السلام عليكم والرحمه ..
كيفكم اخباركم يا حلوات ..
اليوم التدوينه عن أساسيات المكياج وكيف تشرين مكياج سواء كنتي مبتدئه أو عروووس وانا بالنسبه لي كل البنات عروسات يعني لازم نشتري الاشياء الكويسه وبنفس الوقت نتحكم في ميزانيتنا
لان مثل ماعارفين المكياج تروح عليه فلووس كثيييره ويصفر الجيب وينشفه بعد ههههههه ..
قبل لا ابدء في الميك اب وهالشغلات
لازم تجهزين ورقه وقلم وتكتبين انتي اساسا ايش تحتاجين وهل اذا كنتي عروس ومحتاجه شغلات زياده او لا
وقبل هالشيء هذا بعد وهو اهم من اللسته هو تحديد لونك ونوع بشرتك هل هو دهني او جاف او مختلط
كمان جفنك لو كان دهني ولاجاف ولا عادي مافي مشكله
هل عندك هالات تحت العين او لا؟؟!!!!ا
انتي اساسا ايش تميلين له تحبين اللوك المطفي او الديوي يعني اللي يلمع لمعه صحيه او مثلا انتي من عشاق البرونز والتسمير وكيذا
تحبين يكون مكياجك لامع بقلتر او تحبين المطفي بدون لمعه
يعني هيك تحددين ذووقك قبل تشرين علشان ما تطيح الاشياء بكبدك وتندمين عليها ...
والشيء المهم كمان لا تلتزمين بماركه معينه ع مدح احد او لازم تشترين الغالي والهاي اند
لا مو كل شي غالي كويس ولا كل ماركه كل منتجاتها كويس
لازم بتلاقين فيها شي يعجبك تطيرينه السما وشي يصدمك يطيحك بالارض ..
يعني الدرق ستور مليان منتجات كووويسه قد تكون افضل من ماركات الهاي اند وبكذا انتي كسبانه منها منتج كويس ومنها وفرتي فلوسك يا انك تخشينها للزمن او تشترين فيها منتج ثاني هههههههههه
باختصار هذي اللسته تكون عندك كل شي منه حبه او حبتين وتكونين تملكين مكياج كامل ويغنيك حتى عن روحة الصالونات ..
نجي لموضوعنا نفسه انا راح اكتب بشكل عام وكل بنت منكم راح تختار اللي يناسبها وهذا الشيء مو لازم تكون كلها عندك .. وراح اكتبه تقريبا بالتريب للخطوات المهمه ..
نبدأ بسم الله ..
أول حاجه : المرطب للوجه لازم لازم قبل كل مره ميك اب سواء سهره او ميك اب يومي لازم ترطبين بشرتك والمرطب حسب اللي متعوده عليه انتي ومرتاحه له ..
انا مثلا راح اكتب لكم اقتراحات جربتها انا شخصيا
كريم كيو في QV مره ممتاز وخفيف كريم فايتمين E من بودي شوب او سيتافيل هذي مجرد امثله ممكن اي كريم يناسبك وترتاحين له ..
رقم ٢ : البرايمر للوجه أو العين:
هذي الخطوه اختياريه ولازم لازم تعرفون ان البرايمرات انواع يعني حددي نوع برايمرك قبلها هل تحتاجينه لاخفاء المسامات او منع الدهون لو بشرتك دهنيه او لتثبيت المكياج فتره اطول ممكنه او بس للمسه مخمليه للوجه ..
طبعا البرايمر من وظيفته الاساسيه انه يهيء البشره لكريم الاساس علشان يندمج اسرع واسهل ويعطي مظهر ناعم وجميل ..
وهذي امثله برايمرات جربتها من مابيلين اسمه
وكمان من بنفت اسمه بروفيشنال
سيفورا
وفيه خيارات كثيره منها الغالي ومنها الرخيص حددي انتي وش تبين بالضبط!
وكمان نفس الشيء بالنسبه لبرايمر العين وظيفته يثبت ويوضح اللون بشكل اقوى ويوحد لون الجفن اذا كان له لون مثل ماك سوفت اوكر بين بوت ،، لوراك .. اربن ديكي .. تو فيسد وغيرره كثير ويمكن تستغنين عن برايمر العين وتحطين بداله كونسيلر ع الجفن ويضبط معاك ..
