أشيـــاء خلصتها هل برجع اشتريها أو لا؟! ــ الجزء الأول

مراحب

يا هلا والله وغلا

مسسسساء | صبــــــــاح الفل ..

هالتدوينه من سنة الدبس ابي اكتبها بس ماااش الكسل مكسلني .. قبل كنت اتعذر بالبرد والشتاء واقول هالشتويه بارده مالي خاطر اتحرك وكيذا

والحين انقضی البرد بس ابد بعده من داخلي فيه انه شتاء داخلي هههههههههههه

المهم ان المنتجات هذي لي فتره طويله مخلصتها ومجمعتها تحت مكتبي لحد ما صاح مكتبي يستغيث من الاغراض  والكيس بينفجر والله  من العلب قلت يا بنت الرحمه زينه ..

فا قررت اكتب هالتدوينه واصورهم وخلاص اقول لهم بااااي واطلق سراحهم  ..

الصوره هذي  مالها علاقه بالموضوع بس حبيت اخليها مقدمه حلوه للموضوع هههههه

طبعا المنتجات متنوعه من منتجات شعر وجسم وهيييك

راح احاول اختصر الموضوع قد ما اقدر لان حسيت بتكون الصور كثير والقرقر كثييير فا جيبوا دلة الشاي والقهوه  وحلى   وتكوا هنا معاي واستمتعوا بتدوينتي :)   <<< ثقه اقوى شيء

يلا نبدأ مع منتجات الشعر  ...

أول حاجه هي شامبو قارنييه من لاين الترا دوكس مكتوب عليه انه من خلاصة طبيعيه وانا اخذت بثلاث انواع العسل
هو لتجديد بنية الشعر التعبان والتآلف رأيي عنه ممكن أوجع أشتريه لانه ناسبني نوعا ما ليش نوعا ما ؟ لاني الى الان في رحلة البحث عن شامبو يناسب شعري من كل النواحي  جربت اللي بالافكادو والشيا وللاسف ابد ما ناسب شعري صار مدهن ومتلاصق وماقدرت حتى أكمله لان طبيعة شعري ناعم وما تحمله فا اتوقع يناسب ذوات الشعر الجاف او الخشن جدا فا اعطيته ولدي يتخدمه لانه شعره شوي جاف ..

معليش بنات ع العلبه بتفكرونها وسخه لا والله مو وسخ هذا هذي املاح من مويتنا بمنطقتنا للاسف مالحه جدا وتترك اثر ع كل شي منها العلب وهيم فا راح تشوفون علب بالصور الجايه كذا اعذروووني ..


نكمل هذا المآسك من نفس مجموعة غارنييه ونفس الشامبو تتركينه ع الشعر ثلاث دقايق هيك وتغسلينه طبعا بس ع اطراف الشعر مانحط ع المنابت لان تسبب تساقط بالشعر .. حليو مو حلو يعطي طراوه للشعر ويلين الشعره
خلصته وما اظن اني راح ارجع اشتريه عكس الشامبو ماحسيته واو او نتيجته مبهره او مختلف عن الماسكات المتوفره بالاسواق يعني نتيجته حاله حال اي ماسك موجود 

شامبو المكاديما هذا انتشر انتشار وااااسع وكبير بين البنات العربيات والاجنبيات بعد واخذ ضجة كبيره وفعلا رحت اخذته وجربته ما اعجبني كثييير وماراح ارجع اشتريه ع انه مكتوب عليه انه خالي من السولفات والبارابين وفعلا ما يرغي كثيره ورغوته شبه معدومه وانا صراحه ما يجبر خاطري الشامبو الا اذا شفته يرغي احسه ينظف عكس اللي مايرغي مع ان يقولون اللي مايرغي صحي اكثر بس ماش عجزت اتقبله وماراح ارجع اخذه  ومتوفره بمحلات نزيه ..

