اربن ديكي .. سيفورا .. بينفت .. نيكس .. انجلوت .. ميبيلين .. مكياجي .. منتجات الحواجب استخدمتها ورأيي فيها ..

السلام عليكم والرحمة ..

كيفكم وكيف الاختبارات ادري الكل مشغول ويذاكر بس لا مانع تاخذون بريك صغنن ع موضوعي وبعدها ترجعون تذاكرون :)

المهم مو هذي هروجنا اليوم لا ابد اليوم راح اتكلم عن منتجات حواجب استخدمتها من ماركات مختلفة وراح اكتب رأيي واستخدامي لهم ..

طبعا المنتجات مختلفه اقلام وجل وبودر وهيك يعني ..

راح اكتب انطباعي الشخصي ورأيي انا ومثل ما انتوا عارفين وسامعين هالجمله كثير ممكن الشيء اللي يعجبني ما يعجبك والعكس صحيح ووممكن هالشيء يناسبك ومايناسبني والعكس كمان صحيح ...

وأقصد بهالشيء ان البشرات تختلف من ناحية النوع واللون وكيذا ولازم بكل المنتجات نقيس هالشيء ونبعد عن التسرع في الشرآء اللي مال امه داعي ويطير فلوسنا وجهدنا ويخرب الميزانيه ...

كمان شطحت مره ثانيه عن موضوعي هههههههه مدري وش فيني  صايره اقرقر كثير هالفتره هذي :)

المهم راح ابدء بـأول منتج وهو من:  

المنتج رقم١ هو باليت من سيفورا Sephora

هالمنتج نفس اللي قبله باختلاف اني ممكن ارجع اشتريه ثاني او لا
لا ماراح ارجع اشتريه ثاني مو عيب فيه ابد لا والله بس حسيت فيه مثله كثييييير وهذا سعره حلو ومناسب للجميع اذا مو غلطانه سعره حول ال٧٠ ريال كيذا
ودرجتي فيه نفس الشيء ميديوم ومتوفر منه درجات
الباليت فيه لونين درجة داكنه والثانيه فاتح والثالث كمان شمع شفاف لنفس الغرض للتثبيت بس حسيت شمعهم كريمي اكثر من تبع اربن ديكي 
الدرج اللي تحت كمان فيه ملقط وفرشاة ومشط حواجب وحببببيت مشط الحواجب اكثر شي وكثثثثير استخدمه اول مره يفيدني شيء من هالعينات خخخخخخ

  ٢- اربن ديكي  باليت الحواجب .. Urban Decay

اخذت هالصوره من مدونه شووق لان اللي عندي خلص وغير قابل للتصوير :(

هالباليت حجمه صغنن وكيوووت حبيته فيه لونين واحد داكن والثاني فاتح واللي تحت هو شمع شفاف علشان تثبيت البودره ويجي تحت زي الدرج فيه ملقط وفرشاتين لرسم الحواجب
وطبعا مثل ما انتوا عارفيني اني اسمي فرش الباليتات فرش ابو ريالين ههههه لان ماعمري استفدت منهم بس احب احتفظ فيهم وماحبهم يضيعون من الباليت مدري ايش السبب ههههههههه


اللون جميل ومناسبني كنت امشط الحاجب وامسح بعدها عليه بالشمع واحدد الحاجب بفرشاة مشطوفه من كوستال سنت باللون الداكن وارسم الاطراف والرسمه اللي ابيها لحاجبي وبعدها اعبي باللون الفاتح وادمج مابين الاطراف وداخل الحاجب وارجع امشطهم ويكون الوضع تمام عندي ..


الدرجه من هالباليت اللي عندي ميديم وفيه لون اغمق من اللي اخذته ....اخذت الباليت من سيفورا البحرين ومتوفر باغلب فروع سيفورا وسعره حول ال١٠٠ ريال ناسبه بالضبط كم  بس هل ارجع اشتريه ثانيه ايه ممكن لو مثلا ماحصلت منتج ثاني عجبني ...

