يونغ ليبس بلمبر منتج قلوسي للشفايف | young Lips Pluper

السلام عليكم والرحمة

مرحبا بنات ..

كالعادة مثل ما عودتكم اذا جربت منتج سواء أعجبني ولا لا أقول لكم رأيي فيه .. 

كمان سواء وصلني أو أشتريته .. مو مستفيدة شيء غير التجربة فقط ..

اليوم المنتج اللي راح أتكلم عنه أشتريته بنفسي من صيدلية بوتس بمجمع دارين بالدمام ..

 

 

 

young Lips Pluper                   

 وهالمنتج خاص بالشفايف قلوسي وهو عبارة عن منتج سايل او قلوس شفاف يساعد ع اعطاء الشفاة حجم أكبر ولمعان ..
وهذا كلام الشركة نفسها ..
من محتوياته يحتوي ع جل الصبار ( الآلوفيرا)  وفيتامين E ويساعد ع نعومة بشرة الشفاة ويعطيها ترطيب وجاذبية أكبر..


طبعا انا اشتريت المنتج أخر أيام رمضان المبارك واستخدمته بأيام عيد الفطر .. أخذته ع مدح الصيدلي وقال انه يعطي حجم ملحوظ للشفه وانه مثل الفيلر المؤقت ..
ولان انا فكرة الفيلر الدايم تلعب براسي قلت اجرب المؤقت اشوف كيف راح تكون النتيجة علي ّ فـ تحمست وأشتريته ..

سعره بـ ٧٠ او ٨٠ ريال بين هالرقمين ..


 

طريقتة :
أنه يوضع ع شفايف قبل أو بعد الروج حسب ما أنتي حابة .. لكن تقدرين تستخدمينه مع الارواج المطفيه لو حابه تسوينها لمعه .. وان استخدامه بشكل مستمر يعطي حجم وفوليوم للشفايف مع الاستمرار ..

وزي ماانتوا شايفين تعليبة ممتاز وطريقة التوزيع سهله لان فرشاته زي فرشاة القلوسات ..


طيب نجي للتجربة والكلام الحقيقي ..

أول ما أشتريت المنتج استخدمته ع طول اول ماحطيته حسيت بلسعات وزي التقريصات ع الشفه يعني شوي حار
لكن الحجم اللي عطاني نفس الحجم المعتاد اللي تعطيك اياها الروج اللي بلمعه .. ماشفت تغيير يُذكر أو شيء ملحوظ..
وثاني مره نفس الشيء بنفس الحرارة ..
لكن بعدها بفترة صار مافي اي تأثير لا حراره ولا قرصات ولا شيء صار حاله حال القلوس العادي الشفاف اللي نشتريه ..
ع فكرة هو شفاف كليرررر صافي لكن مع استخدامي له وبعد الارواج صار فيه لون بينك شوي .. فيه تدبيق بشكل خفيف لكن مايوصل لمرحلة تحسون شفايفكم لاصقه او شيء ثقيل! لا اخف نوعا ما من الباقي ..



طيب هل يستاهل الشراء؟
بصراحة ووجهة نظري اشتري قلوس ابو عشرة ريال ولا اشترية ثاني لاني ماشفت منه فايدة اقدر امدحة لاحد .. هو صحيح يعطي نعومة للشفه ومنظر فريش اذا استخدمتيه لحاله او حتى مع روج حابه اعطيه لمعه  لكن في منتجات تؤدي نفس الغرض وبسعر أرخص بكثير منه .. صرت استخدمة يوميا او شبه يومي علشان اشوف لو كان فعلا فيه نتيجة او لا لكن مافيه فـ ابيه يخلص بس :)  فـ تجربة وماراح اعيدها ثاني لكن راح أخلص المنتج دام اشتريه ..




مدة انتهاء المنتج ١٢ شهر يعني سنة ..
كمية المنتج : فيه ٥ مل
المنتج مصنوع في أمريكا من شركة Fran Wilson
اماكن تواجدة : ماعرف بالضبط وين تلقونه بغير صيدلية بوتس مثل ماذكرت سابقاً ..

 وبس هذا تجربتي مع هالمنتج انشآء الله اعجبتكم التدوينه ولا تنسون تكتبون وتشاركوني تعليقاتكم ..

ودمتم في أمان الله ..