رقم ٣ : كريم الآساس (فاونديشن) والبي بي كريم (BB OR CC):
اول حاجه بقولها عن الكريمات لازم يكون عندكم نوع بي بي كريم لليومي وطلعات قصيره وزيارات خفيفه ونوع فاونديشن كريم اساس ع الاقل واحد للسهرات او الطلعات الطويله ..
طبعا الكلام هنا معضلة البنات اللي الاغلب يشتكي منها وماتعرف كيف تختار لون او نوع كريم الاساس المناسب لها ..
كثير بنات يسئلوني بالانستا او السناب ع فاونديشن يناسبهم !!!
بس للاسف ان الفاونديشن ما ينوصف بالكلام لازم تختارينه انتي بلونك و على بشرتك انتي ..
حددي نوع بشرتك اذا دهني خذي كريم اساس خالي من الزيوت
واذا جاف خذي دهني علشان يعادل البشرة واذا مختلطه خذي يناسب المختلطه وهكذا ...
عاده الكريم الستيك والاساس اللي يجي ع شكل بودر يكون للبشره الدهنيه
والكريم السايل او اللي قوامه موس كريمي يكون للبشره الجافه
كمان لا تعتمدون ع الكلام اسئلوا اللي يبيع عن ايش يناسب نوع بشره هالكريم وهل هو مطفي ولا لمعه
بعدها نيجي لمرحله اللون ... اذا بتختارون لون فاونديشن لازم نفس لونكم بالضبط او اغمق بدرجه او درجتين او افتح بدرجه وحده بس
علشان مايبان فرق عن الجسم وماينفع تجربين اللون ع اليد لازم ع الوجه خذي لك علبه او بالمحل اذا كان نسائي وحطي بوجهك وادمجيه وشوفي كيف اللون هل هو ماشي او لا هل يتأكسد ويقلب رمادي ولا لا اعطيه فرررصه وكذا استخدام ..
امثله كريم اساس مثل بورجوا هيلثي مكس وكمان مطلعين جديد اسمه آير مات
من ميك اب فور ايفر كثير حلو للسهرات لكن سعره غالي
لوريال ترو ماتش ولومي كويسين واحد منهم مات والثاني بلمعه صحيه
ميبلين وريميل وكثثثثير عاده اسعار الدرق ستور من ٧٠ و٨٠ وطالع ما يتعدى الميتين ريال
اما الهاي اند من ١٥٠ وطالع ويوصل الى ٣٠٠ ريال واكثر
فحددي ميزانيتك عليه
البي بي كريم لانه هو عباره عن كريم اساس بنسبه بسيطه والباقي كريم مرطب وتغطيته تكون اخف من الكريم اساس
وعندكم امثله كثيره مثل ميشا مو متوفر بالاسواق بالطلب من النت
غارنيه فيه للجافه والدهنيه والمختلطه ميبلين وبورجوا واغلب الدرق ستور عندهم ..
رقم ٤ : الكونسيلر اللي هو خافي العيوب والكوركتر اللي هو المصحح
..
إختاري الكونسيلر بلون يشااااابه للون بشرتك ونوعها كمان وخليك حريصه من هالناحيه اذا كان عندك هالات او اثار حبوب تبين تخفينها .علشان تخفينها وماتبرزينها اكثر لان لو اخذتي افتح منك راح يقلب رمادي او بيصير العيب واضح اكثر
في حل اذا اخذتي فاتح انك تستخدمينه كاضائه لوجهك او اماكن تبين تبرزينها ..
الكونسيلر فيه من ماك برو لونغ وير
من مابيلين
غارنيه
ريميل
المصحح يختلف عن خافي العيوب اللي هو الكونسيلر وطبعا مو شرط اللي يكون برتقالي فيه بنفسجي واخضر وبرتقالي ..
شوفي ايش عيوب بشرت واشتريه ك اذا عندك تصبغات لونها احمر حطي عليها مصحح اخضر
اذا هالات وبقع بنيه داكنه حطي برتقالي او مشمشي
واذا عروق لونها اخضر او ازرق او وجهك باهت وشااااحب بقوه حطي عليها بنفسجي علشان ينعش البشره وطلتها
فيه من عجله كريولاين فيها كل الوان التصحيح تقريبا و نيكس و ماك ..