المنتجات  هذي  من بينفت Benefite 

 بالبيت brow zings

الباليت الي عندي درجة ميديم وفيه درجتين غير هذي اللي عندي
سلمكم الله الباليت فيه باودر للتعبئه الحاجب والجل علشان نرسم الحاجب او لعمل شعرات في مقدمة الحاجب او نهايته
ويجي كمان مع الباليت فرشاتين وملقط بس كالعادة ما استخدمهم

هالباليت صار عليه اختلاف اراء كثيييير كثيييييرر في ناس حبوه وفي ناس سبوووه من زود ماعجبهم
انا عني شخصيا حبيته اشوفه كوويس صحيح ماهو واااااااو بس ممكن ارجع اشتريه لو مثلا احترت وش اخذ
موجود في سيفورا وكمان محلا وجوه وسعره ب١٠٠ وعليها ناسيه بالضبط كم ...

قلم ال حواجب  instant Brow

هالقلم تكلمت عنه سابقا بالانستا والسناب اني حبيييييته واحببببه الى الان بشكل مو طبيعي اول مره اعشق اقلام العاده افضل الجل اكثر او البودر لكن هذا حبيته يعطي لوك طبيعي للحاجب والطرف الثاني فرشاة السبولي الخاصه بتمشيط الحواجب ويندمج القلم صح ..
اول ما ارسم فيه كريمي جدا وبس ادمجه يتحول ع بودري اكثر ثباته وسط ما يطول كثييير ومااظن استخدمه لمناسبات ابدا 
والعيب اللي فيه يخلص بسسرعه  لاني استخدم البرايه وبسرعه صغر حجمه :(
ناويه اخذ جديد منه  وانصح فيه للي ماتحب اللوك الحاد او اللون القوووي ع حاجبها ..

ماسكرا ال حواجب Gimme Brow 

ماسكارا الحواجب هذي ماكنت افكر اجربها مدري ليش كنت اظن اني مكتفيه باللي عندي لكن يوم وصاني جربتها حبيتها تثبت الحواجب وتشيل الغبره من بعد البودره ،،
هي مافيها لون كثيير يعني صبغتها مو قوويه لكنها تنفع يومي والاحلى ما تسوي الحواجب يابسه  والحلوووو  فرشاتها صغننه صغييره تنفع تمشطين فيها شعر الحاجب بدون لا تعدم لك الدنيا ..
اتوقع اذا خلصت راح اخذ لي مره ثانيه لاني حبيتها

إضائه تحت الحاجب High Brow 

هذا القلم إضائه مات لتحت الحاجب كريمي بشكل ورهيب بالدمج حلوووو احبه جدا يساعد ع تنظيف تحت الحاجب وينور المنطقه بشكل حلووووووو عندي مثله بلمعه بس انا استخدمه لمدمع العين وهذا احبه اكثر لتحت الحاجب لانه مطفي ويعطي لوك طبيعي اكثر من اللمعه
واذا بستخدم اللمعه للمناسبات فقط ولو اني افضل المطفي أكثر ..

المنتج الرابع من نيكس NYX

 قلم كحل للحواجب وكمان ينفع للعين .. بس انا استخدمته للحواجب لانه كريمي جدا وينفع للدمج والرسم كمان ويمشي ويخط بسهوووله
القلم حجمه وسط يجي مغلف بكرتونه سعره ماسيته بالضبط بس متوفر بكل محلات الميك اب واكثر شي في سنتر بوينت قسم المكياج في ستاند نيكس
القلم لونه بني اتوقع يناسب الكل وكل البشرات مدري والله بس انا حسيت كذا
جميل وسهل وينفع للشنطه والسفر ويسهل بدل ماناخذ باليت حواجب علشان نضبط هذا هو المنقذ دايم موجود بشنطتي علشان اعدل حواجبي في حال خف اللون او انمسح من النقاب او الحجاب وهيك
بس العيب اللي فيه اذا حركت حواجبي باصبعي او حكيتهم يمشي اللون ويفضحني هههههه ويصير خطوط حول حواجب مكان اللي حركت فيه الحاجب هههه
فا علشان هيك خليته بشنطة مكياجي علشان لو انزنقت اعدل فيه ..

