تجربتي مع حبوب الروكتان Roaccutane

السلام عليكم بنات ..
مسسسساء / صبــــاح الورد يا حلوات ..
اخباركم ايش مسوين؟؟

اليوم التدوينه بتكون عن سؤال انسئلت عنه كثيييييييير وهو عن حبوب الروكتان والان صارت له مسميات كثير وتتشابه نوعا ما . مثل كوراكني و زيراكتان وغييييييره كثير

هذا سلمكم الله  كبسولات مضاده  حق حالات حبوب الشباب الشديده  وآثاره الصعبه اللي ماتروح  ابد ..
ووقتها تكونين جربتي مضادات حيويه وعلاجات موضعيه للبشره وكريمات ومراهم وغسولات وماشفتي اي نتيجة تذكر ولا أي تحسن ابدا ..



مثل حالتي تقريبا كنت ع مشارف العشرين ووجهي وظهري مليااااااان حبوب بشكل يطفش الحبه فوقها حبه يعني حبتين فوق بعض من شدة الحبوب اللي كانت عندي وظهري احمر كانت الحبوب منتشره ومتركزه باكتافي اكثر شي وتعبت وانا اجرب علاجات ومراهم وغسولات وابد مانفع معاي واخذت مضادات تخف شوي وترجع دبل بعدها

لحد مايئست وتعبت وقررت ازور الدكتور الجلديه واجيب عدتي معاي كلها وقلت له تاريخي مع الحبوب وقرر لي صرف العلاج بعد مراحل ..
بس كيف قرر يصرف لي هالعلاج؟؟؟ بعد ما ياخذ تاريخك وتاريخ عايلتك اذا خالي من الامراض الوراثيه او حتى لو عندك سكر او ضغط ؟؟؟

وعندها يتقرر لك صرف هذي الحبوب .. وقبلها لازم اخذ فحوصات وتحاليل تأكد من خلوك من خربطت هرمونات  او تغيرات بجسمك مثل تغيرات الجسم بوقت البلوغ وما الى ذلك  ..

اول حاجه راح اقولكم عن تركيبة العلاج وايش هي المادة الفعاله فيه وايش اسمها ؟؟!!
الماده الفعاله في الحبوب اسمها ايزوتريتينوين وهذي الماده تعطي نتيجة في  تقليل افراز الغدد الدهنيه في انسجة الجسم  وينمع تكاثرها ويبقى مفعول هذا الشي لفتره طوووووويله جدا ..

لان عادة كثرة الحبوب بشكل فضيع معناها ان نشاط بالغدد الدهنيه واساسا جسمك عنده كمية غدد كثيره ..

ليش يصرف العلاج حسب الطول والوزن ومعدل الدهون بجسمك؟؟ لان من شخص الى ثاني يختلف معدل الدهون ومعدل الخلايا بجسمه
وكمان يصرف لك مدة العلاج  ع حسب حالة الحبوب عندك يعني مثلا انا اخذت العلاج هذا قبل تسع سنوات قبل زواجي بسته شهور بالضبط وكان وزني اقل من الان فا اكيد بتكون جرعتي غير لو اني اخذته الحين .. وهكذا ،، وكمان يتدرج بمقدار الجرعه يبتدي بجرعه اقل لحد ما يعطيك اكبر جرعه حسب حالتك وكذا .. مثلا بالصوره شوفوا واحد ١٠ والثاني بعد فتره تاخذين مثلا ٢٠ ،، هذا مجرد مثال ...

ايش تحتاجين علشان تاخذينه؟
تحليل حمل في حال انك متزوجه او تفكرين بالحمل اما اذا بنت لا عادي ..
تحتاجين مثل ماقلت فحوصات وتحاليل
تحليل لوظائف الكبد وانزيماتها
تحليل لفيتامين A
ليه كل هالتحاليل ؟؟ لان الروكتان يرفع هذي الانزيمات وياثر عليها بشكل كبير حتى الدكتور راح ينبهك انك توقفين فيتامينات او اكلات غنيه بهالفيتامين لان جسمك بفترة العلاج بيكون مشبع

كمان الحامل او المتزوجه اللي تفكر بحمل مايصرف لها ليش؟؟ لان كمان ارتفاع هالفايتمين وتغيير الانزيمات بشكل كبير راح يسبب لها تشوهات بالجنين وهالشيء خطططير وعادة لازم تستخدم موانع حمل قوووويه جدا وتكون صارمه بموضوع الحمل لان هذي حياة اشخاص ابدا مو لعبه الموضوع واصلا الدكتور في حال كنتي متزوجه يوقعك ع مسؤليتك في حال صار حمل ..