رقم ٥ :ادوات تحديد الحواجب :
النصيحة الأهم في مجال تحديد الحواجب هي تحرصين على اختيار لون التحديدالأقرب إلى لون حاجبك الطبيعي.
لا تحاولين تاخذين اغمق ولا افتح بكثير لان ماراح يناسبك وبتكونين ملفته ..
طبعا تحديد الحواجب فيه منه جل كريمي وفيه منه اقلام وفيه كمان باودر
انتي ايش تحبين تاخذينه ماراح احدد لك ان القلم افضل او الجل او البودر لا انتي شوفي ايش يناسبك وخذيه لان في ناس ينفع لهم البودر وناس لاما يثبت معاهم وهكذا
عالفكره مو لازم ناخذ باودر خاص للحواجب نقدر نوفر فلوس لو كان عندنا باليت حواجب فيه الوان بنيه ومناسبه للون حاجبنا ينفع نستخدمه
بس راح اكتب اقتراحات لكم لكل نوع
قلم نيكس انستازيا بنفت اربن ديكي ميبيلين سيفورا ماكس فاكتور
رقم ٦ : ظلال العيون (الايشادو) :
طبعا كلنا نعرف ان الالوان الطبيعيه والبرونز والبنيات هي تحتل المرتبه الاولى لان عمرها ماتروح موضتها ولا تصير قديمه ومنها نقدر نسوي لوكات يوميه ولوكات سهره وكل ماكان الباليت يحتوي ع اكبر قدر ممكن من هالالوان صدقوني راح تستفيدون منه وراح تستخدمونه ع طوووووول لان الالوان هذي اساسيه سواء كا الوان انتقاليه للدمج او لون اساسي ع الجفن المتحرك
ما يمنع ناخذ الوان شيمر يعني تلمع وفيه كثير براندات حلوه
مثل مورفي ... لوراك .. تارت ... نيكد بيسك ...
في الايشادو حاولي تاخذين الالوان اللي تطلع معك نفس ماهي موجوه بعلبتها يعني شوفي جودتها قبل تشترينها لان مرات تاخذين لون ايشادوا مثلا وردي واذا بتحطينه ع الجفن تشوفينه اشهب او كانه غبار او مو واضح يعني صبغته خفيفه وسيء
انتقي الباليت المناسب لك ومو لازم يصير عندك كل الباليتات لان الشادو يطول ومايخلص وراح تملين منه اذا جلس فتره طووووووووووويله عندك
كمان يجي من الظلال بالحبه يعني مو علبه او باليت لا انتي تختارين الالوان هذي لك مطلق حرية الاختيار اللي الالوان اللي حابتها .. والاسعار كمان تتفاوت من ماركه الى ثانيه
رقم ٧ : الايلاينر :
أنواع كثيره من الأيلاينر: كالأيلاينر السائل والجل والبودرة وقلم الأيلاينر، اختاري الأفضل بحسب نوع البشرة وسهولة رسمك له يعني اذا متمرسه وشاطره خذي جل او سائل واذا لا خذي قلم او بودرة
والايلاينر مهم بكل مكياج سواء لداخل العين او برا يعني من اساسيات المكياج مثل انجلوت او ميبلين او بورجوا او ماكس فاكتور او من قزاز ..
طبعا فيه اقلام ملونه ممكن لو انتي حابه تغيرين اللوك تقدرين تاخذين لك اللون اللي حابته بيج او اخضر او ازرق ... الخ
رقم ٨:الماسكارا والرموش:
مايكمل مكياج العيون بدون ماسكارا او روموش لكن احيانا نقدر نستغني عن الرمووش بس الماسكارا لاااااا من اهم الاشياء لانها تحلي العين وتبرز المكياج وتكمله وتجمله بشكل فضيع ..
فا مهم تكثيف الرموش وتطويلهم ،، وبحر المسكارات كثيييييير وفيه بعض البراندات تصدر مسكرتين وتقول وحده تطويل والثانيه تكثيف وتعالي خذيهم ثنتينهم ههههه والبعض لا تكون هي تكثف وتطول مع بعض وفي من المسكارات ضد المويه وما افضل هالنوع ابدا ..
