DIY تونر طبيعي للوجه.. مزيل مكياج طبيعي .. تجربتي مع موية الورد ..

  السلام عليكم والرحمه ..

كيفكم وكيف أخباركم إنشاء الله تمام ..

التدوينه هالمره جدآ جدآ سهله و بسيطه واتوقع الكل عارف هالشيء ..
يعني راح اختصر كلام كثير ..

تجربتي مع موية الورد من انجح واسهل التجارب اللي سويتها بحياتي هههه  لا جد نتايجها رووعه وغير كذا سهله ومتوفره بكل بيت ..
الصعب بالموضوع هو الاستمرار بس .. ولا اذا استمريتي راح تشوفين كيف كلامي صحيح ..
راح اعلمكم استخدامين لموية الورد 





راح أبدأ معاكم أولا بالتونر ..

طيب ايش نحتاج علشان نسوي تونر طبيعي لوجهنا ؟؟

- موية ورد
- موية معدنيه او من برادة البيت عادي
- نقاط زيت فيتامين E او نقطة زيت جوز الهند العضوي   وتقدرين تستغنين عنها هذي الخطوه لترطيب اكثر ..

والاكيد علبة بخاخ فاضيه ونظيفه ..

بس هذا اللي نحتاجه شايفين كيف سهل وبسيط وغير مكلف ونتايجه افضل من المنتجات اللي تؤدي نفس الغرض واسعارها نار وشرار :)


الطريقه:

نشغل الفرن وندخل الصينيه هههههه امزح امزح<<< تستخف دمها

المهم نجيب علبة البخاخ الفاضيه ونصب في ربعها او نصها موية ورد حسب تركيز المويه اللي تبين و بعدها تضيفين نقطتين الى ثلاث نقط زيت وبعدها تعبين العلبه مويه نظيفه ومعقمه وبس صار جاهز :)

اذا عندك حبوب وبشرتك دهنيه استبدلي الزيوت بعصرة ليموونه راح يعقم لك الحبوب ويمنع البكتيريا انها تطلع لك حبوب جديده واللي تتحسس من الليمون لا تجرب وبعدها تدعي علي :)

عند كل استخدام رجيها كويس واستخدميها ويفضل اذا حفظتيها بالثلاجه بتكون عال العال راح يقبض المسام اسرع لانكم عارفين ان البروده تساعد ع انكماش المسام والجلد عكس الاشياء الدافيه تساعد ع التمدد ..


مرات الاستخدام غير محدده عادي متى ماحسيتي انك محتاجه بخي ع وجهك وخصوصا الحين الصيف جاي والحرر يحرق نحتاج اشياء تبرد ع الوجه ..
كمان اذا اخذتي شاور بخي ع وجهك ورقبتك  ينعشها وغير هيك الريحه ياسلام بتصير ريحة وجهك ورد .. وغير هيك ترطيب
ترا فوائد موية الورد لا تحصى كثيييييره ،،  يهدئ الجلد ويبطئ من عملية الشيخوخه  ويعطي توهج للبشره  وكمان بعد ازالة الشعر الزايد امسحي جسمك ووجهك منه راح يشيل التهيج .. وهالشيء ينفع للرجال والنساء والاطفال وكل احد لانه كل مكوناته طبيعيه ..

مزيل مكياج زيتي و طبيعي  :

نحتاج:
- علبه فاضيه
- موية ورد
- زيت جوز الهند

وبس تخلطينهم سوى وتحفظينهم بالعلبه وتمسحين فيه مكياجك بقطنه وشوفي كيف النتيجه
ينظف المكياج كويس وغير هيك راح تستفيد بشرتك منه لانه كل مكوناته طبيعيه وعارفه ايش مكوناته ..



وبس اتمنى نالت ع اعجابكم وافادتكم واتمنى الي تطبق توريني تطبيقها هنا او بالانستا او اللي شافت نتيجه من الاستخدام تكتب لي رايها و  اشوفكم بتدوينات جديده ومفيده واشكر كل زوار مدونتي ..
في امان الله وحفظه