 المنتج الخامس من انجلوت ..Inglot

جل لاينر لونه بني كريمي استخدمته لتضبيط ورسم الحواجب .. ولا اساسا تقدرون تستخدمونه لرسم العيون ،،،
متوفر طبعا بمحلات انجلوت انا اخذته من فرع انجلوت سيتي سنتر البحرين وكان سعره ١٠٠ ريال مدري هل هاللون سعره غير عن الاسود والالوان الثانيه لان انا اخذت منهم لون اخضر واسود وكان سعرهم حول ٧٥ ريال اذا مانسيت
فيه عيبانا يجف في علبته لو خليتيه شوي نفتوحه بس من ناحية ثبات اللون والرسمه اعتبره بطل جدا صحيح يخف اللون بس ماتروح الرسمه وتختفي مثل بعض المنتجات الثانيه
طبعا احدد الرسمه واعبي الحاجب بنفس الجل استخدم معاه فرشة ريل تكنيك المشطوفه من المجموعه الفضيه وحبيتها معاه وهذا الشيء اللي الحين انا معتمده استخدامه لاني مرات احب اغير من رسمة حواجب وهذا الشيء ضبط معاي لان ثابت وما احاتي كثير ان راح تختفي رسمة حاجبي ...

فيه منه درجتين البني فيه دارك براون نفس اللي عندي وفي لون افتح منه نسيت بالضبط ايش اسمه ...
واحس هالمنتج بالنسبه لي شخصيا تفوق ع الكل ونال اعجابي ..

المنتج السادس جل من مابيلين Maybelline

مابيلين عندهم جل لاينر وبنفس الوقت للحواجب لوونه بني وفيه منه اسود بس انا اخذت البني
لونه بني داكن اتوقع يناسب اغلب الوان البشرات اللي عندنا 
فيه لمعه شوي بس اذا انحطت عالحاجب ماتكون واضحه ابدا..
العلبه عندي اياها لها فتره واستخدمتها مده طووويله وكنت جدا مرتاحه معاه وماشفت اي تاثير ع حاجبي من تساقط او غيره لان دايما يقولون الجل يساقط الحواجب اذا استخدمناه يوميا .. تركته هالفتره وبدأت استخدم غيره لاني انا بدأت أغير من رسمت حواجبي وصرت ارسم ع الجلد فا مانفع معاي لان ثباته ع الجلد مو قوي يعني ينمسح بسرعه اذا لمسته او لبست حجاب او غيره
بس للبيت او الزيارات اللي جدا سريعه ممكن ارجع استخدمه ثانيه
بس هم هو خيار ارجع اشتريه ومتوفر باغلب الاماكن وسعره جدا كويس ومناسب تيجي معاه فرشه بس ابدا ماحبيتها لا للحواجب ولا للعين ..

المنتج السابع قلم كحل من مكياجي ..

القلم هذا كمان ينفع للعين وللحاجب وفيه طرف الثاني  اسفنجه وماعمري استخدمتها طبعا  لونه قريب جدا جدا من جل مابيلين..
ابدا ابدا ماحبيته للحاجب وما راح استخدمه ثاني لحواجبي ممكن للعين افكر فيها ..

بس ابدا مافيه ثبات ابد بسرعه يطير واي حركه طااااااااار ويسوي خطوط حول الحواجب :(  يعني مستحيل استخدمه لرسم ممكن لو تعبئه خفيفه 
سعره جدا رخييييص ومتوفر فقط بمحلات مكياجي ..
بس انا مانصح فيه نهائي للحواجب  ..

هذا المنتجات المخصصه للحواجب اللي جربتها وعادة استخدم كمان شدو بني في أي باليت يكون لونه مطفي ويناسب لون حاجبي يعني ما اتعطل ع باليت حواجب او قلم كلهم زي بعض

اتمنى عجبتكم التدوينه واستفدو منها ..

دمتم في امان الله وحفظه ..