 فا اذا وحده قررت تحمل لازم تنتظر ع الاقل ست شهور بعد العلاج علشان بهالفتره يكون الجسم مستعد وتفكر بالحمل حتى يمديه الجسم يتخلص من الكميات هذي

في فترة العلاج تحتاجين تحليل كل ٣ اشهر لمراقبه حالة جسمك والكبد عندك لان الكبد يجهد  وبعدها الدكتور يقرر لك تستمرين او يخفف او يوقفه لك من الاساس ..


بالنسبه للجرعه مثل ماقلت يحسب لك الدكتور من وزنك ويصرفها لك ما اقدر احددها انا لكم  وكمان المدة في ناس الكورس حقها ست شهور مثل حالتي وفي ناس سنه كامله اذا كانت جرعتهم قليله او مو مستعجلين يعني تختلف كل حاله عن الثانيه اختلاف تام ،،

انا  كنت مستعجله وقتها  لان ماكان باقي ع زواجي الا اقل من سنه فا حبيت اخلص الكورس قبل كم شهر اريح واضمن لي ،،

طيب نيجي لموضوع المضاعفات والممنوعات غير الحمل اللي ذكرناه سابقا :

تبتعدين عن اي علاج ومضادات تاخذينها يعني كل الادويه اللي تخص البشره حالا توقفينها
التقشير للبشره والصنفرات توقفينها تماما
اي علاج موضعي سواء محاليل سايله او كريم
طريقة ازاله الشعر الواكس او الخيط الفتله او الحلاوه او اي شي يسبب تهية للبشره توقفينه
الليزر واي اشعه خاصه للبشششره
ذكرت سابقا فايتمينات تخص البشره واللي تحتوي ع فايتمين اي
تاخذين العلاج مع الاكل يعني لازم معده مليان ماينفع تاخذينه ع جووووووع ابدا ماينفع لانه يسبب الم بالمعده لو اخذتيه ع معدة فاضيه

حاولي تخففين من الشوكلاتات والاكلات المليانه دهوووون وزيوت افضل وعلشان تخف الحبوب اسرع

خلصنا الممنوعات والمحظورات نيجي للمضاعفات :

اكبر مضاعفات راح تعانين منها وهي الجفاااااااااااف جفااااااف جفاااااف جفااااف شديد بكل جسمك ليش؟ لان مثل ماقلت يشتغل ع الغدد الدهنيه اللي بالجسم كله فا راح تعانين من جفاف وقشور بوجهك وجسمك وتشقق بالشفايف وكل هذا طبيعي  اهتمي بالتررررررررطيب خلي المرطب جنبك وكل ماذكرتي رطبي .. وهنا حطيت لكم صور مرطبات طبيه وترطب كوويس والاحلى خاليه من العطور .. او اسالي دكتورك يكتب لك مرطب طبي للوجه والشفايف والعيون وكمان واقي شمس لحمايتها من الاشعه  ..

ممكن كمان عينك تجف تحتاجين محلول مرطب للعين وخاصة اللي يلبسون عدسات هم ممكن اكثر ناس تلاحظ هالجفاف بعيونهم

الشعر وفروة الراس اذا كانت فروة دهنيه راح تتحول الى جافه او شديدة الجفاف هنا عليك العنايه بشعرك من زيوت وترطيب
وسيروم وما الى ذلك .. وقتها انا كان شعري جاف ودايم منفووش واستشوره بالبيت واطلع ما اوصل عزيميتي الا شعري نافش كنت وقتها انقهر بس كله يهون لجمال البشره ..

قد يسبب الرعاف من الانف وهالشي كمان نادر بس حبيت اذكره ..

ممكن تحسين بالم بجسمك وعضلاتك وزيادات غير متوقعه بالسكر او الانزيمات بسبب ارتفاع والتغيرات بسبب العلاج علشان كذا لازم تتابعين مع دكتورك وهالشيء مو كل الناس تصير لهم لا ع حسب الحاله وانا شخصيا الحمد لله ما عانيت من الم ولا تغير بمستوى السكر او الدم عندي وكانت اموري تمام وحلوه الحمد لله ..