شامبو من اورقانكس انتشر مؤخرا واشتهر وخصوصا اللي بزيت الارقان لكني اخذته بس لسى ماجربته بس  كمان هالشامبو من خلاصة طبيعيه واخذت بالكوكونت ( جوز الهند) ويجي معاه بلسم بس اخذته لحاله اجربه .. عجبني حسيته ينظف فروة راسي بقوه واحس هييك فيها هوااا تتنفس مدري احساس جميل الا انه فيه عيب شوي يسوي في شعري نفشه بس رجعت اخذت منه ثاني وتو بديت استخدمه تحصلونه بالدانوب ولولو ماركت وسنتر بوينت وسعره حدود ٥٠ ريال هيك

شامبو من لوريال الفيف جربت هالنوعين هذا وقت انتشاره الانستاجرام مليااااااان منه الكل يمدحه وشركة لوريال ما بقى احد ما ارسلت له هالمجموعه الا أنا هههههه فا جاني فضول اجربه وفعلا اخذته الا إنه نفس صديقه تبع غارنييه بالافكادو ابدا ابدا ماناسبني ينفع اللي شعرهم جااااف لانه نسبة الترطيب اللي فيه عااليه  وانا ما ينفع لي كذا يلصق شعري لدرجة يصير كأني حاطه بشعري زيت بعد ما اطلع من الشآور وتجيني حكه فا كرهته وماقدرت استخدمه لان حسيت راح يدمر لي شعري وجربت كمان معاه بديل الزيت حقهم وبرضو ما صلح لشعري فا اعطيته ولدي << ولدها حقل تجارب لها  ههههه

المهم ما راح ارجع اشتريه ابدا لان ما صلح لشعري :(

شامبو وبلسم من تريسمي للشعر المصبوغ ماراح اتكلم عنه كثير لان لي تجربتين معاه ونفس الشي ماحسيته فعلا للشعر المصبوغ وقتها كنت صابغه شعري جديد لون اشقر رمادي ونصحتني اللي بالصالون استخدم شامبو مخصص علشان يحافظ ع مدة الصبغه بشعري اطول فتره ورشحت لي اياه وفعلا اخذته وما اخذت شهر الا الصبغه رايحه ومافي شي وحسيته شامبو عادي جدا لكن في اسوء الحالات ممكن اني اخذه لانه مو سيء كثير بس اكيد راح اخذ نوع ثانيه منهم

خلصنا الشامبو نجي لاشياء متفرقه للشعر منها حبوب  برايورين مكمل غذائي مفيد لللشعر مكوناته عشبيه  مو كيميائيه من اهم مكوناته الدخن وعرفين ان الدخن مرا ممتاز جدا ،،، استخدمته حول خمس شهور والحمد لله شفت نتيجه منه بالشهر الرابع كذا صار عندي بيبي هير كثير خصوصا بمقدمة الراااس وشوي اظافري تحسنت بعد ما كانت صفرا وتتكسر لو المسها الحبوب بشكل عام جدا جمييييييل ورائع لكن اللي يعيبه سعره الغالي وانه يزيد الوزن شويات بس مع الرياضه وهيك ماراح تحسين انشاء الله .. اللهم الحين وقفته صار لي عارض صحي وتوقعت انه منه فا اذا طلع براءه راح ارجع اكمله

هنا هذا الشيء مختلف هذي صبغات مؤقته للشعر من شركة أمور بخاخ تصبغينه باالوان اللي تحبين انا جربت ثلاث الوان اللي هو الموف البنفسجي والاحمر والذهبي طبعا من البدايه لازم اقولكم ان لازم شعركم لونه فاتح اشقر ولا ماراح تبان ابدا ابدا واذا بانت بتكون لمعه فقط اكثر من لون الفكره حلوه اذا مو حابه تعدمين شعرك بالالوان الكريزي هذي وخصوصا ان طايحينن فيها هالفتره موووضه هذي تبخينه ومتى ما زهقتي منها باليوم تغسلينها بشامبو وتروح

من عيوبها تطبع بالشيله اذا انتي محجبه وكمان تنزل بالمشط او الفرشاه يعني ثباتها مو قوووي ابدا يعني بخيها حالا وقت مثلا حفله او مناسبه ولا تلمسينه لان اذا حطيتي شي ع شعرك راح تخف وتطبع يدك وسعرها رخيييص جدا انا اخذتها من لولو هايبر ماركت قسم الصبغات  وماراح ارجع اشتريها هي فكرة للتجربه وخلاص ..

