جهاز تنظيف البشره من سوناتا " ام وتين" Sonata Remover and massager

السسسسسسلام عليكم والرحمه ،، 
طولت كثير عن انزل تدوينه السهر ومايسوي والانشغالات اللي ماتخلص ،،

جبت لكم تدوينه عن :

اكيد عرفتوا من الصوره واضح  اني بتكلم عن جهاز تنظيف البشرة سوناتا الاحمر
 " واسمه  3G face massag beauty device  "    واخيرا بعد تجربه شهرين تقريبا ..
 السبب انا مااحب اتكلم عن شي الا بعد تجربه وتجربه اكيده  ماحبيت اخربط عليكم  والسلام ..


اذا طلبتو مني ريفيو عن حاجة راح اسويه بس بعد مااعطيه حقه من التجربه وفي كثير يستعجلون ع النتيجه بس ابدا حبيت اخذ وقتي واشوف ايش النتايج اللي راح تصير ..♥♡



اول شي ايش هو جهاز تنظيف البشرة وهل هو ضروري لكل بنت ؟
هو جهاز تيجي معاه فرشه تنظيف عميق للوجه وبعض الاجهزه تيجي معاه ملحقات للبديكير نفس اللي عندي
طريقته الفرشه تعمل على شكل دوران ع سرعتين متوسطه وسريعه   علشان تنظف الجلد بنعومه وعمق المسام نفسه
وفي الالات ضد المويه يعني عادي تستخدمينها في الرطوبه أما هذا اللي راح اتكلم عنه مو ضد المويه فا يعني لا تستخدمينه تحت المويه ..

طبعا ايش فايدته:
ينظف البشره باضعاف التنظيف بالاصابع والطرق التقليديه وهالشي صحيح شفته بشرتي صارت ناعمه ونظيفه وفيها لمعه ومع الاستمرار بدأت تخف الروؤس السودا اللي عند انفي واحس بشرتي مهيأه انها تستقبل كريمات او لعمل ميك آب
كمان افضل بمراحل  في امتصاص السيروم والمرطبات  بعد استخدامها..
آمنه للاستخدام لانها ناعمه للوجه وابد ماتسبب خدووش بالعكس الجلد انعم وسمووووووث اكثر وخلايا الجلد متجدده ..
واحسه مهم لكل بنت بعد ماجربت الجهاز ،،

 
اكيد بتسآلوني ليش جربت هالجهاز وما اخترت كلاراسونيك اللي كل العالم تجربها؟؟!! والله ماعندي جواب لان ماكان عندي حاليا نيه اشتري جهاز كنت استخدم فرشاة يدويه من بودي شوب بس ام وتين ربي يسعدها اهدتني الجهاز علشان اجربه ويوم شفت الفرق قلت ويني عن الاجهزه هذي فررررررق والله العظيم فرق شاسع مو مدح هياط لا والله وربي يشهد عليّ ..





راح ابدأ معاكم كيف استخدم الجهاز وملحقاته وشنو اللي اعجبني واستفدت منه وشنو ماحبيته مع روتيني وقت تجربتي معاه ♡♡♡

١- فرشة الوجة soft brush to clear up all the scurf clings on the surface :
اول حاجه ابلل وجهي بالموويه وبعدها احط الغسول على وجهي،،، ولازم يكون غسولك ناعم كريمي وللبشرة الحساسه بس انا استخدمت بايوديرما واموري تمام،،،،   واشغل الجهاز واستخدمه ع وجهي وانتقل من منطقه لمنطقه وما اطول كثير بالمنطقه علشان مايصير اي تهيج لان الزياده كا النقصان يعني اخلي الجهاز حول ٢٠ ثانيه مثلا ع الخد وبعدها ٢٠ ثانيه ع الخد الثانيه وكله هيك ع مناطق الوجه
  بعدها اغسل وجهي من الغسول واجففه وامسح بقطنه بتونر كمان استخدم  من بايوديرما علشان يقبض المسام وبعدها ضروري ترطيب .. طبعا استخدام المنتجات اللي ترتاحين له لاتتقيدين باي منتج ينكتب ..

