ريفيو: أرواج و شادو كلر بوب | Colourpop

مســـــــــــاء الخــــــيـــــــــــر ،،، 

كيفكم ؟

تدوينة اليوم أبي أكتب عنها لي  فترة بس مدري وش يأخرني

بس تحمست اليوم فجأه وقلت أكتبها أفضل عن التأخير ..

بتكلم لكم شويات عن كلر بوب وبعدها ندخل باللي جربته منهم 
 

يلا نبدأ :

كلر بوب ؟ colourpop 

ماركة كلر بوب الامريكية ، ظهرت مؤخرا وانتشرت انتشار واسع في فترة وجزه ماشاء الله  و منتجاتها نلاقيها في موقعهم على الانترنت فقط وما تتوفر في الاسواق .. 

للاسف الموقع ما يوصل مباشرة للسعودية او دول الخليج ، فنحتاج بريد امريكي

اشتهرت الماركة بجودتها العالية واسعارها الرخيييصه جدا جدا ، ونافست كتير من الماركات الكبيرة !

عندهم منتجات كثيره ومجموعات (أرواج ستيك - وارواج الترا مات - هايلايتر - بلشرات - شادو وهذا اللي تميزوا فيه - لب لاينر الي هي محددات -  وكحل جل واقلام ) وكل فتره تطلع منتجات جديده 

طيب راح أقولكم أيش جربت منهم :

 

القلوسات الترا مات (مطفيه) Ultra matte lip :

أرواج  تجي ع شكل القلوسات السائلة اللي تتحول مطفية او مات بعد ما تحطيها ع الشفايف ، ماركة كلر بوب وفرتها ب٢٥ لون مختلف وسعرها بموقعهم  ٦ دولار بس  يعني  ٢٣ ريال تقريبا ..

تركيبتها :

ناعمه وسلسه بالرسم وخفيفه ع الشفايف  و زي ما قلت هي تجي ع شكل  قلوسات وبمجرد ما تحطيها ع الشفايف تنشف وتصير مطفية .. ماتجفف او تشقق الشفايف لكن الاكيد تحتاج قبلها تقشير وترطيب لكن لاحظت كثير بالفتره الاخيره بنات جربوها وقالوا تنشف شفايفهم وتشققهم مع اني مالاحظت هالشيء علي

 طيب ثباتها وجودتها :

ثباتها وجودتها عالية جدا وقسم ثباتها عالي بالنسبه لي حطيتها بالمناسبات وباليومي ثااااااابته اللهم يخف اللون بشكل بسيط الا اذا في حالة الاكل والشرب واكلتي شيء فيه زيوت او دسم راح يخف بالوسط ونوعا ما صعبة ازالتها تبقى اثر ع الشفايف مدري هذا يعتبر عيب او ميزه ان ثباتها قوي

درجات الألوان اللي انتجوها  :

كل الالوان عندهم وكل ما يخطر ببالكم كمان عندهم  الوان غريبه زي الرصاصي والموف الصارخ وهيك  وكمان  عندهم فواتح وغوامق منهم الفوشي والمشمشي والاورنج والعودي والبني الغامق والرمادي والموف وكتيييير والحين اطلقوا مجموعة الوان فيها لمعه معدنيه او زي القليتر الميتاليك ماعرف اوصفه ادخلوا موقعهم وراح تشوفونهم ، بعض الالوان اسهل في الاستخدام وتندمج مع الشفايف اكثر .

 جربت هذي الدرجات الثلاثه:

تجربتي ور أيي عنهم  :

اشوف انها جدا كويسة وعملية ، ريحتها عاديه وسعرها مناسب مرة  و الالوان حلوه وغريبة 

وكمان تنفع للمناسبات الكبيرة   والسهرات حطيها وانتي واثقه وبعض الالوان تنفع للدوام  وللصباح وهيك ،

راح أطلب منها انشاء الله زياده بس هالمره راح أطلب من موقعهم لآني طلبتهم هالمره من موقع فانيلا ،،  أنا جربت منهم ثلاث درجات فقط وصار لي مدة اجرب فيهم وحدهم عاجبيني ماعدا لون واحد شوي طلع غير اللي انا متوقعته لكن قدرت اخفف من حدته بدمجه مع لون ثاني .. ثباتها كوويس تطول ع الشفايف لكن تطبع عالكاسات وقت الشرب وازالتها تحتاج مزيل مكياج كوويس وبعض الالوان تحتاج بعد ازالتها تقشير للشفايف لانها تبقى اثرها ع الشفه .. كمان اللي حبيته فيهم الفرشه حقتهم نحيفه يمديك ترسمين بدون لا تحوسك ..

