Milky Foot Review | تجربتي مــع الميلكي فوت (مقشر الأقدام)

 السلام عليكم ورحمة الله وبركاته:

يسعد مسائكم وصباحكم بكل خير وحب وسلام ..

من فترة جربت مع بنات السناب وتقريبا بالانستا تجربتي مع منتج تقشير الأقدام 

ميكلي فوت ..

وحبيت اوثق التجربة هنا بالتفصيل الممل اذا احد حاب يرجع للموضوع لاخذ اي معلومه او نتيجة ..

علما ان ممكن تختلف التجارب من شخص الى آخر وهالشئ لامسته من تجاوب بنات السناب انه في ناس ناسبهم وناس لا تحسسوا منه ،،

فا خلوني ندخل بالموضوع مباشرة شوية معلومات عنه واماكن توفره وايش النتايج اللي راح تحصلون عليها ...

أول حاجه إيش هو الميلكي فوت ؟

هو عبارة عن جوارب بلاستيكية مشبعه من الداخل بجل سميك مكون من مجموعة أحماض وحليب مخمر ..
مِن أهم مكوناته :

الحليب المخمر المنتقي - الجلسرين -حمض المندليك -حمض اللبنيك - حامض الجليكوليك - حمض الستريك - حمض الأسكوربيك  و سوائل و مستخلصات نباتيه … .. الخ

تحذيرات لاستخدام المنتج :
لا يجب إستخدامه لـ :
– الأطفال
– الحوامل
– مَرضى السكر
– أصحاب الحَساسية والتقرحات و الجروح لابد من إستشارة الطبيب قبل إستخدامه


:محظورات:
– ممنوع منعا باتا  إستخدام المنتج بأي منطقة من  الجسم غير الأقدام ..

– بعد الإستخدام التخلص من المنتج (الجوارب ) و لا يعاد إستخدامها بتاتا ..

– لا يعرض المنتج للحرارة ..

– لا يتم تعريض البشرة للشمس خلال فترة العلاج ..

– يستحسن الإبتعاد عن الأحذية الضيقة ..

– لايتم نزع القشور الناتجة عن التقشير و تركها تسقط لوحدها ..

– يمكن تكرار التجربه بعد شهرين من الإستخدام الأول للميلكي فوت أو خلال أسبوعين من التجربة الآولى في حال النتيجة كانت غير مرضية ..

– يفضل جدا جدا  عمل إختبار الحساسية بأخذ عينة من الجل و مسحها على جزء من الكاحل للتأكد من عدم التحسس ..



طريقة استخدام المنتج :
أول حاجة ننظف القدمين بالماء كويس ونجففهم بمنشفة .

نقوم بفتح الجوارب  الميلكي فوت  قبل الإستخدام مباشرة ويستخدم لمره واحدة فقط فقط ..

 نرتدي الجوارب ونقفل عليها بلاصق موجود عليها ونتركها  لمدة ٦٠ دقيقة ع الأكثر  أو على الأقل لـ ٤٥ دقيقة ..
بعد انتهاء المدة نقوم بالتخلص من  الجوارب و غسل الأقدام  بالماء الدافئ  ..
تجفف الأقدام بالمنشفة فقط ،،

المفترض أن  القشور تبدأ من بعد ثالث يوم لكن شخصيآ بدأت معي من اليوم الرابع  و من بعدها  راح تزيد و تتساقط  لمدة ٧ أيام ، يعني مجموع  كامل التجربة يستمر لمدة ١٠ أيام تقريبا  .. 

فا تأكدي ان خلال ايام التجربة مايكون عندك حدث مهم أو مناسبة مهمه لان شكل القدم راح يكون مو مناسب ابدا ..

راح انزل لكم صور من الايام اللي تقشر فيها الجلد ع مراحل :


هذي صورة قبل التقشير : 
كان عندي جفاف وتشققات بكعب القدم زي ما انتوا شايفين

بعد استخدام المنتج حسيت رجلي شد الجلد وفيها ريحة المادة ماسكه برجلي لحد يوم ثاني اختفت لكن ما شفت اي تغيير غير الاحساس بالشد وابدا مو مأثر علي أو ملحوظ ..

