زيت الآرجان من ناشي | Nashi Argan oil

السلام عليكم و رحمة الله و بركاته

كيفكم بنات ..

من المواضيع الشائكة عندي وكثير احتاج فيها تجارب كثير وكثير هي موضوع الشعر .. وخصوصا السيروم ومابعد الشاور .. وكثير جربت منتجات كثيره منها التجاريه ومنها اللي يقال عنها مكوناته طبيعيه .. لكن الى يومكم أجرب منتجات الى حد ماوقفت عند هالمنتج وكمان ممكن اجرب غيره لحد ما اشوف الافضل والانسب لي ..

منتج اليوم هو زيت الأرجان من ناشي ..
طبعاً تعريف بسيط للشركة هي شركة ايطاليه عندها مجموعه منتجات مخصصه للشعر من ماسكات وشامبو وبلسم وزيوت وسيروم وامبولات وهير ميست ... الخ  كمان كثير اشياء فـ أنا جربت الزيت حقهم فقط .. لفتتني طريقة تعليب المنتجات لأنها آمنه و صديقة للبيئة  وتتحلل ..
راح ادخل بالتفاصيل اكثر علشان تستفيدون واحاول اطور من تدويناتي بحيث تكون شامله بالمعلومات وكامله واحترافيه اكثر واتمنى تلامسون هالشيء هذا ..


مكوناته : والوعود :
زيت أرجان، وزيت بذور الكتان، وفيتامين هـ.
الوعود : يرمم ويغذي ويضفي لمعة براقة . يسهل عملية تسريح الشعر ولا يحتاج إلى الشطف ويناسب جميع أنواع الشعر.

تجربتي و رأيي فيه :

أول شي بقولكم طبيعة شعري الفروة دهنيه والشعر جاف وانا اغسله كل يوم بشامبو واحتاج بعد الشامبو اما بلسم او زيت او سيروم اترطيب اطراف الشعر بعد كل شاور لان الشمبو صار يجفف شعري فـ استخدم له سيرومز ..
وزي ماذكرت جربت كثير لكن استقريت لي فتره ع هالزيت لانه حبيته ناسبني وحسيته خيار صحي اكثر من الزيوت الثانيه ..
ع فكره وقت اخترته ماكان عندي خيار ثاني ولا كان عندي خلفيه كبيره عن الشركة او المنتج فـ اخذته تجربه ..


طريقتي بعد كل شاور وشعري مبلول اوزعه من البداية ع الاطراف وبعدها بالباقي في يدي امسح ع فروة راسي وادلكها بخفيف لانها خفت يدهن لكن مايدهن اذا استخدمتي كمية معقوله او تكفي فقط لتعطي ترطيب لششعر ..
استمريت ع هالوضع لانه عاجبني وكمان استخدمته لبنتي وكان تمام ..

طبعا بقول لكم  .. رائحته شوي تجي ع عشبيه لكن مو مزعجة مقبوله نوعا ما وتختفي بسرعه ،، قوامه زيتي لكن مو لزج جدا يتشربه الشعر بسرعه ويمتصه مايترك اثر دهني الا اذا كثرتي بقوة ..

النتيجة اللي اعطاني اياها : شعر يلمع مترطب مو جاف وصار تسريح شعري اسهل بدون مايتقطع او يتقصف ..
حبيته جدا ووقعت في غرامه .. هو صحيح ممكن مايكون صحي ميه بالميه لكن افضل من اللي جربت قبله ..
انصح فيه وراح ارجع اشتريه مرات ومرات لانه باختصار ناسبني وارضى احتياجاتي ..

أماكن توفره : الصيدليات مثل النهدي وبعض محلات التجميل وحاليا بعض الصالونات  ..

التعليب : زي ماقلت لكم التعليب بسيط لكنه لطيف ويدل ع انه هيك شيء صحي ههههه مدري ليه هيك حسيت .. المهم المواد المستخدمه في التعليب من الكرتونه من مواد قابله للتدوير وكمان  العلب الزجاجيه .. تحسونه شيء علاجي ..
العلبه الكبيره اتوقع تجي بمب او ضغاط عكس الصغيره من عيوبها فتحت العلبه انها عاديه يمكن المنتج يتكب بسهولة في حال ماقفلتي العلبه كويس وكمان اثناء اخذ كمية من المنتج يعني لو كانت فوههة المنتج مقفله اكثر من كذا افضل بكثير..

سعره : بين ٨٠ - ١٠٠ ويتوفر منه حجمين صغير وكبير واللي عندي صغير .. الكبير حول ١٧٥ ريال

تاريخ صلاحيته : ١٨ شهر من تاريخ الفتح

حجمه : الصغير ٣٠ مل

صنع في : ايطاليا .. ميلانو ..

وصلنا لنهاية التدوينه اتمنى نالت ع رضاكم واعجبتكم وكفيت ووفيت في الشرح وياليت اللي لها تجابر تذكر تجربتها سواء بالزيت او باقي المجموعه وهل اعجبها او لا .. علشان  نشوف اراء اكثر .. واشوفكم في تدوينه ثانيه ولو حابين سؤال او استفسار اكتبوه لي تحت وراح اجاوبكم بكل حب .. 

في أمان الله ..