Tony moly Shiny Foot|تجربتي مع مقشر الأقدام من توني مولي

مرحبـــــا صبايا ..

تجربتي في هالتدوينه مع : 

مقشر توني مولي فوت شاين Foot shain  طبعاً  التقشير للاقدام جميل ومفيد ترجع القدم بيبي . ولكن 

اللي مضايقني المده والكيفيه اللي تاخذها بس النتيجه أعتبرها ممتازه  وبطلة وتساهل ..

لكن طبعا بتقولون النتيجة تروح بسرعه ! كل شيء تسوونه في نفسكم لازم تحافظون عليه ماينفع نسوي شي ونتركة ونقول مافاد او راح بسرعه ..

طيب في هالتدوينه راح اتكلم عن تجربتي بالتفصيل علشان تعرفون بالضبط وممكن بالاخير أكتب لكم مقارنة بينة وبين مقشر ميلكي فوت ..

أول حاجة المنتج كوري لانه بكل بساطة من شركة توني مولي وهي شهيرة بمنتجاتها الكورية ..

المنتج يوعد: بأقدام ناعمتين وخالية من الجلد الميت والخشن والقشور بطريقة سهله بدون فرك أو دعك للقدم .. التخلص من الروائح في القدم .. تعزيز الترطيب بشكل أكبر للبشرة  .. يخفف من التصبغات ..

 

محتويات العلبة :

١ زوج جوارب  - المحلول ع شكل القدمين  - المرطب للقدم  كما هو موضح بالصوره ادناه ..

طريقه استخدام المنتج: 

قبل لا اقولككم الطريقة : يفضل استخدام المنتج اذا مافي عندكم طلعات او مناسبات لان التقشير ياخذ أيام ..

- أول حاجه لازم تكون القدم نظيفه ومغسوله ونجففها بمنشفة .. و نفتح الجوارب ونضبطها لان بداخلها حاجزين تتعدل علشان المنتج السايل  وتنلبس بعدها مضبوط ..

ثاني حاجه  المحلول اللي هو على شكل اقدام وموضح عليه لليمين واليسار  ونفتح  بحذر لإن المحلول  جداً سايل ..نفرغ كل محلول بقدم ونسكر الجورب كويس  .. فيه لصقة نلصقها كويس علشان مايطلع المحلول .. وبعدها نكرر العملية نفسها للقدم الثانيه .. بعد ما ننتهي  نضغط عليها شوي أو ناخذ وضعية الوقوف  علشان يتوزع المحلول لكل منطقة ونتأكد أنه وصل لجميع الاماكن..

 نصيحه خفيفة : يفضل عدم استخدام المنتج بوضعية التمدد او رفع الاقدام  .. لانه  مثل ماذكرت المنتج سائل جدا وراح يطلع لبرا و يتكب .. فـ وعية الجلوس أفضل ..

 

بعد ما نتأكد أنه الوضع تمام والقدم وصلها المحلول نتركها ساعه إلى ساعه ونص تقريباً ..

وبعدها يتم التخلص مباشرة من الجوارب وغسيل القدم كويس بالماء الجاري الفاتر ..

بعدها نرجع نجففها كويس ونستخدم لها الكريم المرطب .. 

مكونات المحلول: 

مكوناته الفعالة من الأحماض الألفا هيدروكسي مثل حمض اللاكتيك وحمض السالساليك

وكمان مواد موازنة ومرطبه للجلد مثل الجلسرين والخروع  وزيت الارجان و المكاديميا  والجوجوبا وزيت فايتمن ايه  وخلاصة الصبار  ..

أيضا يحتوي ع عصارة الفواكههة و الأعشاب  مثل النعناع واللافندر  والكاميليا وأزهار العسل  وخلاصة الليمون والبرتقال والكاميليا والروز ماري ..

أييضا يحتوي ع جل الحلزون ليساعد ع ترميم الجلد وتجديدة 

ومذكور إنه مايحتوي ع بارابين ولا  سلفات لكن يحتوي ع مواد عطرية و كحول بنسبة عالية ..

