رتبي يومك ونظفي مكانك وحددي أولوياتك .. وعيشي حياه جميله ومرتبه ..

بسم الله الرحمن الرحيم

 السلام عليكم والرحمه

حياكم الله اخواتي وحبيباتي ..
  اسعد الله قلوبكم بكل ماتحبونه وتتمنونه ..

 
  جيت لكم بموضوع جديد هذه المرة يتعلق الموضوع عن البيت وترتيبه

لان كنت كثير اعاني بهالشيء وخصوصا عندي طفلين طول اليوم يحوسون وانا عندي دراستي وبيت وزوج وهواياتي وووووو وكثير اشياء تطلب مني وتبي احتياجات..

فا حياه الفوضى والعشوائيه ابدا مو مريحه واصلا ما يكون الشغل اللي انجزتيه واضح وسط الفوضى

فا خلينا نرتب يومنا وننجز مهامنا واحتا مرتاحين ومبسوطين ونترك عنا الكسل والخمووووول

وراح اسمي هالشيء تحدي ليش تحدي؟ لان نبي نتغلب ع المهام الصعبه واكيد كل وحده مننا عندها ظروف واهتمامات مختلفه صح؟ ومانتشابه فيها الا في اشياء مشتركه بيننا فا خلونا نكسر هالروتين الممل ونخلي حياتنا حلوه وسعيده واللي حولنا ينبسطوون مننا 

ودايم نسآل من وين ابدأ ؟ وكيف أصنع بدايه وأيام جديده ؟؟ وكيف أطور من نفسي وآثقفها؟وماعندي الوقت الكافي ؟؟!!! وكثير نقول ان الفشل في حياتنا وارد وان يومنا مافيه شيء مميز
لكن لازم احنا اللي نخلق هالشيء بانفسنا مو هو اللي يجي لنا صحيح في عوامل تساعد بس ممكن ان احنا نبدآ من الصفر نسوي العوامل ثم نعمل ع تفعيل حياتنا بشكل ناجح وسعيد ومنظم ..
و أول حاجه نبي نرتبها هو نومنا نعم النوم لان اذا ترتب يترتب كل شي معاه والمطلوب منا هوو

النوم الكافي النوم الكافي ابدا مو  معناه النوم طول الوقت وفي اي وقتحسينا بالنوم لا اقصد فيه وقت الليل او وقت القيلوله المعرووووف لان معروف لحظه الاستيقاظ والاكتفاء من النوم هي اللي تحدد مزاجنا لليوم وكيف نكون مروقين والمزاج عال العال وكلنا نشاط وحيويه ..

  ثاني حاجه مطلوووبه هو الابتعاد عن الضغوطات والتفكير اللي موحلو ولازم نشغل حاجه بعقلنا اسمها :

ايقاف التفكير السلبي ومسح لكل شي يعووق تفكيري الايجابي ويسلبني سعادتي وناخذ طاقه ايجابيه من اللي حولنا سواء اهل أم أو أب أو زوج وحبيب وحتى الطفل فيه كمية طاقه رهيبه لو اخذنا منه بوسه شقد يعطينا طاااقه ونبتعد عن جو الضيق وننسي الامس ونحيي بكرا بأمل جديد وروح حلووه يعني خذوا اللي حوليكم بنزين لكم ..

الشيء الثالث هو التقييم لازم نقيم أنفسنا وهل احنا راضيين ع المستوى العلمي والعملي والنفسي ع انفسنا ولالا ومهم تقييم الناس او افراد العائله لااااا ابدا المهم نفسك انت ضميرك آنت واذا كنتي راضيه فا اللي حولك مردهم يتعودون ويتقبلون طريقتك ورضاك عن نفسك

كمان شي مهم نحافظ ع اهم شي موجود بحياتنا وهو

الصلاة في وقتها يوميا والدعاء بأن الله يسهل ويسخر لنا الامور في صالحنا وصالح احبائنا حتى لو كان همس بالقلب بينك وبين الله .. 