٢- فرشة الجسم soft brush to clear up all the scurf clings on the surfa: 
 من الملحقات اللي معاه فرشه للجسم لتنظيف بشرة الجسم بس انا ما استخدمتها لهشيء خليتها فرشه بديله لفرشة الوجه علشان لو احتجت اغير فرشة الوجة تكون عندي بديل هههههه ..

٣- أسفنجة لمنطقه تحت العينlatex sponge soft latax brush for eyes and cheeks:
هذي سلمكم الله اسفنجه جدا نااااااااعمه لمنطقة تحت العين وفوق الوجنتين لان مثل ما انتوا عارفين هالمنطقه حساسه والبعض ما يتحمل فرشاة تكون بشراتهم تتحسس ع اقل شي هذي لطييييييييفه جدا حق هالمنطقه
فا عذرا تشوفونها مبقعه او تعتقدون انها وسخه لان سويت مره عليها تجربه لتوزيع فاونديشن وماضبطت كووويس فا كنسلت اني اطرح هالتجربه ..

٤- أداة التدليك للوجه rolling massager to make better blood circumstances from skin aging :
هذا الشي الجميل كمان من الاشياء اللي حبيتها جدا استخدمها لوجهي اذا بحط سيروم او كبسولات فيتامينات لوجهي او احس بشرتي تحتاج تدليك استخدمها احس تخلي المنتج يتغلل في البشره وتمتصه بسرعه وانا احس انها تريح بشرتي حتى بدون منتج لان مثل ما انتوا عارفين مرات البشرة تحسونها مرهققه وتعبانه والتدليك يجدد البشره وينعشها وينشط الدورة الدمويه وهالشيء حبيته ...

 
٥- اسفنجه لبشرة الجسم  sponge to massage and clean skin :
هذي اسفنجه عاديه تقدرين تستخدمينها للجسم انا للحين ماعرفت  لايش استخدمها فيه مدري حسيت اني ما احتجتها في حاجه بس انشاء الله راح اشوف لها صرفه مافي شي يجلس عندي كذا ههههههه ...

٦- أداة البديكير الحجر crude polish accessory to rip the tough skin and cutin off on corner:
هذي الاداة لبرد الجلد الميت في الزوايا في القدم والتشققات ومسامير القدم  والكيوكيتل اللي يتجمع عند الاظافر وعني أنا هالشيء ماحسيته نفعني كثير يعني ما برد لي الجلد الميت كووويس انا استخدمته للاقدام وكنت تاركه اقدامي مدة بس علشان اجرب قوتة هالاداة وماحبيت نتيجته الاخيره ..

٧-أداة  القرص الخشن لصقل سطح الاظافر :
هذي حبيتهاااااااااااااااااااااااااااااااا شفتوا قد ايش مديت كلمة حبيتها فعلا نظفت وصقلت لي سطح الاظفر وشفت كيف شالت الطبقه العلويه من الاظفر بس طبعا لاتطولون ع الاظفر نفسه لا بسرعه مجرد تقشير ..

٨-أداة القرص الناعم تحسين سطح الاظافرcrude polish accessory to rip the tough skin and cutin off :
هذي الاداة اعتبرها الخطوة الثانيه بعد القرص الصقل الاول لانه راح يسوي سطح الاظفر متساوي وينعمه ويحسن مظهر الاظفر ..

 
٩- آداة تلميع سطح الاظفر crystal pads to remove unwated hair:
عالفكره هذي الاداه اساسا لازالة الشعر الغير مرغوب فيه بس انا اعتبرها هذي الخطوة رقم ثلاثه والاخيره للاظافر طبعا اتكلم عن الاظافر سواء للاقدام او الايدي عادي
هالشيء كمان حبيته كنتيجه اخيره بعد التنظيف انه يلمع الاظفر كانك سويتي مبرد اللي يجيك ثلاث او اربع اوجه والوجه الاخيره يلمع الاظفر هالشي يعطيك نفس النتيجه
والحلو فيه يجي معاه قرصين احتياط علشان مع الاحتاك راح يخف المفعول القرصين موجودين علشان تستبدلين القطعه الموجوده ..

 

١٠ و ١١ - ادوات لصقل البديكير coarse buffer for removing tough callused skin :
هالاداتين هم للبديكير بس انا ما استفدت منهم نهائيا هم وحده ناعمه والثانيه أخشن بس انا شخصيا ماحبيتهم وماشفت منهم نتيجه تذكر حسيتهم ناعمين بزياده ممكن لو كانوا اقوى كان افضل .





