Dolce Gusto Nescafe♥ جهاز القهوه من دولسي قوستو(كوفي بار منزلي)

السلام عليكم والرحمه 

مســـــاء \ صباح الحــــب والقهوة والدفــى والروقــــان  ..

أكيد قريتوا العنوان وعرفتوا تدوينتي عن ايش راح تكون... كتبتها لأن كثييييير كثيير

انسئلت عنها لان مرات كثيره صورت سناب ومتابعاتي الجميلات يسئلون عنها

فا قلت راح اكتب تدوينه كامله عنها علشان تكون مرجـــع للي عنده سؤال أكيد راح 

يلقى جواب هنـــا .. :)

جهزوا قهوتكم وتعالوا لان موضوعي شويه طوويل ..♥

طبعا جهازي هو من :

Dolce Gusto

 

















 


 أول حاجه راح اكتب عن الجهاز بشكل عام وبعدها راح اكتب عن جهازي اللي عندي وترتيبي للكوفي بار حقي  والنكهات اللي جربتها وطريقة تشغيلها وتنظيفها  والاضافات اللي ممكن تضيفينها للكوفي ..


تمتلك هذي الشركه  فئات وانواع من الاجهزه  وتقريبا النتيجه النهائيه نفس الشئ بس هي اصدارات وموديلات واشكال جديده  ..

تقدرون تشيكون ع كل جديد من موقعهم    https://www.dolcegusto-me.com/ar/

أنا أكثر شــي عجبني من اصدار ..  GENIO ♥

حسيتها كتكوته وصغيره وما تاخذ مكان وشكلها عملي .. في منها الوان هذا اللون الاحمر ع عنابي وفيه احمر صريح وفيه  لون بلاتين هذا اللي كان خاطري فيه هاللون بس وقت شريتها تعبت وانا ادور عليه وماحصلته دايم مخلص في الاخير رضيت واخذت هاللون ..

الجهاز هذا فيه منه نوعين انتبهوا انتبهوووووا وقت تشترون فيه اتوماتيك وفيه نورمال (يدوي) شوفوا وش انتوا تحتاجون واشتروه طبعا يختلف ويفرق بالسعر بينهم وانا اللي عندي اتوماتيك اخذتها اريح علشان هي تضبط لي القهوه مضبوووط ..

راح اشرح بعدين ايش الفرق بينهم ..

أول ما تشرينها يجي معاها كرتون فيه ثلاث نكهات تقريبا مجانا تجربينها وكمان والاكيد ان يجي معاه كتيب تعليمات  عربي وانقلش .. ومن مميزاتها كمان تسوي اكثر من ٣٥ نكهه ..

نجي لمميزاتها وليش أخذتها ♥: 

-نكهة  القهوه لذيذه  وكلنا عارفين نكهة قهوه نسكافيه ما يحتاج اتكلم عنها ..

- كونتينر (حاوية)  مويه  سعته 1.3 لتر 

- التسخين فيهاااااااا سررريع جدا و ماياخذ وقت  طويل دقيقتين وقهوتك جاهزه

- ذكرت سابقا ان حجمها حلوووووو و لطيف   كجهاز قهوة بالبيت 

- تنوع الكبسولات والنكهات وفيه اصدارات كبسولات جديده ونكهات مختلفه  (ايس موكا .. كابتشينو .. كابتشينو كراميل .. شاي اخضر ،، هوت شوكلت .. شاي مغربي .. وقهوه امريكيه .. اسبيريسو .. وشاي لاتيه وكثيييييييييير كثييييررر  

- فيها نظام البارد للموكا والعصيرات ونظام الحار للقهوه الساخنه 

- الكبسولات متوفره تقريبا باغلب السوبر ماركت الكبيره والهايبر يعني بسهوله تحصلينها مو زي نيسبيريسو لازم من البوتيك حقهم

- ما تحتاج تنظيف  الا شيء بسيط وعنايه تكفيها  

- سعرهااااامناسب للكل ابتداء من ٤٠٠ الى ١٠٠٠ و عليها و ع حسب الاصدار والنوع اذا اتوماتيكي او عادي و السعة  حق حاوية المويه  يتحدد السعر ..

