه .

٤- من مكوناته المشمش لتوهج البشرة. البطيخ للترطيب.التفاح لحماية شبابك.

٥- قوامه طري  و يندمج وينمد ع البشرة  بسهولة  يعطي تغطية صافية والاهم رقيقه مو ثقيلة و مريحة للبشرة .

٦- سبقأن المنتج هذا  حصل ع جائزة أفضل منتج.

طيب نجي لتجربتي الشخصية  للمنتج :

أول حاجه أنا بشرتي مختلطة الى دهنية خاليه من الحبوب والتصبغات .. ما احتاج تغطية فل كفر ابدا ..

الجو اللي حولي أو المنطقه اللي عايشه فيها رطبه وشديدة الحراره وهذا يساعد ان بشرتي تدهن بوقت أسرع

وممكن تأثر ع فاعلية المنتج يعني يختلف حسب تأثير الجو 

يعني اللي بمنطقه بارده او رطبه او جافه مو مثل اللي بمنطقة حاره  او ايا كان الجو المحيط فيكم لازم تحسبون حساب هالشيء ..

سابقا انا كتبت بحسابي  بالانستا ريفيو عن المنتج وحسيت هالفتره اني ما اعطيت المنتج حقه فا قررت انزل عنه ريفيو كامل لتجربتي معاه...



كمان كنت مجربته أول ما نزل وجربت درجه وحده وبعد فتره اشتريت درجه ثانيه وحكمت عليه اكثر

بتشوفون الحين صوره اخذتها من النت لسواتش الفاونديشن وراح اقولكم الدرجات اللي انا استخدمتها 
وعلشان اكون وضحت كل شي انا بشرتي حنطيه مايله نتفه ع صفار وانا طبيعتي احب الالوان الدافيه والبرونز وهيك





هذي تقريبا أسماء الدرجات وفيه لون كمان اسمه دارك برونز بس مو موجود بالصوره

 اول لونين للبشرات الفاتحه واخر ثلاث الوان للبشرات الحنطيه والسمراوات يا لباهم والله
افر حاليا اخذ الدرجه لايت برونز اخر وحده حسيتها رهيبه

المهم انا استخدمت وجربت  درجتين اللي هم فانيلا 52 vanilla  والدرجه بيج 54 beige

اول حاجه استخدمتها هي درجة الفانيلا لونها تناسب الحنطاويات الفاتحين الاقرب للبياض كانت مناسبتني بس تكه فاتحه شوي علي  كنت مو راضيه ع النتيجه فا اكنت استخدم معاه بوردة برونز علشان اضبط اللون اكثر ..


بعدها استخدمت درجة البيج ويا سلاااااااام هالدرجه كانها مصنوعه علشاني ههههههه بقووه مناسبتني نفس لوني بالضبط فا حبيته اقوى شيء واذا استخدمته دايم يسئلوني عن ايش مستخدمه ..

ومرات اخلط الدرجتين مع بعض بس اخلي البيج هو الغالب ع الفانيلا وهم يطلع مضبووووط واللون جميل

هذا بالنسبه للون على بشرتي .. نجي للنوع اولا هالفاونديشن يناسب البشرات الجافه الى المختلطه اللي دهنيه ماراح تحبه لانه بيدهن بسرعه وبيقطع عليها الا اذا بتثبته ببودر يضبط
يعطي لوك ديوي او ساتن لووك صحي مو مغبر ولا جاف يعني طلتك بتكون طبيعيه .. واذا بشرتك ناسبها ماتحتاجين تثبتينه ببودر لانها يثبت ويتحول شوي ع بودر ..

 ومن مميزاته انه سريع ينمد ويندمج ع البشره وهالشي فعلا وزعيه ع وجهك وادمجيه باسفنجه مبلوله وشوفي النتيجه كيف..

اكيد بتسئلون هل يناسب يومي او مناسبات؟؟

راح اقول لكم يناسب الاثنين اي والله يناسب يومي لانه خفيف والبشره تتنفس وحسب ماهو مكتوب انه فيه اشياء

 طبيعيه .. وراح يناسب السهرات للي تحب الفاونديشنات الخفيفه واللي ماعندها لا تصبغات ولا كلف ولا تحتاج

 اساسا تغطيه عاليه فا يصلح انا استخدمه في مناسبات وزواجات وقسما بالله زي الحلاوه معاي ..