انا اكرهه ماعندي ان المسكارا اذا حطيتيها شوي الا بدت تتفتت تحت العين هذي اعتبرها فاشله لابعد الحدود مهما كثفت او طولت لان النتيجه اذا تفتت تكون سيئه وكانها رخيصه،،
افضل المسكارات اللي استخدمتها سيفورا اللي لونها اسود و ذا ريل من بنفت ولوراك ..
فيه من مابيلين وريميل واتش اند ام مسكرتهم حلوه كمان عموما انا كاتبه عن مفضلاتي للمسكارا في موضوع قبل طلوا عليه اذا حابين بس راح اضيف اني هالفتره اعشق مسكارا من توفيسد اسمها بتر ذن لوف وفي امريكا اسمها شوي مختلف لكنها خرافيه بالنسبه لي انا ..
رقم ٩: البرونزر:
البرونزر هو لإضافة بريق وحيوية ولمسة ذهبية ملفتة إلى لمكياجك يعطي دفئ للوجه ما اعرف اوصفه . هالخطوه مو اساسيه ولا هي مهم وفيه الكثير مايستخدمونه او يفضلونه لكن حبيت اذكره لانه في كمان ناس يحبوونه وانا وحده منهم واعتبره اساسي..
مثل ماقلت مو ضروري يكون عندك كل انواع البرونز لكن لا مانع لو اخذتي واحد بسعر معقول ورخيص ..
وراح اكتب لكم امثله مثل برونزر اتش اند ام،، توفيسد،، كات دي فون ،، بودي شوب ،، ذا بالم،، كوستال سنت
رقم ١٠: البلاشر او بودرة الخدود:
البلاشر او بودرة الخدود من اساسيات المكياج يعني من منظوري ما احس انه ممكن نستغني عنه لانه هو اللي يعطي دفا للوجه ويكمل المكياج ويعطي طله حلوه ويناسق المكياج كله مع بعض
وممكن تاخذين بلاشرين مع الوقت والزمن ماراح تروح موضتهم وهي الالوان اللي ع مشمشي واللي ع زهر نيود هذي لك وللزمن وتنفع للسهرات وكمان للطلعات صباحيه او لوكات خفيفه
في بلاشرات بلمعه تبرق وتلمع بس انا مافضلها كثييييير لانها مو عمليه ولا راح تستخدمينها ع طول الا اذا بخاطرك خذي لك لون واحد :) هههههه
وكمان من منضوري مو لازم البلشر يكون غالي خذوه من الدرق ستور لان حرام ندفع فيه سعر والنتيجه وحده ،،،وفيه باليت تجي اقتصاديه ويجي فيها كذا لون للي حابه توفر وتضبط ميزانيتها مثل كوستال سنت وكثير ماركات تسوي هالحركه ،،نفس اللي بالصوره ..
رقم ١١: الكونتور:
عاد هذي اللي الزمن طلعها فجأه ههههه ولا ايش فيه مكياجنا قبل بدونه ؟؟؟؟!! ما احس هالشيء مهم او انه المكياج بينقص او ع قولتهم بتختفي الملامح
هذي شيء تكميلي وتجميلي وتحسيري للفلوس كمان ههههههه امزح ترا عندي بس انا اقصد للي مو حابه تشتري مهب لازم لانه مو شيء مهم وراح تطلعين جيكر بدونه لا بالعكس هو يزيدك فن ويزيدك جمال لكن مو اساسي
امثله كونتور كات دي فون لوراك نيكس ذا بالم عجلة كوريولاين كوستال سنتس مورفي وتارت وكثيييير طلعوا باليتات لهشيء
طبعا فيه منه كريمي وفيه منه بودر اختاري اللي يناسب بشرتك اذا دهنيه خذي بودر واذا جافه او عاديه ينفع تستخدمين كريمي ..
رقم ١٢: الاضائه الهايلايتر:
الهايلايتر ناس تحبه وناس تذمه بس قبل تكملين فقره الهايلايتر اذا بشرتك مليانه عيوب ومسامات وحفر انصحك تخطي هالفقره وشوفي الللي بعدها لانها ماراح تناسبك ابدا ..
