روتين العنايه اليومية بأسناني ..Daily dental care routine

السلام عليكم والرحمه

يمسيكم | يصبحكم بالخير والمسرات ..

كيفكم اخباركم انشاء الله طبين وبخير وعافيه ..

هالفتره النشاط فيني زايد وكتبت تدوينات  ورتبت البلانر حقي وحققت اشياء كثيره شكلها الغدة الكظرية و هرمون الكورتيزون  زايد عندي ع هالنشاط  وصايره مبسوطه ورايقه ربي يدوم هالحال اطول فترة ممكنه ..

المهم موضوعي اليوم عن روتيني في العناية باسناني ..




أول حاجه بكتبها وبذكرها لكم من البدايه ترا اسناني مو فص لولو ولا البياض الناصع لااااا فيها اصفرار شوي بس مو الاصفرار اليي يلوع الكبد لا عادي جدا نفس الناس الطبيعيه .. والترتيب مرتبين مو مكركبين بس يحتاجون برد وتضبيط وحاجات بسيطه  ... اجريت عملية خلع اسنان العقل وشوي صار عندي تخلخل بسسسيط جدا مو ملحوظ بس انا انتبهت فيه ومأثر علي ..  وعندي سن بتلبيسة وعندي حشوه وحده   علشان اللي يعرفوني لا يقولون من بياض اسنانها كاتبه هالموضوع ولا تتفلسف علينا !!!



لان العنايه مو بس تبييض فقط ولازم الاسنان تكون كانها بوية من البياض لا طبعا ..  الاهم العنايه و المحافظه ع نظافة الفم ونظافة الاسنان والاهتمام فيها ،، والبياض شيء زين ع زين يعني اكيد خطوه مطلووووبه والكل يركض وراها ويبي اسنانه لولو من البياض ..

وانا من هالناس اسعى ابيض اسناني بس هم ابي اهتم في  فمي نظيف ويكون  بدون ريحة لاني اتحسس من هالموضوع سواء مني في فمي  او من غيري ما احب ابدا ابدا مخلوق ع وجه الارض يشم في فمي ريحه مو طيبه سواء من عدم اهتمام او حتى من بعض الاكل اللي تخلي بالفم ريحه مثل الثوم والبصل وهيييك اتضااايق جدا ..

لان بصراحه هالموضوع مزعج جدا انك تجلسين قدام شخص وتكون ريحة فمه تصك راسك او تجيب لك اللوعه وتحسين ودك تزوعين عليه وانتوا بكرامه ..

طيب انا ليش كتبت بالموضوع عنايه يوميه بالاسنان لاننا نحتاج ننظفها كل يوم وخليت هالروتين خفيف وسهل ومنتجات اقل علشان ما نستصعب نسويها كل يوم .. لان كثرت المنتجات نكسل نستخدمها بعد فتره لانها تحتاج وقت ومجهود اكثر ..

فا اخترت الاشياء المهمه فقط اللي تخليك تسوين الروتين هذا ويكون فمك واسنانك وريحة فمك نظيفه ومنعشة بغض النظر عن درجة بياض اسنانك .. او هل الروتين هذا يبيض ولا لا ؟؟!!

وعالفكره ترا البياض او الوان الاسنان تجي هي درجات يعني في ناس ربي خلقهم اسنانهم لونها صفرا لو تدعك فيها من يومها   ليوم الدين ما راح تتغير لانه هي طبيعتها كذاولونها كذا ..
وناس تجي بياضها ناصع ماشاء الله ماتتغير يعني شوفي انتي ايش اساس لون اسنانك وبعدين نتكلم عن البياض وهيك ..

موضوع مركز اكثر شيء عن النظافه والريحة الجميله .. ليش اركز عالريحه لانها تسبب نفوور قووووووي جدا ، يعني مثلا مستعده انهي صداقة علشان الريحه لان صعب اقابل انسانه ريحة فمها مو كويسه
او مثلا المتزوجه تقابل زوجها بهالشيء صعبه صعبه صعبه جدا .. او تضحك وتشوفين بقايا الاكل لاصق في اسنانها !!  والقهر واضح انه مو توه لاصق ! لا واضح انه له ايام ومتغير لونه وغير معاه لون اسنانها ..  ودك ما تفتح فمها و تتكلم ولا تشوفين هالمنظر ..