سيروم كريستال الحليب من شركة اينرجي هذا السيروم قوامه كريمي اكثر من سيروم خفيف ع الشعر ومايدهن فيه ابد ينفع تستخدمينه ع شعر قبل الاستشوار او بعد بمسحه خفيفه يهجد الشعر المتطاير ويعطي لمعه للشعر حبيته وممكن ارجع اشترريه ثاني لانه افضل من السيروم الثاني اللي من نفس الشركة الصوره الجايه راح اكتب لكم عنه ،، وهذا سعره رخيص مايتعدا ال٣٠ ريال ومتواجد بكل الصيدليات والسوبر ماركت انصح فيه وانا شخصيا حبيته ..

هذا السيروم الثاني المشهور جدا من نفس شركة اينرجي سيروم قوامه ثقيل كثيف سيليكوني اذا كثرتي منه نقطه زياده يدهن شعرك ينفع قبل وبعد الاستشوار  انا ماحبيته بس استخدمت منه كثيييير اكثر من ثلاث علب مع ان قبل سنوات استخدمه واتركه وارجع ثاني مدري ليش معلقه عليه بس هالفتره خلاص ماعاد بستخدمه احس يساقط شعري ومتوفر كمان بكل مكان وسعره رخييييص

سيروم من غارنييه ضد التقصف هالشيء هذا ابدا ابدا ما سوى لشعري اي شي لا فاده ولا ضره اللهم اللي فيه ان ريحته جميييله وحلوووه كنت اذا حطيت في شعري خلطه وابي اتخلص من ريحتها استخدمه ريحته عطرريه هيييك وهل برجع اشتريه ثاني؟ لا ماظن اشتريه مو لانه سيء بس لان ماحسيت انه يستاهل ارجع اخذه

كريم الشعر من برت بلس ماراح اقول عنه شيء الا إنه أسوء منتج شعر جربته فيهم كلهم اذا حطيته بشعري كاني مذوبه  حلاو المصاص وحطيته بشعري مدري ليه كذا دبق دبق بشعري بشكل ورميته ما استخدمته وماراح اشتريه لو يعطوني اياه ببلاش ههههههههه << واضح حاقدة ع المنتج :)

كريم الشعر من فيكتوريا سيكرت علما انه هذا من مجموعاتهم القديمه  اسمه سو سكسي هههه المفروض اسميه سسو سلكي او سو بلاستيك
هذا عباره عن مثبت او كريم للشعر معطر ريحته جميله بس للاسف اذا حطيتيه بصير شعرك كانه شعر لعبه او كانك صابه ع شعرك بيبسي وجف وصار كانه اسلاك هههههه والله جد ماعرفت اوصف الشعور كنت اذا استخدمته ماحب امرر شعري ع يدي احس بشعور يلوع الكبد مدري شلون المهم تركته وماراح ارجع اشتريه ثاني ولا اي كريم نفس الطريقه
اذا ابي تعطير للشعر الخمريات وعطور الخاصه بالشعر افضل بكثير من الكريمات هذي 

حمام زيت فاشكول :(
هالمنتج اخذ شهره عاااااااليه كثير وضجه جدا واسعه خصوصا هذا اللي بالثووم  حتى الصالونات صاروا يستخدمونه وكان سر من اسرار بعض البنات لدرجة ماتبي تعلم عن السر هذا ههههههههههههه وفعلا او ماعرفت عنه استخدمته وكان وقتها كووويس بس بعدها بفتره تركته مده طووويله وسنين ورجعت ذكرته واخذت هالحجم الكبير وللاسف طاح بكبدي فجاه ماناسبني ويجفف شعري يصير يابس من استخدمه وغير كذا يساقط شعري بالهبلب خفت منه اني اصير قررررعه هههههه فا تركته وابد ماراح ارجع اشتريه للابد هههههه
علما هذي تجربه شخصيه يمكن بعض البنات للحين يناسبهم وعاجبهم

منتجـــــات البشـــــــرة :

كريم الحليب من نيفيا فيزاج هو كريم مرطب وبنفس الوقت منظف للبشرة ماحبين هالمنتج ابدا وللاسف حسس بشرتي منه وماراح ارجع اشتريه ثانيه بكل بساطه فيه منتجات افضل منه بمراحل ..