- الجهاز صار متوفر بكل مكان ساكو وبنده  والتميمي واغلب الاماكن ..

- مايحتاج اضافة حليب سايل مع كل نوع قهوة تحتاج حليب يكون معاها كبسولة حليب ..

الجهاز وأي جهاز قهـــوه بشكل عام ينفع للي لهم مزاج بالقهوه وريحتها  ويفهمون 

فيها ويفرقون بالنكهات لان كل مره تستخدمين طريقه تطلع لك نكهه غير.

طريقة استخدامها:

اذا كانت جديده اول استخدام يجي معاه زي الحاويه بلاستك تاخذينها وتحطينها مكان الكوب وتعبين حاوية المويه وتعبينها فل وتشغلينها  وتخلينها تفرغ المويه علشان تكون نظيفه وتقدرين تكررين الطريقه مره ثانيه علشان تتاكدين انها تمام .. وهذي من طرق التنظيف حقتها بين فتره وفتره اذا طولنا ما استخدمنها ..

نكمل

نضغط بالبدايه زر التشغيل راح يومض باللون الاحمر  كم ثانيه  وقتها يكون 

سخن المويه  و واذا صار أخضر  نفس الصورة يعني خلاص صار جاهز 

لاعداد القهوه باقي نحط الكبسوله بس ..

ترفعين الذراع لفوق وتسحبين درج الكبسوله وتحطين الكبسوله في الدرج

هذا درج الكبسوله بعد ما ندخل الدرج نرجع الذراع الى تحت ..

طبعا ع كل كبسوله فية مؤشر لكمية المويه اللي تحتاجها النكهه والاكيد انك تقدرين تتحكمين فيها اذا مو حابه تلتزمين بالمقدار

ومثل ما قلت يختلف من نكهه لاخرى

طيب كيف نحدد المؤشر ع الجهاز؟ انا جهازي فيه ذراع صغير تحركينه لفوق او تحت وراح تشوفين الاضائه تتحرك معك هذي بتكون الكمية اللي حددتيها وبنفس هذا الذراع تحددين اذا حار او بارد تحركينه يمين او يسار ،،، وبعض الاجهزة تكون رول  أو زي البكره تحركينه بدال الذراع الصغنن

الذراع لتحديد الحار أو البارد

بمجرد ماتحركين الذراع مثلا ع الجهة الساخنه وتنزل اول قطرة كوفي استمتعي بعبق ريحة القهوه منتشره وتروق لك مزاجك قبل تشربينها تحسين انك بمقهى هههههه طبعا بعض الانواع الريحه من جد تمسك بالدماغ من زود والبعض تحسين ريحتها خفيفه ..

طبعا اذا كانت قهوتك تحتاج كبسوله وحده بدون حليب فا انتي خلاص خلصتي كوب قهوتك اذا حابه زينيه مثل ماتحبين واشربيه 

واذا نوعك يحتاج كبسولتين بعد ماتخلص الكبسوله الاولى ارفعي الذراع لفوق واسحبي الدرج وشيلي الكبسوله وحطي الكبسوله الثانيه وشغلي الجهاز

الحلو فيها القهوه او الكابتشينو وكذا تعطيك في الكوب التدرج نفس اللي نشوفه بالمقاهي يعني حليب ابيض وفوقه حليب بني خفيف وبعده قهوه داكنه نفس الصوره ..

نجي للنوع البارد : طبعا تاكدوا انها ماراح تسويها مثلجه !!! لا راح تسويها بحرارة المويه اللي حطيتيها وانتي بعدها ضيفي ثلج مجروش اذا حابه او مكعبات .. كمان تاكدوا انها بارد يكون مكتوب على الكرنونه

النكهات:جربت نكهات كثييره صراحه فيه اللي اعجبني انا شخصيا وادمنته وشي حسيته عادي وفيه انواع ماتقبلتها و ما عدت شريتها اصلا ..