الهايلايتر فيه منه نوعين بلمعه يبرق ويلمع ونوع بس اضائه ونور يعني تحسين المكان منور .. وممكن هالنوع هذا يستخدمه ذوات البشره التعبانه لكن بشرط تكونين سويتي تغطيه كوويسه للعيوب والاثار .. اللمعه في منها الوان ع لؤلوي و ع وردي وفضي خذي اللي يناسب لون بشرتك ..
رقم ١٣: أحمر الشفاه والمحددات:
الاقلام المحدده والارواج خياراتها كثيره ومتنوعه بقوووه .. يعني لا تحتارين بس اهم شي حددي ذوقك فيها هل تحبين المطفي او اللمعه بلمعة ترطيب ..
ايش ميول الوانك هل تحبين الالوان الداكنه او الالوان الطبيعيه او الورديه وكذا
حاولي تبعدين عن الارواج اللي تشقق وتنشف الشفايف
وهالشيء عادة يكون من الارواج المطفيه لازم لازم تحتاجين تقشير وترطيب قبلها ولا راح تكرهينها وتكرهين شفايفك معاها ..
طبعا الارواج كل نوع بالنسبه لي له جمال وحلاوه عني انا احب المطفي واحب اللمعه احس لكل واحد جوه الخاص ..
واهم شي تهتمين فيه اذا بتشرين ارواج حاولي دائماً تختارين التركيبة الغنية باللون وفيه كميه ترطيب .. لان اذا اخذتي الوان باهته راح تعكس شحوب ع لون بشرتك ووجهك ..
الحلو بالارواج مو لازم تشترين كل الالوان علشان يكون عندك كولكشن كبير ارواج وماتستخدمينهم ترا دمج لونين او ثلاث الوان اروج مع بعض يعطيك لون جديد ماعندك اياه وبكذا انتي وفرتي مساحه بادراجك وفلوسك بجيبك هههه شرايكم فيني وانا اعطيكم حلول توفيريه هههههه ..
طيب نكمل ... فيه ناس من محبين الغلوسات انا ابدا ما احبهم مدري ليش لاني ماحب شعورهم ع الشفايف خصوصا اذا كان دبق ويلصق خخخخ بس كمان لا تتقيدون بذوق احد ولا باختياره اكيد القلوسات لهم ناس تحبها ..
وكمان نفس الشيء للمحددات دايم اختاري الوان تناسب اغلب الارواج عندك علشان منها توفرين فلوسك ومنها تستهلكينه بدال ما يجلس مده عندك ويخرب مع الوقت وكمان نصيحه حاولي تختارين تركيبته تكون سلسه اثناء الاستخدام لانها بعضها جااااف ويابس وخشن ومايرسم كويس ع الشفايف ..
ارشح ارواج من الهاي اند والدرق ستور مثل ماك ولايم كرايم و كمان ارواج ريفلون و سليك - ان واي اكس - بورجوا - ويت اند وايلد -
رقم ١٤ : مثبّت المكياج:
المثبت مو مهم للي طلعاتها ومناسابتها قليله يعني لا تكثرين من استخدامه،خليه في المناسبات والحفلات لانه يساعدان يحافظ ع مكياجك لأطول فترة ممكنة.كمان يمنع تلطيخ المكياج بسهولة وكمان يشيل الغبره من مكياجك ويعطيك لمععه
وفيه منه انواع كثيره بخاخ او بودره كمان يجي منه شيء يعطي لوك مطفي وثاني يعطي لوك ديوي فا انتبهي وقت تشترينه
امثله للمثبتات مثل بخاخ كريولاين و اربن ديكي وماك ونيكس و إلف ..
طبعا ماك فكس بلس مايعتبر مثبت كثر ماهو مرطب للوجه وينعشه ويشل غبره البودر اذا بخيتيه بعد المكياج يشيل مظهر الكيكي فيس ..