مقشر او غسول يومي من جونسون هذا النوع لجميع انواع البشره فيه منه للبشرات الحساسه حبيييته جدا لطيف ع البشره وناعم وينظف ويقشر الوجه بشكل ناعم  حبيته وكنت استخدمه يوميا ع انه سكراب بس ما حسس وجهي ولا اذاني وراح ارجع اشتريه ثانيه انشاء الله  ومتوفر بكل الصيدليات والسوبر ماركت

صابونة الافريقيه من ايهرب من شركة نوبيان هذي الصابونه بالشوفان والفيتامين ايه والصبار جدا لطييفه هالصابونه حبيتها تجفف الوجه شويات وتشد البشره وتنفع للي عندهم حبوب في البشرة وسعرها رخيص بالموقع حبيتها وممكن اطلبها ثاني بس حاليا اجرب من نفس الشركة صابون بالجوجوبا حبيتها كمان وبس اخلصها راح انزلها بالجزء الثاني اذا حابين 

مزيل التعرق من ليدي سبيد ستيك من أفضل مزيلات العرف اللي استخدمتها مهما اغير عنه ارجع له ثاني جدا مناسبني بغض النظر الكلام اللي طلع عنه الا اني استخدمه لسنوات طويله وكل مره اخذ نكهات غير وكلهم نفس المعفوووول قوي ويتحمل في صيفنا ليوم كامل بس انتبهوا فيه منه نوع مضاد للتعرق وفيه هذا النوع للاستخدام اليومي 

اعشششقه وراح ابقى اشترررريه 

هذا كمان مزيل العرق من ليدي سبيد ستيك بس بخاخ  هذا النوع مستورد مو متوفر بكل مكان الا ان الستيك تفوق ع البخاخ هذا ماحبيته ماحسيته قوي يكفيك نص نهار بيومنا الحار ع انه ريحته جميله وحلوه وعيبه انه بسرعه يخلص ما يطول كثير وسعره غالي لانه مثل ماقلت مستورد 

بايوديرما مزيل ميك اب وتونر بنفس الوقت هذا استخدمت منه كثيييير وعلب كثيره خلصتها هالمنتج جدا جميل ورائع وخفيف ع البشرة وينظف المكياج من قلب وفيه خاصية قابض للمسام يعني ينفع تستخدمينه كا مزيل ميك اب او كا تونر للبشره وقت العناية فيها متوفر باغلب الصيدليات عيبه سعره المرتفع وفيه بديل حاليا استخدمه هو غارنيه وارخص منه بمراحل ونفس المواصفات لكن هل ممكن ارجع اشتريه؟ نعم ارجع في حال ماتوفر لي غارنييه 

مقشر وسكراب او صنفرة بالمسمى اللي تحبون من نيفيا فيزاج من لاين الصبايا ابدا ابدا ماحبيتها قوامه سائل والحبيبات كانها متناثره هو ع اساس انه ناعم لكن ابد ابد  مايصنفر الوجه صح كانها غسسسول اعتبره منتج سيء ومستحيل ارجع اشتررريه  ومتوفر بكل الصيدليات والسوبر ماركت ..

منتجات من باث اند بودي ورركس استخدمت من هالماركه اشياء كثيييره واغلبها عجبتني وبين فتره والثانيه ارجع اشتري منها شموع ومعطرات جسم او صابون يد او حتى غسووول الجسم رووعه والاروع الزبده حقت الجسم ترطيبهااا مو صاحي رووعه ترطب الجسم بدون ماتترك الجسم دسم او زيووت استخدمت مجموعات ونكهات رووعه والريحه نوعا ما ثابته واستغلوا وقت التخفيضات تطلع لكم الاشياء ببلاش وانصح فيها كل بنت حابه تاخذ مجموعه ..