طيب كالعاده عارفيني  طبعا طولت بالمقدمه وانا ما دخلت صلب الموضوع او طريقتي :

يلاااااااا ...

معاجين الآسنان اليوميه أو المبيضه : 


أول حاجه انا ماراح ادعي اني البنت المثاليه اللي تفرش اسنانها ثلاث مرات باليوم .. بس حقيقة افرش اسناني مرتين باليوم نادر افرشهم ثلاث مرات ..
واستخدم بتفريش اسناني ثلا معاجين بس كل فتره اغير يعني ما استخدمهم كلهم مع بعض ..

أول معجون استخدمه واحبه معجون سيجنال تو مدري ليش هذا مهما غيرت عنه ارجع له مدري هو حب الطفووله ولا ايش لان من كنت صغيره هذا معجوني وما اغيره جربت كريست وسنسوداين اخلصهم وارجع للحب سيجنال تو ههههه
المهم هذا المعجون اليومي اللي استخدمه ع طول مافيه شي مميز بس كذا احبه ومرتاحه عليه ..

ثاني معجون من كريست ثري دي وايت استخدمت نوعين وهالمعاجين مخصصه للتبيض ونسبة الفلورديدا فيها عاليه ،ابدا ابدا ما انصح تستخدمونها ع طول وبشكل يومي لانها تعدم الاسنان  ع المدى البعيد انا استخدمهم حاليا اسبوعين واتركهم اسبوعين وارجع لهم وكله هيييك هل حصلت بياض منهم؟؟
مو الفرق الكثير بس لاني اشرب قهوه كثيير يشيلون طبقة صفار القهوه فقط اما التبييض اللي مكتوب ع المنتج انه بيسوي اسنانك سيراميك ابيض ههههه








وكل هالمعاجين متوفرين بالسوبرماركتات الكبيره واللي تجيب اشياء مستورده وبصيدليات النهدي والصيدليات الكبيره وفي منهم نفسهم اصدار خاص للشرق الاوسط وفيه نفس اللي عندي مستورد

معجون هوليوود سمايل اخذته من هايبر لولو الخبر مكتوب عليه للتبيض وان مشاهير هوليوود يستخدمونه مدري والله هو صدق ولا عباطه علينا المهم حسيته يشبه كريست الا انه يختلف عنهم بقوامه هذا جاي كريمي وسايل اكثر منهم واحس فيه حبيبات نااعمه وتذوب مع الاستخدام .. الحلو فيه كرتونته يجي عليها شريط درجة الاسنان وتقيسين درجة اسنانك وتشوفين هل في تغيير او لا ..

انا سابقا استخدمت معجون  تبييضمن سنسوداين وبصراحه ماحسيت بتغيير عليه ابدا ولا نقطه فا ماحبيت ارجع استخدمه ثاني

بودرة تبييض الاسنان للمدخنين ومدمنين القهوه انا شفتها عن ٢ بلوقر معروفات ورحت طيران اخذها هي تشيل فعلا الصفار اللي تسببه القهوه بس للاسف حسست اسناني والمتني ولثتي تعبت وماصلح لي وما انصح فيه كمان استخدام يومي فقط مره بالاسبوع ع الاكثر ..

طريقتها تغمسين الفرشاه في البودره وتفرشين اسنانك فيها بعد ما كنتي مفرشتهم بالمعجون ومع الاستخدام تبييض الاسنان راح تصير زي الفقعات او يشبه البيكربونات مع الليمون اذا تفاعلوا مع بعض ..