راح اكتب لكم النكهات اللي جربتها بشكل عام وبعدها راح اذكر ايش اللي حبيت بالضبط

شاي لاتيه ،، شاي مغربي ،، كابتشينو ،، كابتشينو كراميل ،، شوكوتشينو ،، ايس موكا ،، نسكويك ،، ايس تي        

قهوة فرنسيه ،، أمريكانو .. اسبريسو ،، موكا ،،شوكو كراميل ،، شاي تي لاتيه .. انتيستو والجراند اسبريسو ..

تقريبا هذا اللي جربتهم  طبعا ماذكرت اني اغلب النكهات تجي محلاه يعني ماتحتاجي تضيفي سكر وتقريبا معتدل مستوى تحليتها الا اذا تحبيها حاليه ضيفي براحتك ،،

كمان شفت في بعض المواقع تبيع كبسولات تكون لايت وقليلة الدسم والسكر بس مامره جربتها

اللي حبيت اقوى شي وادمنته من النكهات ودايم ارجع اشتريه :

  
اسبريسو ،، شاي تي لاتيه ،، امريكانو ،، ايس موكا ،، شوكوتشينو ،، قهوة فرنسيه .. ايس تي
 هذا التوب عندي

وفيه نكهات عاديه اشربها وفي نكهات لا مثل الشاي المغربي ماحبيته ابد صراحه كأنه شاي اطفال ههههههههه ويعني ع حسب تذوقكم بس بشكل عام اعتبرها كوويسه النكهات ..

صور لبعض النكهات المتوفره عندي :

 الان في مواقع وحسابات بالانستا كثييييير توفر نكهات بالطلب والبعض يوفر نكهات حصريه او ليمتد اديشن يعني فتره وخلاص تنقطع لانها تكون تعاون بين الشركة مع شركات ثانيه ..


النكهات الدايمه تحصلونها باي هايبر كبير : ساكو - الدانوب - التميمي - بنده - لولو ماركت

التنظيف :

في بداية البوست كتبت لكم ان طريقة تنظيفها اسهل شي بالحياه  ومريحه ولو كانت طريقة

تنظيفها تغسيل ومدري ايش ما اعتقد اني راح اخذها ههههه لاني بصراحه عجازه 

خصوصا تنظيف الاجهزه خخخخخ وهذا الشي انا اشوفه من اقوى المميزات ان 

الجهاز مايحتاج تنظيف ..

تحتاجين تنظفين فقط  درج الكبسوله تغسلينه بمويه وخلاص وكمان تقدرين  تنظيفه 

بعد كذا استخدام  مو شرط ع طول لانه تقريبا ما يتوسخ كل مره..

ومثل ما قلت قبل الكونتير المويه تنظفينه اذا فترات طووووووويله ما استخدمتي الجهاز

افكار التزيين للقهوه   :

ممكن استخدام ويب كريم لتزيين القهوه :) او سباركيلز او قرفه او كاكاو باودر او اي نكهه تحبينها عادي راح يمشي معاها ...

وهذا صوره المق اللي اخذه معاي احيانا للطلعات والخرجات من ايكيا وكتبت عنه بالمدونه طلوا عليه  هنا

طيب انا قلت لكم اني بشرح ايش الفرق بين الاتوماتيك واليدوي :

الاتوماتيك هي اللي تحدد كمية المويه بعدين ماتضبطين المؤشر وتصب القهوه وبس تخلص يوقف الموشر للحد اللي خليتيه عنده فا تكون لك طعم القهوه مضبوطه

اما اليدوي لا انتي توقفين الجهاز عند الحد اللي انتي تبيها او الكميه ..


وبس انشاء الله غطيت اغلب الموضوع ومايخص هالجهاز هذا وتقريبا الاصدارات الثانيه نفس آلية التشغيل بس تختلف الشكل واماكن الازار بس ،،

اي سؤال تفضلوا واتمنى انكم استمتعتوا بالتدوينه وانتوا تشربون قهوتكم ♥

في أمـــــــان الله وحفظه
دمتم بحب وقمة السعاده ..