استخدمت من بودي شوب مجموعه الفراوله الزبده والشاور جل والليفه حقتهم والصابون الصلب وكثيير اشياء كمان اعتبرها مجموعات حلوووه وفي متناول اليد هل برجع اشتري منهم ممكن ارجع بس اخليه اخر خيار لان باث اند بودي تفوق عليه في المجموعات والروايح 
كمان استخدمت من عندهم باث اند شاور جل من مجموعه زهرة الكرز الياباني رووعه استخدمتها كا ببلز (فقاعات او رغوه للبانيو ) رههههيبه وفعلا تعطي رغوه كيره وكثيفه وريحتها حلووووووه اذا كنتي بخاطرك تسترخين بشاور بفاقاعات انصحك فيها 

شاور جل من دوووف استخدمت نوعين واحد للبشره الحساسه بالرمان وابد ماعجبني مايرغي حسيته ينفع للي اجسامهم تتحسس من الرغوه اما الثاني كان تمام وارجع اشتريه لانه كوويس ومتوفر بكل مكان تحصلونه ..

طين المغربي اللي نستخدمه مع الحمامات المغربيه اخذته من عطار بمجمع الحياة بلازا مدري امدحه ولا اذمه ولا اصلا ماله داعي ماحسيت منه بفرق وااو او شيء يذكر جدا عادي وسعره رخييص ويكفي الى خمس مرات استخدام 

سكرابات من بودي شووب اليمين سكراب مغربي خفيف قوامه الى سائل شوي غير كثيف عني انا شخصيا ماراح اشتريه هو مو سيء لكن حبيت اللي ع اليسار اكثر منه كمان استخدمت من نفس المجموعه كريم مرطب للحمام يعني توزعينه وجسمك شبه مبلل رووعه وخطير بس للاسف رميت العلبه اما السكراب الثاني اللي عاليسار هذا افضل من الاول  بمراحل جميل جميل ينعم ويفتح وقوامه كثييف وحبيباتته تقششر صح يعني اعتبره مجملا كامل المواصفات بالنسبه لي احب السكراب يكون كثيف وحبياته شوي خشنه ويقشر الجسم صح وحجمه كوووويس يكفي لعدة استخدامات عكس االول صغييير ومتوفرين ببودي شوب بس ماعرف اذا الي الان متوفرين او لا ..

سبا ميلك سلت اللي هو ملح الحليب اشتهر بقووووووه كسكراب او صنفره للجسم ترا ماتنفع للوجه ابدا ابدا ابد تحسس الوجه انتبهوا اصلا الجسم تحسسه كيف الوجه
المهم هالشي حبيته وماحبيته لحاله ابدا ماحبيته وممكن اضيفه لخلطات او سكرابات ثانيه خفيفه علشان يثقلها الا انه احيانا يسبب لي تهيج بالجلد اخذت من نفس الفكره نكهات ثانيه وافضل من بكثييييير بالتوت وهيك صناعه كوريه اذا مو غلطانه تلاقونهم بالصيدليات واسعارهم جدا رخيصه ماتتعدى ال ١٠ ريال

كريم مرطب من شركة فرنسيه طبيه وقسم حتى ما اعرف اسمها ههههه خلصته وانا ما اعرفه بس يابنات هذا الشي جميييل جميييل وترطيبه حلو وناعم للوجه وغير معطر وهذي الميزه الحلوه فيه المشكله اخذته من صيدلية بالكويت وموجود عندنا ولا لو فيه راح اشتريه مررات ومررررات لانه رهييييب بكل معنى ،،،

سكراب من شركة فارمسي هذي شركة تركيه  اخذت بنكهه الشيري  (الكرز) وللاسف من اسوء السكرابات اللي استخدمتها جدا سيء سيء وماينفع ولا يسوي حاجه سااائل جدا وغير كذا العلبه ما يجي نصها احسهم غشاشين المهم اني  استخدمته احلل سعره ع انه سعره رخييييص جدا ومتوفر بكل مكان بس ابد ما انصح فيه ومستحيل ارجع اخذه

مجموعة الفايتمين ايه من بودي شوب استخدمن المجموعه كامله تقريبا من الفيس ميست ومرطب الوجه والشفايف وكمان مناديل ازالة المكياج كلها المجموعه رهيبه وتعالج الوجه وتغذيه وممكن ارجع اشتريها ثاني ناسيه اسعارها بس اعتبرها من المتوسطه الى الغاليه كمجموعه ..