  الدرجة: Bad Habit

هذي الدرجة (باد هابيت ) من درجات الوردي المايل ع موف لونه جميل ينفع لون مسائي لانه دافي واللون غني جدا ولكنه بنفس الوقت خفيف ع الشفايف ماتحسين فيه  حلو ومناسب للسهرات والحفلات حبيته جدا

هذي صوره للون من النت وقسم انا اشوفه ان بالطبيعه احلى من هالسواتش 
ماندمت اني طلبته بالعكس صرت استخدمه كثير واخذه معاي بالشنطه ع طووول احسه لون منقذ بالنسبه لي






 الدرجة: The Rabbit

هذي الدرجه اسمها (ذا رابيت )  اللوت تبعه وردي او بنك قووووي نوعا ما جريء لكنه يعطي لون ع ازرق يعني زي اللمعه الزرقا رهيييييب رهيييب حبيته حسيته يعطي بياض للاسنان واللي اسنانها بيضا راح يبرزهم اكثر واكثر ماحسيته ينفع كا لون هادئ أو صباحي لا حسيته لون صيفي منعش هييك وحلو مع التان ويناسب السمراوات والبيضاوات :)


هذي سواتش له من النت كمان تقريبا مطابق للواقع كمان هاللون حبيته ومن مفضلاتي مع اني كنت بفتره ابتعدت عن البنك والوردي الا اني اشوف نفسي راجعه مرتن ثانيه له





 الدرجة : Kapow

الدرجة (كابو) هاللون هذي يجي بني او نيووود ويغلب عليه اللون الرصاصي بالعلبه لون واذا حطيتيه ع الشفايف يطلع لون ثاني أغمق ... ماحسيته ينفع لكل الوان البشرات لانه فيه لمحه رصاصي لانه راح يعطي شحووب لبعض الوان البشرات .. كثير يشبهونه بكشمير من لايم كرايم بس انا اشوفه مختلف تماما هذا اغمق بمراحل من كشمير

حسيته ينفع للوك عيون مثلا ثقيل وحابه لون  يخفف ممكن ينفع ومثل ما قلت لكم لان بالبدايه ماتقبلت لونه بس صرت ادمج معاه الوان ثانيه ويطلع لون جمييل

هذي صوره سواتش له من النت كذا يطلع لونه ع الشفايف مع انه بالعلبه تحسبينه افتح شويات

أسعارهم  : ٥ دولار يعني تقريبا ١٩ ريال سعودي بموقعهم وعند التاجرات تختلف مابين ٣٠ الى ٥٠ ريال ..

اللب لاينر للشفايف (محدد الشفايف)  :

طبعا جربت منهم محدد واحد فقط وكان للتجربه واللون اللي أخذته أحمر وأسمه فايتر (Fighter) طبعا يجي من نفس لون القلم روج مات لكني بس طلبت القلم ....

  القلم حلوووو حلووو كريمي أو شمعي رطب مو خشبي ناشف يخط بسهووووله واللون غني ووواضح وثباته كويس ينفع تستخدمينه لحاله كا لون روج راح اطلب من اقللامهم مجموعه كبيره لاني احب الاقلام اللي يجي قوامها كذا ماحب الناشفه اللي تجرح الشفايف
طبعا بالموقع سعر المحدد ٥ دولار يعني بحدود ١٩ ريال ..

اللب ستيك  Lippie stix:

 

 هذي الارواج الصلبه ع شكل قلم لو الستيك ويجي منها انواع مطفي وساتان ولمعه وكريمي وهيك

بس زنا جربت منهم لونين فقط مات (مطفيه) الا ان قوامهم كأنهم كريمي فيهم لمعه بسيطه ..

التعليب حلو وبسسيط وغير متكلف نحيييف ويناسب بالشنطه والاحلى حسيت كميته مو كبيره علشان يخلص وما يمدينا ملينا من اللون ..

الدرجة:Grunge

اللون بني او لحمي هيييييك لونه جميييل وتغييير عن الالوان المعتادة حبيته فيه نسبة ترطيب هو صحيح مكتوب عليه مات الا انه فيه لمعه بسسسيطه ماتحسينه مات مطفي تماما ..طبعا ثباتهم اقل من الالترا مات يخفون مع  الاكل والشرب وتحتاجين تعيدين ع اللون في حال طولتي فيه او اكلتي

هذي صوره سواتش له  من النت وشوفوا لونه وشكله عالشفايف 


الدرجة: Dazed




الدرجة هذي جايه ع احمر  بس مو احمر صريح لافيه نتفة عنابي او لون مو عارفته بالضبط ههههه اللون جميل مع لوك ناعم او حتى سموكي لكني شخصيا افضل هالالوان الاحمر ودرجاتها اذا كان التركيز عالشفايف مو ع العيون
وهذي صورة سواتش له وكيف لونه عالشفايف
 ...

الايشادو ، ظلال العيون : 

الايشادو او ظلال العيون عندهم انواع كثيييره والوان جدا جدا متنوعه كل ما تحتاجينه راح تلاقينه أكيد  وراح تطيحين في غرامهم ..

