ريفيو كبسولات برايورين ان .... Review Priorin N

الســــــــــــــــلام عـــليـــكــــم والــــــرحــــــمــــه 

كــــــيـــــــف الــــــبـــــنـــــات الـــــحــــلـــويـــن ؟

اليوم البوست بيكون عن خلاصة تجربتي مع حبوب أو كبسولات الشعر (برايورين  ان ) (Priorin N)



جربت الكبسولات لمدة اتوقع كافيه إني أحكم عليه كويس وخلصت الكورس اللي كنت مقرره عليه الحمد لله وريحت شهر والان ابتديت في كبسولات نوع ثاني ولي شهر وشوي معاها راح اكلمكم عليها بعدين حتى أكمل ع الاقل شهرين ..

نرجع لموضوعنا اللي اليوم طبعا أخذت الكورس من هالكبسولات ست شهور يعني استخدمت ست علب في كل شهر علبه لاني أخذ الجرعه حبتين باليوم ..



راح أتكلم لكم بالمقدمه عن الفيتامينات  بالخلاصه وراح أفصل لكم بعدين ايش ملاحظاتي خلال فترة استخدامي ..
الفيتامينات فادتني في مشكلة التساقط وكمان اللمعه وحيوية الشعر وطلع لي بيبي هير (شعر صغير جديد) وتحسن عن قبل استخدامي له بشكل ملحوووووظ ..

خلوني أقولكم طبيعة شعري قبل الاستخدام والظروف اللي كنت فيها :

شعري قبل الكورس خفيف تساااااااااااقط بشكل فضيع لدرجة بكل مكان أشوف شعري طايح والحمام انتوا بكرامه مليان وغرفتي ومخدتي وكل شي كل شي لدرجة زوجي لاحظ شعري كيف بكل مكان من زود التساقط وقتها قلت خلاص راح اقرررررررع من التساقط

كان وقتها توني منتهيه من فترة رضاعه طبيعيه  وكمان كنت صابغه شعري صبغه صار محتررررررررق منها وجاف ومنفوش و  باهت أقوى شيء لدرجة الاطراف ميته مهما أقص منها تجف وتتقصف يعني باختصار كان شعري مأساه مافيه حيويه ابد الكل لاحظ تغير شعري كيف كان قبل هالدمار وكيف صار بعد ما اندمر

لان شعري كان ناعم ومتوسط الكثافه ونوعا ما مقبول بس بعد هالصبغه وبعد الرضاعه مدري وش صار فيه كذا

المهم نكمل لا أطول قرقر كثير .. قررت أشوف حل لشعري وبدأت عنايه بشعري ماسكات وزيوت وقلت ليش ما ادخل مكمل غذائي أفضل يساعد ع ان شعري يستعيد الحياه ..

وكنت وقتها محتاره ايش اخذ ومتردده بين كذا نوع كبسولات لحد ما قرأت عن برايورين ان وحسيت اني اكتفيت عنه وقررت أشتريه وفعلا أخذته ..

الجرعه و طريقة استخدامي للكبسولات :

طبعا العلبه يجي فيها ٦٠ كبسوله اذا كنتي مقرره تاخذين جرعه باليوم راح تكفيك شهرين أما إذا حبتين راح تكفيك شهر ومعناها جهزي ميزانيتك لانه سعره غالي وراح تحتاجينه كل شهر من مدة استخدامك ..مذكور أنك تقدرين  تاخذين ٤ حبات موزعه باليوم  بس  أنا حسيت الكميه كبيره صراحه مستحيل أجازف ! 

أنا أستخدامي  للحبوب مرتين في اليوم .. وبصراحه كنت أخذ كل حبه لحال وحده الصباح ووحده بالمسا لكن تعبت وصرت اخذ الحبتين مع بعض والحمد لله ماحسيت باعراض او أي شي تغير علي أو أي تحسس  .. المهم ماتكون المعدة فاضيه ..

الكبسولات حجمها طبيعي ومافيها ريحه تذكر ومكوناتها نباتيه بحته وطبيعيه  تنفع للصغار والكبار حتى الاطفال اللي بسن ست سنوات لكن جرعتهم حبه باليوم فقط ومن اهم مكوناتها حبوب الدخن ..

من ناحية فتح الشهيه والاكل صراحه كنت اظن ان منها بس وقتها انا كانت شهيتي مفتوحه واكل كل شيء ..

ملاحظاتي  خلال ٦ شهور استخدام ..

 الشهر الأول   : ما حسيت بأي تغيير قوي صراحه وما وقف عندي  التساقط لكن بدأ يطلع  القليل من البيبي هير..