اليوم الثالث بدأت تشققات صغيره تصير عند الأصابع وتشقق صغير بكعب القدم .. ولنتيجة أفضل وأسرع كل ما تم نقع الأقدام في الموية النتيجة أفضل وأسرع .. وهالشئ مكتوب في البروشور اللي جاي معه ..


اعذروني ع هذي الصور لانها من مشاركاتي بالسناب ما اسعفني الوقت ابدا أصور بالكاميرا ولاني كمان اثناء أيام التقشير صادفتني مناسبة مفاجأه فا كنت متضايقه فا اضطريت البس شوز مقفل علشان مايبان شكل الجلد وهو مشقق كذا ،،،

باليوم الخامس زاد التقشير زي ما انتوا شايفين :

باليوم السادس خلاص الوضع صار مأساوي الجلد بكل مكان يطيح وشكله اوفر وحسيت إني ودي اشيله بيدي بس هو ممنوع تحركينه الا اذا ابد صارت معلقه شيليها ... واهم شيء بالبيت خليك لابسه سليبر علشان مايتاسقط الجلد ع البيت كله كمان لا تلبسين شراب وتكتمينه خليه يتهوى واخر شيء لا تستخدمينفي أيام التقشير أي كريم مرطب ع موضع التقشير علشان مايتفاعل مع الاحماض ..

وهذي عينه من الجلد كيف يطيح :)

في الايام الاخيرة صار تساقط الجلد بكمية أكبر وخصوصا وقت النقع راح يفك معاكم اغلب الجلد المتشقق وتبان معالم النعومة والجلد الجديد .. عذرا ع الصورة بس لازم اوريكم كيف الجلد يطيح ع شكل قطع وكثيرة ... والجد مو بس من تحت يتجدد لاااا حتى من فوق القدم كمان راح يتشقق معاكم بس بشكل اقل و أخف من تحت القدم ...

النتيجة ورأيي في المنتج :

المنتج بشكل عام منتج ممتاز وبطل وأعجبني بصراحة أعطاني نتيجة جميله وشال كل الجلد الميت والخشن عندي وصار الجلد اطرى ولونه وردي وناااعم ناعم بشكل لكن بكل صراحة عندي شقين صغار مرا بالكعب شوي اعمق من الباقي ما شالها باقي موجودة لكن شال الطبقه الاولى اللي عليها واتوقع اني المفروض اسويه ثاني خلال الاسبوعين من استخدامي الاول لكن انا ماسويته وقررت اشيل هالشقين ببودي كير لان حسيت باقي الجلد مايسوى اسوي له تقشير لاني راضية عن النتيجة اتم الرضا ..
وراح اكرر التجربة معاه كل ما حسيت اني احتاج ،، كمان مكتوب عليه ان لنتيجة جميله نكرر المنتج كل شهرين تقريبا ..


 


المحافظة ع نتيجة المنتج : :
حسب أهتمامك في النتيجة نفسها مافي شيء يدوم الى الابد من نفسه !! 
لازم تحافظين عليها بالبديكير والنظافة والترطيب أهم شيء لان بدون ترطيب راح يرجه يتراكم جلد خشن ..
 المشي ع الرخام أو السيراميك والارضيات الخشنه بدون شراب او سليبر يساعد ع تكوين الجلد الخشن الافضل لبس شيء بالقدم لحمايتها ..



طيب نهاية التدوينه معلومات سريعه عنه :

  عدد الجوارب بالكرتون فقط ٢  للقدم اليمين و وحدة لليسار  فقط .. والمقاس راح يكفي جمسع مقاسات الاقدام ..

سعر المنتج : ١٢٩ ريال و يعملون عليه تخفيضات بين فتره والثانيه يكون سعره ب ٩٩ ريال ..

أماكن توفر المنتج : في صيدلية النهدي ، وايتس ..   يعني مصرح من هيئة الغذاء و الدواء السعودية علشان كذا راح تلاقونة بالصيدليات ..