غسول الجسم والشعر من بودي شوب من مجموعه رجاليه برائحه الوايت مسك (المسك الابيض) كويس وحلوو انا جربته يمكن مرتين فقط وحبيته جربه الهازبند لحد ماخلصه عجبه كا شاور جل بس للشعر ابدا ماعجبه وممكن نرجع نشتريه وحاليا استخدم معاه العطر من نفس المجموعه ينفع رجالي ونسائي وبرضو جمييل وهادئه  ،،

بودرة مكيوناز هذا الاختراع الجميل للصيف نعم للصيف وبس هالشىء توزعينه ع جسمك او اقدامك يمنع تكون البكتيريا او الفطريات بالجسم سواء للاقدام جدا ممتاز يمنع حتى تكون الروايح فيها وكمان بالجسم تحت الصدر او منطقة الاندر ارم (الابط) او اي مكان تحسينه يعرق وممكن تتكون فطريات وبقع حمرا تسبب حكه او هيك شي استخدميها وسعرها جدا رخيص حول ٧ ريال هيك ومتوفره بالصيدليات فقط وفي مثلها نفس النوع اسمها دكتارين بس رميت العلبه جدا ممتازه ورووعه وانصح فيها واصلا ما استغني عنها ابدا ..

كريمات مرطبه من دووووف  الاول ع اليمين لليد رووعه وجميل كنت خليته للشنطه لان حجمه صغير وغير كذا ترطيبه حلوووو ومايدبق باليد حلو وممكن اشتريه بس حاليا استبدلته بكريم من لوكستيان رووعه كمان وهذا متوفر بكل مكان تحصلونه اما الكريم الثاني ترطيبه مركز وعالي الا انه شوي يترك اثر دهني ع جسمي واستبدلته بكريم كيو في طبي وغير معطر 

كريم الليل من بوندس هالكريم قوامه مائي خفيف ما يكتم البشره وناعم ورقيق ع الوجه يرطب البشرة بشكل جميل
ويعطي لوك فلولس للوجه متوفر بكل الصيدليات والسوبرماركت سعره شوي غالي لكنه يستاهل

منتجات الأسنان :

معجون الاسنان من كرست ثري دي مبيض للاسنان انا حبيته ومو بس راح ارجع اشتريه انا رجعت وخلصت واخذت منه انواع ثانيه وجالسه استخدمهم حبيته جدا ومتوفر باغلب الصيدليات والسوبرماركتات الكبيره عندنا زي الدانوب والتميمي ولولو هابير ماركن واي ماركت يجييب اشياء مستورده 

قوالب لتبييض الاسنان اسمها آي وآيت القوالب هذي تستخدمينها كل ست شهور فقط 
تجي قالبين مغلفين بغلاق واحد للفك العلوي والثاني للسفلي تلبسينه هيك مكتوب عليه انه ممكن يبيض الاسنان حتى ثمان درجات بس انا ماشفت هالفرق هذا كله يمكن بيض اسنانس درجتين او ثلاث وانا اعتبره كوووويس جدا بالنسبه لي لاني اشرب قهوه كثيير وتصفر اسناني بسرعه
شخصيا اعتبر المنتج جميل وممكن ارجع اشتريه ثاني لاني حبيته وسهل استخدامه واعتبر نتيجته مرضيه لي








وبس هذي تدويني لليوم ماحبيت اطولها اكثر ممن هي طويله خليتها ع جزئين افضل علشان ماتملون وتزهقون انشاء الله تستفيدون ولو بشيء بسيط واللي عندها سؤال عن اي منتج حابه اجاوبها عنه بالتفصيل تكتب لاكومنت تحت او بالانستا وانشاء الله راح اجاوبها وماراح اقصر عنها 

واستودعكم الله وفي أمانه 
معسلامه :)