ونيجي للموضوع اللي بعده هو كيف نقضي على الفوضى والعشوئيه في المكان اللي آنا موجوده فيه 

طبعا الاغلب يتفق ع ان وضع جدول ونظام يساعد كثير كثير ع الالتزام والترتيب وهالشي خصوصا انا ما يمشي الا معاي الا هالنظام احب اكتب وادون المهام اللي عندي ع ورقه حتى اتفه الامور احب اشوفها مكتوبه حتى لو ما سويتها بجدول

 

فا بعدها قلت ليش ما انظم لي جدول يرتبني واعرف اولوياتي افضل من اني احيانا انسى او اتناسى  واتكاسل عن اني اسوي اي شيء

فا شفت نفسي اني امشي بالسانتي ع الجداول

وراح احط لكم نماذج جداول صممتها بنفسي واحتياجاتي وطريقتي في الروتين بس في حاجه اقولها

 من الخطأ ان اي وحده تعتمد على جدول غيرك
لان كل جدول على حسب قدرتك الجسمية وحتى نوعية شخصيتك و اولوياتك وعدد اطفالك ومساحة البيت وحتى أطباع الاشخاص اللي معاك 
كل هذه الاشياء تفرض عليك ان تسوين جدولك بنفسك وتراعين اللي انتي تبينه الا اذا حسيتي ان هالجدول يناسبك اطبعيه وانتي مرتاحه هههههه

الجدول الاول سويت  المهام المطلوبه مني يوميا واسبوعيا وشهريا كتبتها علشان اعرف ارتب اموري وامشي عليها ومنها اسوي جدولي اليومي طبعا اللي بالجدول ترتبينه حسب احتياجك انتي ومكانك وعدد الاشخاص اللي معك

ومن هالجدول سويت جدول ثاني بسيط جدا جدا جدا ومبدئي جدا للآشغال اللي بتكون يوميه وامارسها كل يوم تقريبا طبعا اعيد واكرر ممكن ماتتناسب مع كل وحده

في ملاحظه حابه اقولها ان وانتي تصممين جدولك حاولي تخلينه بالوان مبهجه وملهمه لك علشان يحفزك ويفتح نفسك لليوم الجديد لان اذا كان الشكل مهمل مراا تتسكر النفسيه ومافي حماس
طبعا تصممينه بابسط الاشياء وماتتكلفين في تصميمه وتزيينه لانه بالنهايه جدوول

نموذج للجدول 

 

طبعا صممتهم ع السريع لراح انزل تصاميم جاهز للتحميل قريب اشاء الله اذا شفت تفاعل  ع البوست لان الصمت مثل ماتعرفون يقتل الابداع

فا اتمنى اشوف مشاركاتكم ..

المهم نرجع لكلامنا المهم 

طبعا انا سويت هالنظام علشان ننظم يومنا بس مو شرط يكون يومنا هو اليوم المثالي اكيد في اشياء او ظرووف تغير روتين يومنا مرات مواعيد او طلعات مفاجئه او ايا كان .. نقدر ناجل الاشغال ونكمل يومنا طبيعي ...

واكيد في اشياء انا ما كتبتها لانها تقريبا روتين موجود بكل بيت مثل اعداد الفطور وترويش الاطفال او حتى وقت استحمامك انتي وقت تجهيز الاطفال للمدرسه او ترتيب السرير وهكذا يعني 

وانشاء الله في تدوينات قادمه راح اسوي لكم افكار للتنظيم والترتيب من تصويري واذا شفت فكره حلوه وجديده  بالنت راح ادرجها كمان 

راح اختم الموضوع اليوم  بمختصر الكلام المفيد وراح اكمل لكم اذا اعجبتكم هالسلسله واسويها تدوينات مفصله ..

ان لحظة استيقاظك سواء من النوم او استيقاظ فكرك وعقلك بافكار جديده او الدراسه او انجاح مشروع او اكتساب مهاره وثقافه او ترتيب بيتك وحياتك ونظامك  تاكدي ان هي اللحظه اللي راح تصنعك شخص مميز وناجح
 مجرد ما ان فكرتي بترتيب او شي مهم هذي بحد ذاتها خطوه جميله ونيره في حياتك وانك اكيد والاكيد قادره ع تحقيقها .. واول النجاح فكره ثم تنفيذ ومثابره ..

دمتم بحب وبود

انتظر آرائكم بحماس ،،

في آمان الله وحفظه