في نهاية الشهر الثاني  : بدأ  يخف عندي  التساقط ٥٠٪ عن قبل و  البيبي هير بدأ يكثر  وبدأت تدب الحياه في شعري  بدأ يتراجع شوي وصار فيه لمعه بسيطه بعد ماكان لونه رصاصي من البهتان وبدأ يستعيد صحته بعد ماكان محترق من الصبغه أنا انبسطت من النتيجه وقلت خليني أكمل .. لكن أنا مالحظت أي تغيير ببشرتي ولا بأظافري كانت بعدها تنكسر وضعيفه ..

الشهر الثالث : بدأ التساقط يوقف بشكل أفضل عن قبل  بنسبة  هيك ٧٠ ٪   وزاد كمية البيبي هير والشعر الجديد بشكل ملحووظ وخصوصا عندي بمقدمة الرأس وعند الجبهه  الحيويه صارت واضحة و اللمعة جميلة بدأت تبان  .. زاد عندي الحماس إني أكمل و أّهتم أكثر بشعري وصرت ارطبه وأركز ع الاطراف لان الجفاف اقوى شي فيها  ومع الاهتمام بالترطيب  النفشه الغبيه اللي قبل تصير اذا فتحت شعري  خفت انبسسسطت واللي حولي حسوا بالتغيير في شعري أنه صار أفضل

 الشهر الرابع والخامس :  هنا كنت راضيه عن النتيجه اللي وصلت لها ماراح أقول إنها بيرفكت وأنها أطلق شيء بالحياه وشعري صار زي الباروكه هههههههههه لا طبعا بس بالنسبه للحاله اللي كان عليها النتيجه اعتبرها واااو 

لمعه وصار متوسط الكثافه والتساقط صار جدا قليل وبالحد المعقول الطبيعي يعني صرت ما انصرع من كمية الشعر المتساقط

صحي نوعا ما واستمريت عليه هالشهرين هذول لاني قررت بالشهر السادس اقطعه بالتدريج علشان الجسم ما ينصدم ويروح التعب كله ..

الشهر السادس والأخير:  النتيجه النهائيه حلووه لأني بديت بهالشهر اقلل الجرعه الى حبه باليوم بعد ماكانت حبتين وبعدها بفتره صرت يوم ورا يوم أخذ الحبه لحد ماخلصت الكورس كله وماحسيت بعد ما قطعته ان شعري تأثر كثير يعني عادي وطبيعي جدا ..

اللي لاحظته أنا شخصيا إني ماشفت تحسن للبشره ولا الأظافر ولا إطالة الشعر بشكل ملحوظ يمكن من شخص لشخص يختلف

لان كثير قالوا ان اظافرهم تحسنت عليه وطالت وصارت اقوى انا ماشفت هالشى الا شي بسسسسيط جدا  وبشرتي زي ماهي لانها تقريبا صافيه..

وقت استخدامي للحبوب خصوصا بالاشهر الاخيره صار عندي عارض صحي وهو ارتفاع هرمون الحليب ووقتها نظامي زي ماهو بس الكبسولات اللي مستمره عليها وماكنت أخذ أي علاج ثاني فا شكيت صراحه أنها منها بس بعدين طلعت براءه مو منها ..

هذي خلاصة تجربتي معاه خلال ست شهور وهل ممكن يوم من الايام ارجع له؟ طبعا ممكن لكن حاليا من باب التغيير وعلشان الجسم ما يتعود جالسه استخدم نوع ثاني ..

 شويه معلومات سريعه عن الكبسولات وسعرها وأماكن توفرها : 

 موانع إستعمال برايورين ان :  مافي  موانع تقريبا لـ إستعمال برايورين ،  إلا في حال حسيتوا بتحسس وقفوها وكمان الحامل والمرضع احتياطا تستشير دكتور ..

الآثار الجانبية  :   مالاحظت أي أعراض جانبيه أوزياده بالوزن أو زيادة بشعر الجسم أو عصبيه أو زيادة بضربات القلب 

محتويات  برايورين ن : خلاصة حبة الدخن، زيت نبتة القمح، سيستين و بانتوثانات الكالسيوم

إضافات: مكسب طعم (فانيللين) بإختصار نباتي من الدرجة الأولى وخالي من المشتقات الحيوانيه ..

أماكن توفر كبسولات  برايورين ان :

في أغلب الصيدليات و تقدرون تاخذونه  بدون وصفة طبية. كمان يجي منه امبولات للشعر بس للامانه ما جربتها ..

السعر:  260 ريال كان أرخص بس سعره في إتفارع وهذا من أشد عيوبه صراحه :(

وبس أتمنى ذكرت تفاصيل تجربتي ومانسيت شيء واللي عندها سؤال أو أي  استفسار او تعليق تتركه بخانة التعليقات وراح أجاوب عليكم باذن الله  
ودمتم في أمـــــان الله وحفظه
معسلامه :)