طيب ايش انطباعي رايي الاخير فيها ؟
بالبدايه راح اقووووول ان الاله جميييييييله وتستحق التجربه خصوصا اذا كنتي تستخدمين ميك اب كثير أو اساسا انتي تحبين تعتنين ببشرتك وتنظفيها  او انك ميزانتيتك محدوده وماتقدرين تشترين كلاراسونيك او جهاز اولاي او اي جهاز اخر سعره عالي ... هذا سعره جدا كووويس ونتيجته اكيد نفس الغالي الفرق هنا اكيد الجووووده والتصنيع وممكن قطع الغيار ♥

امامن ناحية لاستخدامي انا  وهو الاهم انا بشرتي الحمد لله عاديه ما اعاني ابدا  من مشاكل فيها  اللهم مسام متوسع عند الانف وشوية روؤس سواد ع جانب واحد من الانف ..
 
وماعندي حبوب ولا بقع ولا تصبغات ابدا احيانا اذا كثرت سهر تصير لي هالات سودا تحت العين ..

 
فاستخدمتها بعد الميك اب  وبجد فرررق شاااااااااااااااسع عن التمسيج العادي
 اشوف الفرشه  كيف تطلع البلاوي ويقلب لونها لون كريم الاساس !! يعني جد تنظيفها عميق وتطلع اللي دخل جوا المسام ♥♥
 
المسام المتوسع عندي مررا خفت لان اساس  توسعها من الدهووون  فالحمد لله خفت صحيح ماراحت بس افضل من قبل بكثيييييير ...
 كمان شي  لاحظته  الرؤس السودا كمان ماختفت بس خفت ومع الوقت بترووح واذاراحت مع الاستخدام راح تطول ع ماتطلع لك او حتى يمنع انها تتكون ..

كثير قالوا اول ما استخدموا اي جهاز تطلع لهم حبوب هالشي طبيعي لانها تطلع الدهون اللي تحت الجلد واذا استمر ظهور الحبوب اكثر من اسبوع لازم تشيكون ع نوعية الغسول اللي تستخدمونه اذا ينفع ولا لا ... بس انا الحمد لله ما عانيت من اي شي من وقت استخدمته لاحبوب ولا غيره ..
 
عني يكفي اذا استخدمة الجهاز وخلصت المس نعومة وجهي كيف جدا انبسطت وانا المسسه احسه صافي وناعم♥♥ واحسه يتنفسسسسسسسس وفيه قابليه لاي كريم راح استخدمه..

كمان مثل ماقلت لكم استخدمتها للبوديكير نظفت لي اظافري ولمعتهم وهالشي جميل وومكن يغنيك من روحة الصالونات واستخدام ادوات مو لك وقد تكون مستخدمه لغيرك ..

طبعا الحلووووو ان تقدرون تشيلونها معاكم بالسفر  لان حجمه صغير ويجي معاه علبته وفيها ادواتها مرتبه ..
 طبعا هالجهاز صيني و يشتغل ع بطاريه مقاسAA  تلاقونه باي بقاله او سوبر ماركت ولازم بين فترات من الاستخدام تستبدلون البطاريه لان الاكيد انها راح تضعف ويقل مفعوله .. ♥♡

راح تلاقونه عند هالجميله  @aom_wateen
حبيت اشكرها من كل قلبي انها اتاحة لي فرصة اجرب الجهاز وحطت ثقتها فيني ....طبعا عندها اجهزه  من نفس الشركه بس انواع مختلفه وقطع مختلفه واسعارها كمان مختلفه طلوا ع حسابها وشوفوا
انا كتبت تجربتي عن هذي النوعيه ..

اتمنى عجبتكم التدوينه صح طووويله بس حبيت اشرح شرح وافي واتمنى كمان اشوف ارائكم وتعليقاتكم وكمان لو عندكم اسئله اكتبوا وراح اجاوب عليها بالتأكيده
اشوفكم انشاء الله بتدوينه جديده تنال ع اعجابكم ورضاكم
 مع السلامه  ♥♥