 

تركيبتها :

كريميه ع بودر نوعا ما ملمسها غريب لكنها حلووووه حلوووه نااعمه بشكل وسهله المد والدمج عني أنا أول مره أجرب ايشادو بهالشكل والتركيبه  تجي الايشادو مفردة يعني بالحبه لسى ما اصدروا باليتات لكنهم يصدرون مجموعات ولها مسميات ومواسم والبعض يجي ليمتد اديشن يعني إصدار محدود وينتهي  ..

 

 طيب ثباتها وجودتها :

 

ثباتها عالي تظل معك ثابته لحد نهاية سهرتك ماتتغير ولا تخف وجودتها كوووووويسه بالنسبه لسعرها حبيتها بشششكل وخصوصا النوع اللمعه او القيلتر فضيعه فضيعه وماتحتاج دمج كثير ولاتتعب بالعكس طبطبه بالاصبع تكفي ..  تنفع لسهرات و زواجات رهييبه بتحبونها فعلا مثل ما انا حبيتها

درجات الألوان اللي انتجوها  :

الالوان والدرجات تحتارون وش تاخذون ووش تخلون اذا دخلتوا الموقع فعلا تحتارون فيه درجات كثير الالوان بجميعها وفي كمان الذهبيات والفضيه والالوان الطبيعيه ودرجات البينك والموف والاخضر وكل شي 

الي جربته انا منهم مجموعه مكونه من بوكس فيه اربع الوان شدو
٢ مات (مطفي)
٢ ميتاليك|(لمعه)

شخصيا حبيت الميتاليك او اللي بلمعه اكثر من المطفي حسيتها تندمج وواضحه اكثر من المطفي ماحسيت شي مميز فيها غير قوامها ولا كا لون موجودة بالشادوات العاديه ..
اما اللمعه تسوي شغل كثير بمكياجك مسحه بسيطه الا اللون واضح وكانك تعبانه ع اللوك حقك انتي بس مسحتي مسحه  ههههههه 
 

هذي الدرجات اللي عندي ذهبي و بني نحاسي و لون نيود والاخير زيتي مطفي

اسم الدرجة: Deluxe
هالدرجة هذي فضيعه لونها جميل وراقي يجي بني نحاسي نوعه ميتاليك (لمعه) من مسحه وحده يبان واذا حابه تزيزين اللمعه حطي طبقه ثانيه يفضل استخدام الاصبع في استخدامه افضل من الفرش بمراحل واذا ملزمه تستخدمين فرشه استخدمي فرشه شعرها صناعي بلاستيك شوي زي اللي تيجي حق الكونسيلر ..

أسم الدرجة :Rebel 
هاللون يأسرني احسه جميل وفضيع ويعطي دفئ للعين اللي هو الاخضر الزيتي بس هنا حسيته عادي مو شيد واو لان كثير باليتات فيها اللون هو صحيح واضح ويبان بس ماحسيته مميز كثير وطبعا قوامه زي ماذكرت سابقا يجي كانه رطب  ... بس انا ما افكر اطلب الوان مطفيه منهم فقط اللمعه ..

أسم الدرجة: Selfie
هالدرجة كمان مطفيه لونها خفيف شوي تحتاج كذا طبقه ينفع تستخدمينه لون انتقالي او اذا حابه لوك صباحي ناعم وكانك مو حاطه شي بنفع توزعينه ع الجفن المتحرك بخفه يطلع ناعم جدا ..

أسم الدرجة : XO
اتوقع شايفين الصوره قد ايش انا عافسته ولعبت فيه من زود ما استخدمه وهذا اكثر لون في المجموعه حابته بشكل هاالون ذعبي فيه نتفة نحاسي او لمعه فضيه شوووووي شوووي
ينفع لمدمع العين وينفع للجفن المتحرك واذا اخذتي مسحه بسيطه منه ينفع كمان اضائه لعظمه الخد
جمييييل بشكل احببببه برشا برششششا اقرب شي حسيته يشيه اضائه من ذا بالم اللي هي ماري لو

طبعا اسعار الشادو جدا رخيصه وفي متناول اليد وحاليا كلر بوب صارت توصل انترنشونال بعد ماكانت تحتاج بريد أمريكي الحين دااااااايركت :)
فقط تحتاجون فيزا للطلب
وهذا موقعهم : https://colourpop.com/

اللي بداخل امريكا او الى البريد الامريكي اذا كان طلبكم اكثر من ٣٠ دولار يكون الشحن مجانا 









وبس والله هذا موضوعي لليوم اتمنى نال اعجابكم ورضاكم واي سؤال او استفسار اكتبوه بخانة التعليقات وراح اجاوب عليكم
في أمان الله وحفظه ..