أما هو يغطي الكلف والتصبغات  والاثار البسيطه  ..

مع ان في ناس سبق وذكروا تجربتهم انه يكتل في الوجه ويبقع وناس قالوا يختفي وتتشربه البشره وماعاد كانهم حاطين شي فا كله ارجع واقول حسب نوع البشره والجو اللي انتي رايحه فيه اذا حررر مووت مثل جونا افضل تختارين نوع غيييررر هههههه

يعني انا شخصيا ما احتاج الفل كفر وما احبها اساسا لانها تسوي وجهي كانه صناعي او لوح جبس 
اكره هاللوك هذا فا عادة استخدم من براندات درق ستور لان تجي خفيفه وماتعطيني لوك الجبس هذا ههههه

تعليب المنتج ومواصفاته : طيب نجي نحلل المنتج كويس هههه ..
طبعا المنتج يجي بعلبة زجاجيه يعني انتبهوا عليها، هو ما ينكسر بسرعه بس هم انتبهوا عليه و أول ما اصدروه كان بلاستيك بس غيرووه

 ويجي معاه بمب او ضغاط مثل ماتسمونه او مضخه اذا الاسم صحيح  وهذا احلا شيء علشان تتحكمين بكمية المنتج وما يطلع كثير او تميل العلبه وينكت نصه اكره الفاونديشنات اللي تجي بدون ضغاط وعلبتها مفتوحه احس مو عمليه وسهله انه ينكب ..


المنتج فيه نسبة ترطيب حلوه بس ما يمنع ترطبين بشرتك قبل استخدامه اقل شي نص ساعه ،، طيب هل فعلا يثبت ١٦ ساعه؟؟! بصراحه بكون كذابه لو قلت لكم ايوه يثبت لعدة اسباب:

اولا انا مستحيل اخلي مكياج بوجهي طول هالوقت يعني مامره صارت حطيت بوجهي مكياج ١٦ ساعه فا ماعرف اذا فعلا يبقى ثابت طول هالوقت او لا ..

يعني اطول مده راح تكون ٥ الى ٦ ساعات وهذا اعتبره كفايه انه يثبت هالوقت هذا كله  وهو فعلا ثبت معاي اللهم خف بشكل بسيط وهذا شيء طبيعي لانه البشره تتشرب ..


طيب هل فعلا يعالج البشره او يغذيها مثل مايوعد؟ هم ماراح اقولكم ايوه... نعم هو صحيح ما حسيت اذى بشرتي ابدا وما طلع لي حبوب ولا شي وسهل بالمسح وينشال بسرعه  بس انا اساسا عمري ما اعتقد في مكياج انه  يحسن ويعالج البشره لانه هو مكياج مو اشياء عنايه فا ما اهتميت حق هذا الموضوع

هل برجع اشتريه؟ ايوه ممكن ليش لا لان الكريم حبيته وينفع لكل شيء بالنسبه لي

طلات صباحيه او زيارات او مناسبات ماعندي اي مشكله معاه يمكن اغير لون الدرجه فقط للتجربه ،،  المهم عليكم انتوا تحددون اذا يناسبكم من حيث اللون والنوع والتغطية والثبات ..
يعني اذا مدحت شي شوفي اذا يطابق عليك ولا لا .. اذا يطابق اوكي في مجال للتجربه واذا حسيتي ملامي بعيد انصحك وفري فلوسك ..

 اخيرا راح اقولكم اصدروا بورجوا  بودره كومباكت(مضغوطه)  من نفس اللاين الهيلثي مكس لتثبيت الاساس بس ماجربتها وتقدرون تجربونها بالمحلات قبل تشترونها 

واذا تبون تعرفون وين تحصلونه راح تشوفونه باي محلات سنتر بوينت او سيتي ماكس او رد تاغ والاماكن اللي تبيع براندات الدرق ستور وسعره حدود ٩٦ ريال سعودي
كان سعره ارخص بس مدري ليش رفعوا سعره كذا .. 




وبس انشاء الله غطيت اغلب الجوانب وتستفيدون من هالتدوينه واذا حابين مواضيع وتدوينات تقدرون تقترحون علي تحت بخانة التعليقات ..
ولا تنسون تشتركون بالمدونه علشان يوصل لكم كل جديد تلاقون الزر انضمام ع جنب اليمين علشان يوصل لكم جديد المدونه ..
وبس معسلامه :)