ممكن يسبب نزول بالوزن مدري هل بيكون ملحوظ او لا بس عني لاحظت نزول خفيف والبعض قال ان سبب لهم مو زياده لا زي اللي السوايل محتبسه باجسامهم وعطاهم شكل ممتلي اكثر ..
علشان جسمك يرتوي بعد هالجفاف اللي صار فيه لازم لازم لازم لازم وكم مره عدت كلمه لازم لازم تعوضونه بشرب المويه اشربي بقد ماتقدرين خلي بيدك علبة مويه واشربي طوووول يومك علشان يرتوي جسمك .. ومنها تخف المضاعفات وماتحسين فيها ..



بعد انتهاء كورس العلاج وش النتيجه المتوقعه وايش هي فعالية العلاج؟؟

راح اقولكم حاجه ولازم تنبهون لها ان في بداية علاجك اول شهرين راح تشوفين النتيجه جدا عكسسسيه راح تشوفين الحبوب زادت وصار وجهك مليان حبوب واحمر وكانه حالتك تردت اكثر من قبل
راح اقولك هالشيء طبيعي وعادي وهذا معناته ان فعالية  العلاج اشتغل بجسمك وجالس يطلع الدهون والحبوب اللي بجسمك كلها يعني تحملي شكلك اثناء فتره العلاج  وبعدها تدريجيا راح تخف وتروح ..


بعد انتهاء كورس العلاج وش راح تشوفين ؟؟؟؟ بتشوفين بشررتك ربي لك الحمد كانها مرايـــــــــا صفاء ونعمومه وملمس متساوي بعد ماكان فيه هضبات وجبال من الحبوب
وقسم بتشوفينه كانها بشرة طفل صافي صافي جدا
انا صورت قبل وبعد ويوم خلصت الكورس انكر ان اللي قبل العلاج هذي انا ههههههههههههههه

يعني خرااافيه النتيجه وتستاهل التعب هذا كله ..

طيب بعد مرحلة العلاج يجي دورك انتي بالاهتمام في بشرتك يمديك تحفين زي ماتبين وتليزرين و ترطبين مثل ماتحبين وتريتمنت للبشره واي شي انتي حابته .. كل الممنوع خلاص صار حلال عليك .. ماعدا الحمل سوي تحليل قبل او زوري دكتوره نساء وخبريها بعلاجك اذا كنتي توك منتهيه من الكورس علشان تعطيك تعليمات ،،،

نتيجة العلاج الحمد لله مستمره معاي لحد الان ماتطلع لي حبوب ابدا واذا طلعت حبه وحده بس نتيجة هرمون او من العاده الشهريه وكذا يعني مو شي يضايق ابدا

في النهايه اكيد بتسالون وين نلاقيها؟؟! ماراح تلاقينها بدون وصفة دكتور لو تحبين راس الصيدلاني مستحيل يصرفها لك ضروريه وصفة الدكتور .. ومن عيوب هالعلاج انه غااااالي نوعا فايحتاج ميزانية او تاخذينه من مستشفى حكومي ..

بس هذا تجربتي وخبرنتي فيه انشاء الله استفدتوا منه وحاولت اغطي الموضوع من كل الجوانب وانشاء الله اكون وفقت فيه وجاوب ع تساوولاتكم كلها وكمان لا تنسون تجارب الناس واجسامهم تختلف مدى قابليتها وتغيراتها ع مر الزمن
لان في ناس بعد سنين من العلاج رجعت الحبوب لهم ثانيه وكأنك يا بو زيد ما غزيت وياخذون الكورس ثاني
وفي ناس زي حالتي ماشاء الله والف الحمد لله احس اني ماراح احتاجه ثانيه لان بطلت تطلع والى الان لي  تسع سنوات من بعد التجربه واموري اوك ..

وبس والله ادليت بدلوووووي واذا حسيتوا عندكم سؤال اسدحوه ومالكم الا طيبة الخاطر ..


ملاحظة: الصور من النت ليست ملكي ..

دمتم بحب وبود
مع السلامه