أيام التقشيرة والمدة المستغرقة :

 أول شيء أنا أستخدمت المقشر يوم الاحد بالليل بتاريخ ١٥ أكتوبر ومرت ثمان أيام ولا يوجد أي أثر للتقشير ولا المنتج ما عدا جفاف بالقدم وزي الشد البسيط بالجلد .. لكن مالاحظت أي قشور ولاشيء

واعتبر هذي المدة طويله وبطيء مفروض اذا بيطول اسبوع ع الاكثر .. لان أسبوع أنتظر التقشير واسبوع ع ما ينتهي التقشير حسيت كثير كذا .. لكن هذا اللي لاحظت مع اني دايم اعرض اقدامي للرطوبه لانه تساعد لكن نفس الشيء ..

طبعا باليوم اللي استخدمته بتكون ريح القدم فيها زي ريحة مادة لكن مجرد يوم وتطير ..

المهم بعد مرور اليوم الثامن بدأت القشور خفيفه تطلع بالقدمين خصوصاً عند الأصابع ومكان كعب القدم ع ماظن اسمه هيك ههه المهم هذا المنطقه اللي تركزت فيها القشور ..

احاول اني ما اشيلها ولا اقطعها فقط اشيل اللي تجي متعلقة او تكة وتطيح لان اذا جريتوا الجلد ممكن تحسون بأالم .. 

خلال هالفتره هذي صرت اعرض اقدامي للرطوبه اكثر لانه يساعد الجلد ينفك دام بدأت القشور تطلع .. ما اخفيكم شعوره ينرفز الجلد لكن اللي بدو الدح ما يقول اححح ههههههههههه ..

اليوم اأول الى اليوم الثالث كان القشور خفيفه ..

اليوم الرابع الى الخامس كانت القشور أكثر حتى صارت ملاحظه للي يشوف اقدامي .. لكن هم هم اعتبرها خفيفه لان شقوق الجلد المتقشر صغيرة ...

اليوم  السادس إلى الثامن خفت القشور لان بدأت تطيح لكن باقي متركزه بالآصابع والكعب ماتقشر زين زي ما انا متوقعه ..

اخر يوم

أستمر الوضع أكثر أسبوع تقريباً لحد ما حسيت القشور وقفت ..  ،انتهى التقشير .. 

وصلت مرحله جلد جديد ناعم وردي مو مشهب لكن النتيجة اعتبرها جيده الى مقبوله ..

النتيجة النهائيه ورأيي بالمنتج :

النتيجة النهائيه بالنسبة لي مو مبهره ابدا ما اعطاني التوقع اللي بنيت عليه للمنتج ..

بالاضافه انه بطيء زي ماذكرت سابقا لان انا جربت بيبي فوت كان اسرع وكمان نتيجته اقوى تقريبا شال لي الجلد كله حتى من على ظهر القدم وتساقط الجلد بشكل كبير .. لكن هذا لا كان انعم وارق من بيبي فوت .. لدرجة كان الجلد خفيف اللي ينشال وما ضايقني وقت اشيله ..

هل راح اجربه ثاني او اشتريه؟! شخصيا لا ماراح اشتريه ثانيه مو لانه سيء لا لكن بالنسبه لي عندي توقع لنتيجه معينه ما اعطاني اياها ممكن يفرق عند وحده ثانيه .. لكن أعطاني نعومة لابأس فيها وجلد متجدد ولونه وردي ونظيف .. وصارت القدم أنعم وأحلى من قبل التقشير ..

أماكن توفره وسعره : اتوقع تحصلونه اونلاين انا وصلني من خلود ستايلي وفيه بعض المتاجر توفره بالانستا .. وسعره للاسف ماعندي علم فيه .. بس اتوقع اتوقع بحدود ١٠٠ ريال وطالع

تاريخ صلاحيته : سنتين من تاريخ صنعه ..

التعليب : التعليب أعتبره جيد نوعا ما مو ممتاز جداً ممكن يكون التعليب شوي يدل أكثر ع انه مقشر للاقدام لكن لابأس فيه من وجهة نظري .. كمان لو كان فيه اختصار بالخطوات ويكون المنتج داخل الجوارب افضل ..

 طبعا في النهايه ان استخدمت هالمنتجين وكان في فرق بينهم وكتبت تجربتي عن بيبي فوت تلقونها بالمدونه ..

أتمنى افادتكم التدوينه واذا اي سؤال اكتبوه تحت وراح اجاوب عليكم

في أمان الله ..