رقم ١٥: مزيل المكياج:
من أهم الشروط الأساسية في المكياج هو إزالة المكياج كل ليلة قبل النوم وتنظيف الوجه علشان تحافظين على نضارة وجمال بشرتك ولا ابشري بالحبوب والمسامات الواسعه والدهون . ومنتجات إزالة المكياج هي الكريم أو الغسول أو الفوط المزيلة للمكياج أو التونر السائل او المناديل
وكمان راح اكتب اقتراحات بدون تفضيل نوع ع نوع شوفوا اللي ترتاحون له
مناديل جونسون وبودي شوي مجموعه فيتامين E
مزيل بايوديرما
مزيل سيفورا الازرق
مناديل انجلوت
كلين اند كلير ونتيتروجينا
كريم نيفيا
رقم ١٦: الأدوات والفرش والسبونج :
كمان من الاشياء المحيره للبنات هي الفرش والاسفنجات وكثير يعتقدون ان الفرش الغاليه هي الافضل لاااا مو كذا ولأن موضوع الفرش متشعب كثيررر في مواضيع بمدونتي عن فرش وراح انزل كمان عن كم مجموعه عندي ..
طيب انا ما اقول خذو رخيصه من محل ابو ريالين لان كمان الفرش السيئه مرات تعطي نتيجه عكسيه وتخرب نتيجة المنتج ومرات نعتقد انه المنتج سيء ما يطلع كويس وهو البلا من الفرشه ماتمسك اللون عدل
فا مهم مهم مهم تكون جودتها كووويس مو سعرها ..
كمان مو لازم تكون عندك كل فرش العالم كلها علشان بيطلع مكياجك بيرفكت لااا..
الذكيه هي اللي تقدر وتعرف تستخدم الفرشه كذا استخدام وكذا طريقه
وتوفر مكان وسعر مثلا تكون عندك فرشاه بلاشر وفرش للشادو للدمج وفرشاه للاضائه وفرشاة ايلاينر
مثلا فرش ريل تكنيك ماعليها حسافه مهما كان سعرها جدا كوووويسه وفرش سيقما وزويفا وام دي كمان جيسب و بي اتش وفيه كمان كوستال سنتس بس شخصيا ماراح انصح فيها كثير لاني ماحبيتها ههههههه
السبونج نفس الشي خلي عندك ثنتين ع الاقل لانها مهمه ترتيب لك المكياج وتشيل الزايد وتدمج افضل من الفرش المخصصه للوجه .. كمان فيه من ريل تكنيك وانجلوت وبيوتي بلندر
رقم ١٧ : عقاصة الرموش او ملقط:
هالشيء مو مهم كثير نقدر نستغني عنه لكن اللي رموشها مستقيمه تحتاجها ....هي لثني الرموش قبل تحطين الماسكارا تضيف الطول والكثافة وتخليها معكوفه لفوق وتفتح عينك اكثر خصوصاً مثل ماقلت اذا كانت الرموش قصيره ومستقيمه
ومايحتاج اقول من وين لانها متوفره بكل براند الرخيص والغالي وخذوا السعر الانسب لكم وحاولوا تاخذون اللي يجي معاها قطعه غيار للربل الموجود مكان العقص علشان تغيرينها اذا خلاص بطلت تنفع بدل اتشترين عقاصه جديده ..
انا اخذت من فيس شوب سعرها اتوقه ب١٥ ريال ومعها ٢ ربل غيار للقطعه وحلووه جدا ..
رقم ١٨ : بودرة تثبيت الفاونديشن :
البودره هذي للي تحتاج يكون الفاونديشن معاها ثابت لاطول فتره ممكنه
وفي منها نوعين
حره يعني سائبه آو منثوره وهذي للبشرة تقريبا كل البشرات بس الاكثر تناسب الجافه ..
او كومباكت تكون ستيك او مضغوطه وهذي تنفع للبشرات الدهنيه لانها تمتص الدهون
وكثير بوردات متوفره بالاسواق وكمان اونلاين
مثل ريميل وميبيلين وبنانا من بناي مشهوره والاغلب استخدمها و من ذا بالم شفافه بدون لون.. ومن ميزاتها كمان انها تمتص الدهون كوووويس اذا دهنت المنطقه عندك طبطبي عليها بس وتخف الدهون ..
كمان انجلوت عندهم ملونه وشفافه وفور ايفر فا اختاري اللي تناسب ميزانيتك
جدا جدا مدونه رائعه وبالتوفيق💖
ردحذف