الحـــــــرية الحــــــــــلال ..

السلام عليكم ورحمة الله وبركاته ..

اليوم حديثي راح اعتبره حديث نفس لكن بصوت مسموع للقرآء ..

ممكن الكثير يحتاج هالكلمات  علشان يرتاح و ممكن البعض مازال يعاني مثل ماكنت اعاني سابقا ..

هالكلام ابد مو تحريض هذا تشجيع وتحرير لقيود غلط اما الناس كونوها لنا أو أحنا أنفسنا انغلقنا وخلينا الروح محبووووسه بسبب اعتقادات ..

راح أتكلم عن الحريه الحلال ..

إيش أقصد بالحريه الحلال  ؟؟؟؟؟؟؟!!!!!  وليه في شيء حرام؟؟!! ايوه فيه وماراح اتطرق لها لانكم راح تفهمون ايش اقصد من كلامي اذا تابعتوا الموضوع للاخير ..

 

الحريه الحلال إني أكون حرة نفسي بدون قيود من الاخرين ولا ضغوط واكون شخص عصامي كمان  عزيز نفس وكرامته عاليه قبل كل شيْ ومتواضع ..

وكمان بنفس الوقت ما اتعدى الممنوع والحرام ..

كثير يفهمون الحريه ان خلاص هذا الشخص او الانسان متمرد ومتخلي عن الادب والعادات!!

هالشيء غلط غلط ... مو عيب أكون بكامل الحريه لكن في نطاق المعقول وغير شاذ

بشكل يمثل ديني أولا و هويتي وقناعاتي ثانيا ..

ما اتعدى الخطوط الحمرا .. ولو كان هذا التصرف ملفت للناس لكن هو بحد ذاته مو غلط ولا عيب و لا حرام فهذا الشيء من حقي اسووويه ...
اذا حلال؟؟ ولو تكلمت الناس وقالوا مايهم !! اللي يهم أن هالشيء يرضي ربي ويرضيني بالمقام الاول

لان مهما سويتي راح تضل الناس تتكلم فا ع الاقل عيشي مثل ما تبين وحرة نفسك وحققي انجازاتك افضل من تعيشين ويروح عمرك وانتي تحسين انك مقيده وما انجزتي اللي بخاطرك وتموتين من القهر والحسافه ..

 وتحسبين الف حساب لكلام الناس اللي بس همها تنتقد وتتبع خطوات غيرها

بحثي في ذاتك وشغلي ونوري عقلك باشياء مفيده   وحددي انتي اساسا وش تبين تسوين حتى لو هو خارج عن المألوف في عايلتك ومحيطك ومثل ما كررت شرط يكون هالشي حلال يعني لو مثلا تبين تصيرين مغنيه او مطربه ههههههه وبتقولين انا حره هنا لا لانك تخطيتي الحرام مو بس العادات..

الشيْ اللي اقصده لو حبيتي تكونين مصوره فوتوغرافيه او طباخه او بلوقر او تاجره او  اي شيْ من هالهوايات والرغباات والافكار واللي حولك يستغربون هالشيء او عندهم عيب او تخافين انتقادهم

هناااا اقووولك لا لا لا لا اتركي الكلام ورا ظهرك وخليهم يتكلمون لحد ما يتعب لسانهم ...

بكرا انتي تكونين شيء كبير وهم في اماكنهم يهذرون ..

أنا مثلا كوني بلوقر في بدايتها لاقيت صعوبات مو بالساهل قررت...  مع ان كان بداخلي اعاني من ضميري يقول لي ايش تستنين الايام تمضي وانتي بس تفكرين؟؟؟؟!!  ... و نفسي من الداخل  تشوف اللي  حولي وتقول لي قادره تواجهين اللي حولك كلهم  وكلامهم؟؟!!!

 فا كنت مضطربه لحد ما وقفت وقلت خلاص خليني اسمع ضميري وش يقول والباقي مايهم و الحمد لله بديت بأول خطوه وباقي خطوات كثير جايه بالطريق انشاء الله راح احققها وأكتب لكم عنها بتدوينات ثانيه ..

وحتى لو احبطوك وما شجعوك ولا مدحوووك عادي لا تنتظرين مديح و شكر من أحد أبدأ حتى من أقرب الناس لك

أشكري الله فقط ع نعمه ورزقه اللي خلاك بهالمكان

اشكري نفسك اللي اجتهدت واشتغلت ودلليها

خلي كل حاجه قربة لله تعالى وراح يرجع لك بالرزق الوفير وتتبدل حياتك وراح تشوفين الحياة بلون ثاني جميل لانك حققتي انجازك وحلمك اللي كان يوم من الايام كنتي منسدحه وتفكرين فيه وكيف تحققينه ..

انتي بس خليك مع الله وراح تنفتح لك ابواب السعادة باذن الله .. مارسي حياتك مثل ماتحبين اشربي قهوتك وأكلي حلاك وابتسمي للحياه سواء كنتي حزينه أو كنتي بقمة السعاده لأن الحياه مكلمه وماشيه ماراح تنتظرنا وتنتظر نفسياتنا ..

فلا تهدرين عمرك وانتي حزينه ..

بس اتمنى أكون وفقت وانا اكتب الكلمات كانت مشاعر حبيت افرغها لكم بحب أبي كل بنت بخاطرها شيء تطلعه وتفجره بدون خجل او تردد ..

دمتم بخير  واتمنى لكم التوفيق من الله في حياتكم الدنيا والاخره  :)

معسلامه