بودرة بن ناي البنانا Ben Nye Luxury Powder

السلام عليكم بنات 

اليوم البوست بيكون عن البنانا باودر تبع  Ben Nye 

وهي من  البودرات المنثوره صارت كثير معروفه و مطلوبه بعد انتشار طريقه الخبز او المعروف اكثر بالبكينق

باودر Ben Nye كثير جدا تكلموا عنها وفيه تجارب كثير عليها وصارت ضجة مرا عاليه عليها وجاني حماس أجربها مع أن من زود أشوفهاب بكل مكان جاتني حالة خلاص شبع ماعاد ابيها لكن قلت ليش لا نشوف وش سب هالضجة  

طبعا الباودر فيها درجات كثيره بس  ماني متاكده كم عدد الدرجات  لكن الأكثر شهره هم : الشفافة  و الي معاي لونها اصفر (البنانا)  و الثالثه جاي لونها ع برونز للبشرات السمراء ..

                                  معلومات عن المنتج:

الكميه الي فيها :  1.5 oz الكميه تعتبر حلوه نوعا ما وراح تكفي مدة طويلة ..


اللون :الباودر هذي فيها لون على صفار فالاناره الي تعطيك اياها على صفار  خصوصاً احنا العرب بشراتنا تختلف عن الاجانب فتناسبنا الاصفر اكثر من الوردي ..

قوامها : ناعم جدا وتنثر بسرعه وتتوزع بسرعه وماتتجمع بالخطوط الدقيقة بالعكس تعبيها لك  وكمان ماتجففلك المنطقه زي بعض البودر تعطيك او تبين  لك الشكل جاف اكثر ومشقق ..



كمان من خصائصها تمتص الدهون وتثبت منطقة تحت العين والكونسيلر لمدة أطول وكمان لو كان تحت عينك رمادي او اي منطقة رمادية تصحح شوي من اللون ..

طيب ع فكرة قبل أكتب رأيي فيها وطريقة استخدامي فيه تقليد منها كثير كثير كثير فــ أنتبهوا وقت تشترونها ...

رأيي الشخصي فيها :

  طيب ما راح أكثر كلام كثير عنها وأسهب في الشرح راح أقول اللي  شفته أنا ..  البودر حلوة وصرت أستخدمها لمنطقة تحت العين فقط وهي تنفع تنورين فيها او تنظيفين اماكن تحت الكونتور او تثبين اماكن الاضائه الثانيه بالوجة ..

 ولكن اللي ما أعجبني فيها هي درجه لونها علي ماناسبني لونها أصفر بزيادة ع بشرتي يعني فاتحه مع إن لون البنانا الكل أجمع أنها تناسب الحنطاويات واللي افتح منهم واغمق حبتين لكن مدري كيف جات ع بشرتي !!

  كمان هي مو شيء واو وسحري ان لازم كل بنت تكون عندها لا لا ابدا هي بودرة عاديه صحيح حلوه لكن مو سحر ولا اختراع يتيطر عليه السما .. اذا ماعندك ماخسرتي شيء عظيم واذا عندك استخدام العافيه  :)

الميزه الحلوة  زي ما ذكرت سابقا ممكن يكون سعرها رخيص اذا خذتوها من مصدرها وكمان  بالنسبه لكميتها الكبيرة ..

العيب اللي فيها عدم توافرها بسهولة لازم اونلاين وتختارين أصلي ..

 ثاني عيب اعتبرة جدا سيء ورخيص وغير جذاب هو تعليب البودر للاسف سيء وصعب في الاستعمال وينثر بكل مكان وقت استعملها واضطر انقلها لعلبة ثانيه علشان تسهل لي استعمالها

طريقة أستخدامي :

بعد ما آوزع كونسيلر تحت العين وادمجة كويس اتركة شوي يجف علشان مايخطط ولا يتكلكع مع البودر ..
اوزع البودر تحت العين بفرشاة واتركة في حال بسوي بيكنق ع بال ما اخلص مكياج وجهي كله ارجع اشيله بخفة بفرشاة بطريقة خفيفه جدا ..

او في حال ما ابي اسوي بيكنق اوزعها كمان بفرشاة أو باسفنجة المثلثة وبالطبطبه  والضغط بخفة تحت العين حتى تمزج مع البشرة وتثبت وتدخل بالخطوط وتعبيها واشيل الزايد بالفرشاة  وبس ..

لا تكثرون منها يكون الشكل مبالغ فيه وواضح انه فيه طحين ع الوجة .. والاهم أصحاب البشرات الجافة والجافة جدا مايستخدمونها لانها تجفف الوجة وزي ماقلنا تمتص الدهون ..

أماكن تواجدها وسعرها :

بصراحة زي ماذكرت لكم تواجدها صعب لازم مكان موثوق حتى تحصلونها هي يوفرونها التاجرات بالانستا وكمان متوفرة في أمازون لكن حتى أمازون لازم تنتبهون أنها أصليه لانها تنباع بتقليد بالهبل ..

سعرها رخيص جدا حول ٧٠ او ٨٠ ريال  يعني حول ٢٠ او ٢٥ دولار لوكنتي بأمريكا وعند التاجرات اسعارها بصراحة تختلف من وحده الى الثانيه ..

بس هذا تدوينتي اتمنى غطيت أغلب النواحي فيها ولو كان عندكم استفسار أو سؤال تقدرون تكتبونه في خانة التعليقات وراح أجاوبكم 
اشوفكم في تدوينة جديدة بآذن الله ..