ريفيو فرش جيسب jeesup وتقييمي لها ..

 السلام عليكم والرحمه ..
راح اكتب لكم ريفيو نوعا مفصل عن فرش جيسب مع اني كتبت عنها بالانستا بس حبيت اتكلم عن استخدامي لكل فرشه لحال 

واللي حاب الانستا حقي هذا اسمي Reemooh_beauty

المهم نيجي لفكرة التجربه انا فكرت اجربهم ادور بديل ارخص ويكون جوده وينفع للميزانيتهم محدوده لكن يحتاجون مجموعه فرش تقريبا اغلب فرشها تستخدمينها
فاشفت بالانستا هالفرش وصراحه ماكان عندي عنها اي فكره او ولا مره لمحتها فا قلت خليني اجربها وغير هيك  حسيت شكلها يشبه كثير فرش سيقما وفرش شركة بي اتش الامريكيه بس الفرق والاختلاف اسم الماركه كثير فقررت أجربها ..

ماراح اقولكم اني بالبدايه خفت انكب فيها بس بعدها قلت يلا سعرها كويس والا مالاقي لها حل واستخدمها يعني ماراح اخسرها  ..

 طبعا تيجي عشر فرش خمسه حجم كبير وخمسه حجم صغير الصغار هي نفس الكبار بس فارق في الحجم.. وبدون شنطه او حافظه بس تجي كل فرشاه مغلفه ببلاستيك يحميها ومايخلي شعرها ينفش وهذا الشي كويس ..
طبعا اول ما وصلتني رشيتها بمنظف فرش من سيفورا 
ومسحتها عالسريع عشان لو فيها بكتيريا او حاجه وفي ناس تفضل تغسل الفرش الجديدة عند اول استخدام مرات اسويها والاغلب لا ع حسب المزااااااج خخخخخ..
 
طبعا تقدرين تستعملي الفرش الصغيرة للعين مع انها مخصصه للوجه وفي منها مجموعه ثانيه للعين بس انا حسيت هذي تكفي لان الصغار مثل ماقلت للعين وكمان تقدرين تستخدمينها لتحديد الملامح ولكونتور الخشم وكذا مو شرط بس للوجه..

  


ونشوف مع بعض الفرش ولايش استخدامها ..

 بالنسبة للفرش الكبيرة :

  ١ -تجي دائرية مسطحة و شعرها كثيف أستعملتها للأساس ، تدمج بسرعة و تعطي تغطية عالية و ماتسبب خطوط عالوجه لو استخدمتيها صح

  ٢- الفرشاة هذي مسطحة و فيها ميلان يعني مشطوفه أستعملتها للبرونزر والكونتور الكريمي
بس ماكنت أدمج بيها ، بس كـ تطبيق

 ٣- الفرشاه الثالثه منفوخة وكثيفه و مشطوفة ع خفيف ،  فا انا ناسبتني في البلاشر كثير

 ٤- اما الفرشاة هذي مدببة حلوة للبودرة تحت العين وكمان لتحديد الكونتور او الاضائه تحت الخد وحلو ان نستخدم الفرشاه لكذا غرض واستعمال  ..

 ٥- الفرشاة الخامسه دائرية وشعرها متساوي  مرات أدمج بيها مكياج الوجه و تقدري تستعمليها لبودرة الوجه سواء تخففي منها او تضيفين بورده كمان تنفع للبلاشر ..

 هذي الخمس الفرش الكبيره

بالنسبة للفرش الصغيرة

٦- فرشاة صغيره و  مدببة 

حلوة للإضاءة عند المدمع أو لتحديد الآيشادو على كسرة العي اوكمان لتحديد كونتور الانف

 ٧- هذي الفرشه صراحه ماعرفت احدد لها استخدام معين فا استخدمها لكذا شغله مرات للوجه ومرات للعين هي شعرها متساوي وناعمه وماحسيتها تنفع لاشياء كريميه فا خليتها للبودر  فا عادي اكيد وحده مننا راح تلاقي لها استخدام وبتفيدها

٨-الفرشاه هذي تجي مسطحة مشطوفة  تنفع للدمج كونتور الأنف أو كونسيلر تحت العين والاماكن الضيقه

 ٩- الفرشاه شعرها مستوي تنفع للايشادو يعني ظلال العين ع الجفن المتحرك 

او اي نوع بودره حابه تحطينها بمكان صغير ..

١٠- هذي الفرشاه اذا حابه تموهين ظلال العين ع كسرة الجفن لانها تجي مشطوفه او حابه كمان تستخدمينها  اذا حابه تحددين عظمة الفك او تحطين اضائه عند الخد وحابتها ناعمه وبمساحة صغيره وماتحوس لك المكان كله

خلصنا استخدامي للفرش ومثل ماقلت حلو تستثمرين الفرش بكذا استخدام مو شرط نشتري حق كل شغله فررررشاااه وهالمجموعه ممكن تغنيك عن فرش زايده و تاكدوا انها بتسوي لك مكياجك كامل وتناسب المبتدئات والمحترفات يعني للكل ..

حبيت اقول شي اخير بشكل عام

أنا جداً راضية عن المجموعة ...

الحلو ان الفرش تجي الوان بيبي بلو يعني سماوي ولون جاي ع بنك وردي واسود  كمان الاسود يجي مع فضي او اسود وذهبي نفس اللي معاي ..

كمان جودتهم كويسه ناعمين وياخذون من المنتج كويس وفي الشغل حلوين

جربتهم غسلتهم كذا مره والحمد لله مامره طاح شعرهم او تلزف في وجهي ومن هالحركات اللي تصير من الفرش الرخيصه ..

اااامممم ايش كمان  .. ايوا طبعا كلنا عارفين ان لازم نهتم فيهم نغسلهم وننظفهم وكذا علشان بشراتنا تكون نظيفه وماتسبب لنا حبوب والتهابات  وهيك ..

طبعا سعرهم من ١٠٠ الى ١٥٠ ريال بالانستا ويفرونهم التاجرات وكمان موجوده بموقع أمازون يمكن يختلف سعرها ..

وبس والله اي استفسار او سؤال اكتبوا لي تحت بالكومنت .. يسعدني اشوف تعليقاتكم هنا 

مع السلامه ..