فرش الأسنان : 

خلصنا من المعاجين نجي لفرشاة اسناني استخدم ٢ بس اكثر شي الكهربائيه جدا مرتاحه عليها هالفتره وهي من اورال بي متعاونه مع شركة براون وانتجوا هالفرشاه
سابقا او ما اخذتها ماحبيتها وصارت تسبب لي صداع براسي اذا استخدمتها ما اعرف السبب بس مع الاستخدام تعودت عليها وما استغني عنها اذا حابين ريفيو مفصل عنها بالضبط المضبط اكتبوا لي بالكومنت او بالانستاقرام

الفرشاة الثانيه يدويه عاديه من اورال بي كمان حلووه وكويسه بس عادي يعني نفس حقت كل الناس

فرشاة الاسنان حاولوا تغيرونها كل ثلاث شهور واذا ماغيرتوها غمسوها اما في خل او ديتول للتعقيم من البكتيريا مع اني افضل تغيرونها لانها تفقد فاعليتها وماتفرش كويس ..
حاولو تستخدمون فرشاه سوفت ( الناعمه) علشان ماتخدش لكم اللثه واذا فيه بلاك او جير يفضل تكون عندك ثانيه خشنه علشان تفرشين فيها المناطق اللي تحتاج قوة اكثر ..




نكاشة (آعواد) الاسنان وخيط الاسنان:

طبعا ع فكره يجي منها بلاستيك ومنها خشب انا استخدم الاثنين بس حاليا استخدم البلاستيك اللي يجي ٢ في ١ خيط ونكاشه مع بعض .. من فوق الخيط تمررونه بين الاسنان علشان لو في بقايا اكل ماطلعتها الفرشه يطلعها الخيط ومن تحت يكون نكاشه نشيل الاشياء العالقه بين الاسنان مثل الللحم والدجاج اذا دخل بين الاسنان ..

صرت يوميا يوميا وباليوم كذا مره استخدم النكاشه او الخيط ليش؟؟ مع ان هالطريقه مو كويسه كثرتها بس لان مثل ماقلت لكم سابقا صارت عندي تخلخل بسيط بالاسنان هالشي اذاني جدا خصوصا اذا اكلت بروتين لحم او دجاج وهيك يدخل بين اسناني وياذني بشكل يصرع ما ارتاح الا اذا طلعته بالنكاشه مع انها احيانا تجرح لثتي

المفروض الحل الصحي والصحيح اني بعد ماخلعت الاسنان العقل اركب جسور او تقويم بس محسوبتكم تكره دكتور الاسنان بس خلصت العمليه انحشت وما عاد طبيت العياده ثاني مع اني المفروض ارروح :(


الاستخدام الطبيعي للخيط مره وحده باليوم ويوفضل قبل النوم قبل تفرشين اسنانك استخدميه علشان كل بقايا الاكل تطلع وماتسبب لا ريحه ولا احماض بالفم وتحلل المينا حقت الاسنان ..





غسول ( المضمضه) الاسنان:

غسول تستخدمينه مرتين الى ثلاث بالاسبوع عادي حتی لو مره هو يطهر ويعقم اللثه والاسنان وبعضهم فيه فلورايدا كمان يساعد ع تبييض الاسنان بس من ناحيتي ما اهتم اذا الغسول يبيض ولا لا اهم شي يعقم ويطهر اللثه وكمان اذا كان في الم او جرح باللثه يسكنها لانه يحتوي ع نسبة بسيطه من المخدر او المسكن للالم .. عموما انا هذي اخذتها من وصفة دكتور وانتوا شوفوا اللي يريحكم ..
طريقة استخدامه تاخذين مقدار منه  وتتمضمضين فيه حوالي ٦٠ ثانيه كذا  وخلاص وتبقين بعدها اقل شي نص ساعه ما تغسلين اسنانك ولا تشربين مويه ولا تاكلين
انا افضل اسويها قبل النوم علشان اضمن اني ماراح اكل ولا اشرب ..






أداة تنظيف اللسان :

هذي الاداة عباره عن قطعة بلاستيكيه  مخصصه للسان علشان تنظفه من بقايا الاكل وتشيل معاه الريحه الموجودة بين حلمات اللسان او هذي الغدد الصغيرات هههه ماعرفت اشرحهم لكم المهم  طريقتها تمررين الاداة عن طريق السحت يعني تكنك تسحبين لبرا كرري هالعمليه مرتين وراح ينظف اللسان بين المرتين اغسلي القطعه وارجعي استخدميها وكرري هالعمليه يوميا او متى ما حسيتي انك محتاجه
سعرها رخيص جدا ومتوفره باغلب الصيدليات والسوبر ماركت








منتج تبييض:  قوالب آي وايت للتبييض وازالة البقع من ع الاسنان  :





كتبت سابقا تجربتي مع هالمنتج بالانستا  وراح اكتب هنا كمان مع اني كاتبه عنه نبذه في موضوع أشياء خلصتها ..
هالمنتج عباره عن قوالب بلاستيكيه مغلفه كل قالبين مع بعض لمدة عشر ايام تقريبا وكل قالب فيه ماده تبييض تلبسين القالب لمدة عشرين دقيقه هيك وتشيلينه بس قبلها لازم تكونين مفرشة اسنانك ومنظفتها ..
استخدمتها مرتين والنتيجه حلوووه بس مو البياض اللي وااااو لا بس بالنسبه لي حلو لان سبق وقلت لكم اعاني من اصفرار الاسنان بسبب القهوه والشاي .. فرق اسناني درجتين تقريبا مع انه مكتوب عليه انه يبيض الى ثمان درجات تقريبا بس هم لا تنسون اساس اسناكم اذا هي فعلا بيضا راح تبيض واذا لا ماراح تشوفون نتيجه ومو معناها ان المنتج هذا سيء ..
تستخدمين الكرتون مره كل ست شهور فقط ممكن اول الاستخدام راح تحسون بحساسيه بعدها خلاص راح تتعودون ومو اي احد يلاحظ هالشي ع حسب قوة الاسنان نفسها
متوفره بالصيدليات الكبيره وسعرها حدود ١٠٠ وعليها ماذكر بالضبط بس النهدي يسوي عروض على منتجات الاسنان استغلوا العروووض ولا تفوتونها ...




هذا الشيء لا يمت بالعنايه بصلة ابدا بس حبيت اذكره لعل احد يستفيد منه او محتاجه لانه خاص بموضوع الأسنان  :
بخاخ المخدر للاسنان في حال الالم او الانتفاخ من شركة  .......... فيه نسب مختلفه للتخدير انا اخذ استخدمه لاسناني وللجلد كمان هههههه بتاع كلو اخليه بس ما انصح فيه كثير للاسنان لانه يأثر عليها كثرة الاستخدام خلووه للطوترئ وحالات الالم الشديد ..
انا استخدمته للالم اذا عندي اسنان ضربت علي ابخ منه بخه او بختين ويتخدر لحد ما اروح ع الاقل عيادة  ..

هالصوره من النت اللي عندي خلص ..





طيب ايش راح يكون مجمل نظامي او ترتيبه ؟؟

انظف اسناني بالخيط او النكاشه و بعدها افرش اسناني مرتين باليوم و مرات تكون مره خصوصا اذا كنت برا البيت  واستخدم المعاجين اللي كتبت عنهم فوق
اذا كان وقت معاجيين التبييض استخدمهم واذا لا معجوني العادي ..
اذا حسيت بطبقه اصفرار زادت استخدم كل ست شهور القوالب من آي وايت  واضطر احيانا البورده بس احاول ابتعد عنها
او سبوعيا استخدم المضمضه او الغسول ..


وبس والله  بالنهاية انا مو دكتور ما اقدر افتي لكم من راسي ومدري هل طريقتي صحيحه او لا لكنها تجارب ومستمره عليها ومحافظة فيها ع اسناني ..
اتمنى تستفيدون من هالتدوينه ولو بالشيء البسيط واتمنى اشوف تعليقاتكم هنا بالمدونه لانها تسعدني جدا واتمنى تشاركوني طرقكم وعنايتكم باسنانكم  ومنكم نستفيد ..
وأي سؤال اكيد عارفين اني راح اجاوبكم

دمتم بحب

معسلامه :)